2. Mosesgirji 31

₁Hearrá celkkii Mosesii:

₂Mun lean válljen Uri bártni Besalela, Hura áddjuba Juda čearddas, ₃ja deavdán su Ipmila vuoiŋŋain, nu ahte sus lea viissisvuohta ja jierbmi, diehtu ja čehppodat ₄hutkat ja duddjot dáiddolaš dujiid gollis, silbbas ja bronssas, ₅sadjit ja giddet čikŋageđggiid, vuollat muora ja ráhkadit buotlágán gáibideaddji dujiid. ₆Su veahkkin mun bijan Oholiaba, Ahisamaka bártni Dana čearddas, ja duojáriidda mun lean addán dáiddu duddjot buot maid lean gohččon du ráhkadit: ₇almmustusgoađi, lihtumearkka árkka ja dan ala soabahussaji ja buot goađi biergasiid, ₈beavddi oktan dan dárbašiiguin, lámpájuolggi čielga gollis oktan dan dárbašiiguin, suovasáltára, ₉boaldinoaffaráltára oktan dan dárbašiiguin ja basadanlihti ja dan juolggi, ₁₀virgebiktasiid ja báhppa Arona bassi biktasiid ja su bártniid báhpabiktasiid, ₁₁vuoidanoljju ja njálggahájat suovvasiid bassibáikki várás. Sii galget dahkat buot dárkilit dan rávvaga mielde maid mun lean addán dutnje.

₁₂Hearrá celkkii Mosesii:

₁₃Cealkke israellaččaide: “Dollet mu sabbahiid, danne go sabbat lea mearka mu ja din gaskkas buolvvas bulvii, vai dii diehtibehtet ahte mun lean Hearrá, guhte basuhan din. ₁₄Dollet sabbaha, danne go dat galgá leat didjiide bassi. Dat gii rihkku sabbaha, galgá ráŋggáštuvvot jápmimiin. Juohkehaš gii bargá sabbahin, galgá jávkaduvvot iežas álbmogis. ₁₅Guhtta beaivvi vahkus galgabehtet bargat, muhto čihččet beaivi lea sabbat, Hearrái basuhuvvon vuoiŋŋastanbeaivi. Juohkehaš gii bargá sabbatbeaivvi, galgá ráŋggáštuvvot jápmimiin. ₁₆Buolvvas bulvii israellaččat galget doallat sabbaha ja gudnejahttit dan agálaš lihttun. ₁₇Sabbat lea agálaš mearka mu ja israellaččaid gaskkas, dasgo guđa beaivvis Hearrá dagai almmi ja eatnama, muhto čihččet beaivvi son in šat bargan, muhto vuoiŋŋastii.”

₁₈Go Hearrá lei geargan sárdnumis buot dán Mosesii Sinaiváris, de son attii sutnje guokte távvala lihtumearkan, guokte geađgetávvala maid son iežas suorpmain lei čállán.