Esekiel 20

₁Čihččet jagi viđát mánus, mánu logát beaivvi bohte muhtun Israela vuorrasat jearrat Hearrás ráđi. Sii čohkánedje mu ovdii, ₂ja dalle munnje bođii dát Hearrá sátni: ₃Olmmoš, sártno Israela vuorrasiidda ja daja: Ná cealká Hearrá Ipmil: Boahtibehtetgo dii jearrat mus ráđi? Nu duohta go mun ealán, mun in divtte din jearrat alddán ráđi, cealká Hearrá Ipmil. ₄Cuiggot, cuiggot sin, olmmoš! Dieđit sidjiide, makkár fastivuođaid sin áhčit leat dahkan! ₅Daja sidjiide: Ná cealká Hearrá Ipmil: Dan beaivvi go mun válljejin Israela, de mun vurdnon váli Jakoba nállái. Egyptas mun dovddahin iežan sidjiide ja celken: “Mun lean Hearrá, din Ipmil.” ₆Mun vurdnon doalvut sin Egyptas eatnamii maid ledjen geahččan sin várás, eatnamii mas golgá mielki ja honnet ja mii lea čábbámus buot eatnamiin. ₇Mun celken sidjiide: “Suhppejehket eret fasttes eahpeipmiliid mat geasuhit din. Allet daga iežadet buhtismeahttumin Egypta ipmilgovaiguin. Mun lean Hearrá, din Ipmil.” ₈Muhto sii ledje gážžárat eaige dáhtton gullat mu. Sii eai suhppen eret fasttes eahpeipmiliid mat geasuhedje sin, eaige hilgon Egypta ipmilgovaid. Dalle mun áigon golggahit moarrán ja gurret suhtton sidjiide Egyptas. ₉Muhto mun dahken dan mii lei dohkálaš mu nammii, vai mu namma ii heahppášuhttojuvvoše daid álbmogiid ovddas maid gaskkas israellaččat ásse, ja maid oaidnut mun ledjen dovddahan iežan sidjiide ja dolvon sin Egyptas.

₁₀Nu mun bukten sin Egyptas, mun bukten sin meahccái. ₁₁Mun adden sidjiide báhkkomiiddán ja oahpahin sidjiide lágaidan – dat gii daid doallá, oažžu eallit. ₁₂Mun maiddái adden sidjiide sabbahiiddán mearkan sin ja mu gaskii, vai sii dieđášedje ahte mun, Hearrá, lean basuhan sin. ₁₃Muhto israellaččat gážžárušše mu vuostá meahcis. Sii eai doahttalan mu báhkkomiid, sii hilgo mu lágaid – dat gii daid doallá, oažžu eallit. Mu sabbahiidge sii eahpebasuhedje sakka. Mun áigon golggahit moarrán sin badjelii meahcis ja loahpahit sin. ₁₄Muhto mun dahken dan mii lei dohkálaš mu nammii, vai mu namma ii heahppášuhttojuvvoše daid álbmogiid ovddas maid oaidnut mun ledjen dolvon sin Egyptas. ₁₅Meahcis mun goitge vurdnon ahte in doalvvo sin dan eatnamii maid ledjen lohpidan sidjiide, eatnamii mas golgá mielki ja honnet ja mii lea čábbámus buot eatnamiin. ₁₆Siihan ledje hilgon mu lágaid eaige lean doahttalan mu báhkkomiid. Sii ledje eahpebasuhan mu sabbahiid ja gesson iežaset eahpeipmilgovaide. ₁₇Dattetge mun ledjen árpmolaš inge duššadan sin, inge mun loahpahan sin meahcis.

₁₈Meahcis mun sárdnon sin mánáide: “Allet doahttal áhčiideattet báhkkomiid alletge doala sin lágaid. Allet daga iežadet buhtismeahttumin sin eahpeipmilgovaiguin. ₁₉Mun lean Hearrá, din Ipmil. Doahttalehket mu báhkkomiid ja dollet mu lágaid ja ellet daid mielde. ₂₀Basuhehket mu sabbahiid, lehkoset dat mearkan din ja mu gaskkas, vai dii ipmirdehpet ahte mun lean Hearrá, din Ipmil.” ₂₁Muhto sin mánát gážžárušše mu vuostá. Sii eai doahttalan mu báhkkomiid eaige doallan mu lágaid – dat gii daid doallá, oažžu eallit. Sii dahke mu sabbahiid eahpebassin. Dalle mun áigon golggahit moarrán ja gurret suhtton sidjiide meahcis. ₂₂Muhto mun rohttejin gieđa ruoktot ja dahken dan mii lei dohkálaš mu nammii, vai mu namma ii heahppášuhttojuvvoše daid álbmogiid ovddas maid oaidnut mun ledjen dolvon israellaččaid Egyptas. ₂₃Meahcis mun almmatge vurdnon biđget sin álbmogiid gaskii ja botkkuhit sin vieris eatnamiidda. ₂₄Siihan eai lean eallán mu lágaid mielde. Sii ledje hilgon mu báhkkomiid, eahpebasuhan mu sabbahiid ja diktán áhčiideaset eahpeipmilgovaid giktalit sin. ₂₅Mungis adden sidjiide báhkkomiid mat eai lean buorit, ja lágaid mat eai addán eallima. ₂₆Mun dahken sin buhtismeahttumin, go sii oaffarattáldahkan bukte vuosttaža mii rahpá eatnigoaŧu. Mun dáhtton suorggahit sin, vai sii ipmirdivčče ahte mun lean Hearrá.

₂₇Olmmoš, sártno dal israellaččaide ja daja: Ná cealká Hearrá Ipmil: Velá oktii din áhčit hiddjidedje mu iežaset oskkáldasmeahttunvuođain. ₂₈Go mun ledjen buktán sin eatnamii maid ledjen vurdnon addit sidjiide, de sii dopme oaffaruššat njuovvanoaffariiddiset gos beare oidne alla dievá dahje lastás muora, sii adde oaffarattáldagaid mat moaráhuhtte mu, oaffarušše oaffariid main lei soažžudeaddji hádja ja golggahedje juhkamušoaffariiddiset. ₂₉Ja mun jerren sis: “Mii báikkiid lea dat gosa dii mannabehtet oaffaruššat?” Dan rájes dan namma lea leamaš “oaffarbáiki”.

₃₀Daja israellaččaide: Ná cealká Hearrá Ipmil: Dii dahkabehtet iežadet buhtismeahttumin áhčiideattet láhkái ja furrošehpet fasttes eahpeipmiliiddádetguin. ₃₁Velá otná beaivvinai dii dahkabehtet iežadet buhtismeahttumin eahpeipmilgovaideattetguin, go addibehtet oaffarattáldagaid ja oaffaruššabehtet mánáideattet dolas. Mungo suovašin din jearrat alddán ráđi, israellaččat? Nu duohta go mun ealán, cealká Hearrá Ipmil, mun in suova din jearrat alddán ráđi.

₃₂Dii lehpet jurddašišgoahtán: “Mii dáhttut leat dego eará eatnamiid álbmogat ja sogat ja bálvalit muoraid ja geđggiid.” Nu ii eisege dáhpáhuva! ₃₃Nu duohta go mun ealán, cealká Hearrá Ipmil, mun lean din gonagas. Mun áiggun ráđđet din gievrras ja bajiduvvon gieđain ja garra moaris. ₃₄Gievrras ja bajiduvvon gieđain ja garra moaris mun vieččan din vieris álbmogiid gaskkas ja čohkken din dain eatnamiin, maidda dii leiddet biđgejuvvon. ₃₅Dasto mun doalvvun din álbmogiid meahccái, ja doppe mun bijan din vástidit muođus muhtui iežadet daguin. ₃₆Mun bijan din vástidit, nugo mun bidjen din áhčiid vástidit Egypta meahcis, cealká Hearrá Ipmil. ₃₇Mun bijan din mannat báimmansoappi vuoli ja logan din dárkilit, ₃₈ja mun čuolddán dis eret gážžáriid ja stuibmideddjiid. Mun buvttán singe eatnamis gos sii ásset vierisin, muhto Israela eatnamii sii eai beasa. Dalle dii ipmirdehpet ahte mun lean Hearrá.

₃₉Ná cealká Hearrá Ipmil: Israellaččat, dii buohkat galgabehtet billistit iežadet eahpeipmilgovaid. Jos dii ehpet gula mu, de mun moaráhuvan. Dii ehpet šat oaččo dahkat mu bassi nama eahpebassin iežadet oaffarattáldagaiguin ja eahpeipmilgovaiguin. ₄₀Mu bassi váris, Israela alla váris, cealká Hearrá Ipmil, doppe oppa Israel bálvala mu iežas eatnamis. Doppe mun čájehan didjiide iežan ráhkisvuođa ja válddán vuostá din attáldagaid ja din álgošaddooaffariid, buot din bassi attáldagaid. ₄₁Go mun buvttán din álbmogiid gaskkas ja čohkken din dain eatnamiin maidda dii leiddet biđgejuvvon, de mun válddán din vuostá seammá millosit go oaffara man hádja soažžuda mu. Dainna maid mun dagan didjiide, mun čájehan iežan bassivuođa álbmogiid oaidnut. ₄₂Mun buvttán din Israela eatnamii, dan eatnamii maid mun vurdnon din áhčiide addit sidjiide. Dalle dii ipmirdehpet ahte mun lean Hearrá. ₄₃Doppe dii muitibehtet iežadet vádjolusa ja buot daguideattet maiguin dii leiddet dahkan iežadet buhtismeahttumin, ja dii fasttášehpet iežadet buot bahás daguideattet geažil. ₄₄Mun dagan didjiide, israellaččat, nugo lea dohkálaš mu nammii, inge nugo din bahás dagut ja din fasttes vádjolus livččii ánssášan, cealká Hearrá Ipmil. Dalle dii ipmirdehpet ahte mun lean Hearrá.