Libanona stuorra muorra
1Oktanuppelogát jagi goalmmát mánus, mánu vuosttaš beaivvi munnje bođii dát Hearrá sátni: 2Olmmoš, daja faraoi, Egypta gonagassii, ja su šlámaideaddji jovkui:
Gean láhkásaš don leat
stuorisvuođastat?
3Don leat dego sypressa,
nugo Libanona seder
man čáppa oavssit
suoivanaste eatnama.
Dat šattai allagin,
dan giera olii balvvaid gaskii.
4Čáhci šaddadii sedera stuorisin,
dat oaččui šaddannávccaid čiekŋalasas
man suorggit golge
dan gilvvasadjái
ja golggahedje jogažiid
buot vuovddi muoraide.
5Danin dat šattai alibun
go eará vuovddi muorat,
danin dan giera šattai suohkadin
ja dan oavssit guhkkin.
Dat oaččui ollu čázi ja stuorui.
6Buot almmi lottit
bessejedje dan gierragis,
dan ovssiid vuolde čivge
buot meahcieallit,
álbmogiid eatnatvuohta
ásai dan suoivanis.
7Dat šattai stuorisin ja čáppisin,
ja dan oavssit ledje guhkit ja lastájat,
danne go dan ruohttasat
olle golgi čáziid rádjái.
8Ii oktage Ipmila gilvvagárddi seder
lean dan veardásaš.
Sypressaid oavssit
eai lean veardideames dan oaksin,
platánaid gierragat
eai lean dan gierraga veardásaččat.
Ii oktage Ipmila gilvvagárddi muorra
lean nu čáppat.
9Mun dahken dan čáppa muorran,
suorgájin ja lastájin.
Buot Edena muorat,
Ipmila gilvvagárddi muorat,
gáđaštedje dan.
10Ná cealká Hearrá Ipmil: Danin go dat lea šaddan nu allagin ahte lea faŋuhan gierragis balvvaid gaskii ja lea čevlon iežas allodaga dihte, 11de mun attán dan álbmogiid oaivámučča gihtii, ja son dahká dasa maid dan ipmilmeahttunvuohta ánssáša. Mun lean dan hilgon. 12Nu vierroolbmot, goaves báhkinat, njeide dan ja dikte dan njáŋgát. Dan oavssit gahčče váriide ja buot legiide, dan suorggit doddjojuvvojedje buot jogažiid gáttiide, ja buot eatnama álbmogat vulge dan suoivanis ja guđđe dan njáŋgát.
13Buot almmi lottit seivo
dan gahččan máddaga ala,
buot meahcieallit ohce suoji
dan ovssiid gaskkas.
14Eai beasa šat čáhcegátti muorat šaddat allagin eaige faŋuhit gierragiiddiset balvvaid rádjái. Oktage muorra mas lea čáhcevallji, ii beasa šat leat iešbuorre, vaikko dat šattašii man allagin ihkinassii. Dat buot addojuvvojit jápmimii ja bohtet čiekŋalasa eatnamii daid olbmuid bárrii geat leat mannan hávdái.
15Ná cealká Hearrá Ipmil: Dan beaivvi go seder njiejai jábmiidáibmui, de mun bidjen čiekŋalasa moraštit ja gokčen dan, mun bissehin rávnnjiid ja doalahin čázi golgamis. Mun gárvvuhin Libanona morašbiktasiidda sedera geažil, ja buot meahci muorat áste. 16Álbmogat doarggistedje julkkanasa dihte go dat gahčai, go mun nordadin dan vulos jábmiidáibmui, daid lusa geat leat mannan hávdái. Nu jeađđašuvve buot Edena muorat čiekŋalasa eatnamis, Libanona buoremusat, buot main lei leamaš čáhcevallji. 17Oktan sederiin dat ledje njiedjan jábmiidáibmui, daid lusa geat leat goddojuvvon mihkiin. Dat geat ledje ássan dan suoivanis, bieđganadde álbmogiid seahká.
18Leigo oktage Edena muorra nu hearvái ja stuoris go don? Dattetge don norddahalat vulos čiekŋalasa eatnamii seammá ládje go Edena muorat. Don njaŋgát birračuohpakeahtes olbmuid gaskkas, mihkiin sorbmejuvvon olbmuid báras.
Nu geavvá faraoi ja oppa su šlámaideaddji jovkui, cealká Hearrá Ipmil.
