Esekiel 26

₁Oktanuppelogát jagi vuosttaš mánus, mánu vuosttaš beaivvi munnje bođii dát Hearrá sátni: ₂Olmmoš, gula. Tyros lea hiddjidan Jerusalema ja dadjan: “Álbmogiid poarta lea cuvkejuvvon, dat lea šaddan mu háldui. Mun rikkun, go dat lea duššaduvvon.” ₃Dan dihte cealká Hearrá Ipmil: Tyros, mun fallehan du. Mun čuoččáldahttán álbmogiid du vuostá, nugo mearra gearaha báruidis. ₄Dat cuvkejit Tyrosa muvrraid ja njeidet dan toartnaid. Mun suohpalasttán das eret vel muolddage ja dagan dan báljes báktin, ₅bivdofirpmiid lebbensadjin gasku ábi. Mun lean sárdnon, cealká Hearrá Ipmil. Tyros šaddá álbmogiid stajádussan ₆ja dan birasgávpogat mat leat nannámis, hearjiduvvojit mihkiin. Dalle sii ipmirdit ahte mun lean Hearrá.

₇Ná cealká Hearrá Ipmil: Mun divttán Nebukadnesara, Babylonia gonagasa, gonagasaid gonagasa, fallehit Tyrosa davvin. Son buktá heasttaidis, vovnnaidis, vovdnasoahteolbmáidis ja stuorra soahteveagas. ₈Du birasgávpogiid mat leat nannámis, son časká mihkiin. Son ráhkada birastahttinčoma, hukse fallehangorgŋehaga ja cegge galbadáhki du vuostá. ₉Son nordá du muvrraid muvrracuvkejeddjiiguin ja njeaidá du toartnaid ruovdegákkaniiguin. ₁₀Su heasttaid eatnatvuohta lokte gavjaborgga du badjelii. Heasttaid ja vovnnaid jorriid šlápma doarggistahttá du muvrraid, go son boahtá du poarttaid ráigge nugo vuoiti boahtá váldojuvvon gávpogii. ₁₁Su heasttaid gaccat dulbmet du gáhtaid cuovkkas, son goddá du álbmoga mihkiin ja du nana báccit gahččet eatnamii. ₁₂Sii rievidit du dávviriid ja rivvejit du gávpegálvvuid, njeidet eatnamii du muvrraid ja gaikot du hearvás viesuid. Sii suhppot du geđggiid, bielkkaid ja muoldda merrii. ₁₃Mun jaskkodahtán du lávlagiid šuoŋa, du lyraid jietna ii šat gullo. ₁₄Mun dagan du báljes báktin. Tyros šaddá bivdofirpmiid lebbensadjin, ii dat šat huksejuvvo. Mun, Hearrá, lean sárdnon. Ná cealká Hearrá Ipmil.

₁₅Ná cealká Hearrá Ipmil Tyrosii: Riddoeatnamat doarggistit, go don gahčat julkkanasain, go čukkohallan olbmot luibmet ja sorbmi speadjá gávpogis. ₁₆Buot ábi oaivámuččat njidjet truvnnusteaset, bálkestit gávttiideaset ja nullet hearvabiktasiiddiset. Hirbma sis lea gárvun go sii čohkkájit eatnamis, sii doarggistit geažos áigge go leat nu gáfestuvvan du dihte.

₁₇Sii lávlugohtet dutnje morašlávlaga:

₁₉Ná cealká Hearrá Ipmil: Go mun lean dahkan du heavahuvvon gávpogin, daid gávpogiid láhkásažžan main ii oktage ása, ja go lean diktán čiekŋalasa njiellat du nu ahte stuorra čázit gokčet du, ₂₀de dalle mun nordadan du vulos dološ áiggi álbmoga lusa, hávdáduvvon olbmuid bárrii. Dološ viessobázahasaid ládje don njaŋgát čiekŋalasa eatnamis ovttas daiguin geat leat mannan hávdái. Don it goassege šat máhca ealli olbmuid eatnamii. ₂₁Mun dagan du suorggahussan, don it leat šat. Dat gii ohcá du, ii gávnna du goassege, cealká Hearrá Ipmil.