2. Mosesgirji 38

₁Besalel duddjui boaldinoaffaráltára akasiamuoras. Dat lei njealječiegat, vihtta állana guhku, vihtta állana govddu ja golbma állana alu. ₂Dan njealji čihkii son duddjui čorvviid oktan bihttán áltáriin. Son skoađastii dan bronssain. ₃Son duddjui buot áltára dárbašiid: gutnalihtiid, gutnagoaivvuid, oaffarbolluid, gáffaliid ja dollalihtiid. Buot dáid dárbašiid son duddjui bronssas. ₄Áltárii son duddjui maid fierpmelágáš bronsabildda ja bijai dan áltára ravdalistta vuollái áltára gaskka rádjái. ₅Son leikii njeallje rieggá bronsabildda njealji čihkii, maidda guoddinstákkut nahkehuvvojit. ₆Guoddinstákkuid son duddjui akasiamuoras ja skoađastii daid bronssain. ₇Son nahkehii guoddinstákkuid rieggáide mat ledje áltára goappáge bealde, nu ahte dan sáhtii guoddit. Son huksii áltára fielluin, nu ahte dat lei rabas vuolil ja bajil.

₈Son duddjui bronsaáldása ja dasa juolggi. Dasa son geavahii daid bálvaleaddjinissoniid speadjaliid, geat doaimmahedje bálvalusa almmustusgoađi uvssa guoras.

₉De son dagai ovdašilju. Šilju lulábeallái, lulás guvlui, dahkkojuvvojedje fiinna gerdojuvvon beallemasas čuođi állana guhkkosaš loavdagat. ₁₀Daid várás duddjojuvvojedje bronssas guoktelogi stoalppu ja guoktelogi juolggi ja silbbas stoalppuid roahkit ja doaresmuorat. ₁₁Seammá láhkái duddjojuvvojedje davábeale ravdii čuođi állana guhkkosaš loavdagat, daidda guoktelogi stoalppu ja guoktelogi bronsajuolggi, ja stoalppuide roahkit ja doaresmuorat silbbas. ₁₂Oarjeravddas ledje viđalogi állana guhkkosaš loavdagat ja daidda logi stoalppu oktan daid julggiiguin, ja stoalppuide roahkit ja doaresmuorat silbbas. ₁₃Ovddabealli, nuorttas guvlui, lei vihttalogi állana govddu. ₁₄Poartta nuppe bealde ledje viđanuppelohkái állana guhkkosaš loavdagat ja daidda golbma stoalppu oktan daid julggiiguin, ₁₅ja nuppe bealde viđanuppelohkái állana guhkkosaš loavdagat ja golbma stoalppu ja golbma juolggi. Ovdašilju poartta goabbáge bealli lei ovttalágán. ₁₆Buot ovdašilju loavdagat ledje duddjojuvvon fiinna gerdojuvvon beallemasas. ₁₇Stoalpojuolggit ledje bronssas ja stoalppuid roahkit ja doaresmuorat silbbas. Stoalpogeažit ledje skoađastuvvon silbbain. Buot ovdašilju stoalpput ledje giddejuvvon oktii silbadoaresholggaiguin. ₁₈Ovdašilju poartta govččas lei gođđojuvvon čáppa hearvaduodjin ruksesalit, purpurrukses ja karmosinrukses ullus ja fiinna gerdojuvvon beallemasas. Dan guhkkodat lei guoktelogi állana ja allodat vihtta állana dahjege seammá go ovdašilju loavdagiin. ₁₉Poartagokčasa várás duddjojuvvojedje njeallje stoalppu ja daidda njeallje bronsajuolggi. Stoalppuid roahkit ja doaresmuorat ledje silbbas, ja stoalpogeažit ledje skoađastuvvon silbbain. ₂₀Buot goađi ja ovdašilju giddennávllit ledje bronssas.

₂₁Dát lea čilgehus das man ollu dárbašat leat golahuvvon goahtái, lihtumearkka árkka goahtái. Levilaččat dahke čilgehusa nugo Moses gohčui, ja dan jođihii Itamar, báhppa Arona bárdni. ₂₂Uri bárdni Besalel, Hura áddjut Juda čearddas, lei dahkan buot daid rávvagiid mielde maid Hearrá lei addán Mosesii. ₂₃Sus lei veahkkin Oholiab, Ahisamaka bárdni Dana čearddas, gii lei čeahppi duddjot ja máhtii gođđit ja hervet čábbát ruksesalit, purpurrukses ja karmosinrukses ulloláiggiin ja fiinna beallemasas. ₂₄Buot golli mii adnojuvvui bassibáikái, dat golli mii lei buktojuvvon oaffarattáldahkan, lei oktiibuot guoktelogiovcci taleantta ja čiežačuođigolbmalogi šekela bassibáikki šekeldeattu mielde. ₂₅Silba mii lei čoggon go searvegoddi lohkkojuvvui lei čuođi taleantta ja duhátčiežačuođi čiežalogivihtta šekela bassibáikki šekeldeattu mielde vihkkejuvvon; ₂₆dat bođii beka-mihttu dahjege šekelbealli bassibáikki deattu mielde vihkkejuvvon guđege guoktelogijahkásačča ja das boarráset olbmá nammii. Sii ledje oktiibuot guhttačuođigolbmaduhát vihttačuođivihttalogi olbmá. ₂₇Dán čuođi silbataleanttas leikejuvvojedje bassibáikki juolggit ja ovdaloavdaga juolggit; čuođi taleanttas čuođi juolggi, taleanta ain guđege juolgái. ₂₈Dan duhátčiežačuođi čiežalogiviđa šekelis duddjojuvvojedje stoalporoahkit, skoađastuvvojedje stoalpogeažit ja duddjojuvvojedje doaresholggat maiguin stoalpput giddejuvvojedje oktii. ₂₉Oaffarattáldahkan buktojuvvon bronsa lei čiežalogi taleantta ja guokteduhát njeallječuođi šekela. ₃₀Das duddjojuvvojedje juolggit almmustusgoađi uksii, bronsaáltár ja dasa bronsabilda ja buot eará áltára dárbašat, ₃₁juolggit birra ovdašilju, ovdašilju poartta juolggit, buot bassibáikki giddennávllit ja buot giddennávllit birra ovdašilju.