Esekiel 33

₁Munnje bođii dát Hearrá sátni: ₂Olmmoš, sártno álbmogat olbmuide ja daja: Go mun vuolggahan soahteveaga fallehit muhtun eatnama, de doppe lea várdájeaddji gean álbmot lea bidjan várdát. ₃Go várdájeaddji oaidná soahteveaga lahkoneamen, de son bosáda dorvve várrehussan álbmogii. ₄Jos muhtun gii gullá dorvve jiena, ii beroš várrehusas, muhto gottáhallá vašálažžii, de son lea ieš sivalaš iežas jápmimii. ₅Son gal gulai dorvve jiena, muhto ii beroštan várrehusas, ja danin son ieš lea sivalaš. Jos son livččii váldán vára várrehusas, de son livččii gádjon heakkas. ₆Jos várdájeaddji oaidná soahteveaga lahkoneamen muhto ii bosát dorvve, de eatnama olbmot eai oaččo várrehusa, ja vašálaš boahtá ja goddá. Dat gii gottáhallá, jápmá gal suttuidis dihte, muhto dan olbmo jápmimis mun bijan várdájeaddji vástidit.

₇Olmmoš, mun bijan du israellaččaid várdájeaddjin. Go don gulat sáni mu njálmmis, de don galggat muitalit sidjiide mu várrehusa. ₈Jos mun cealkkán ipmilmeahttumii: “Du ráŋggáštus lea jápmin”, ja don it leat várren su su daguin, de ipmilmeahttun gal jápmá iežas suttuid dihte, muhto su jápmimis mun bijan du vástidit. ₉Muhto jos don leat várren ipmilmeahttuma su daguin ja ávžžuhan su jorgalit geainnuinis, iige son jorgal, de son gal jápmá suttuidis dihte, muhto don leat gádjon iežat heakka.

₁₀Olmmoš, daja israellaččaide: Dii dadjabehtet: “Min rihkkumat ja suttut losidahttet min, ja mii roahppánit. Mo mii dalle sáhttit eallit?” ₁₁Daja sidjiide: Nu duohta go mun ealán, cealká Hearrá Ipmil, mun in liiko ipmilmeahttuma jápmimii, muhto dasa ahte son jorgala geainnuinis ja eallá. Jorgalehket! Jorgalehket bahás geainnuineattet! Manin dii jámášeiddet, israellaččat?

₁₂Olmmoš, daja iežat álbmoga olbmuide: Jos vanhurskkis sudduda, de su vanhurskkisvuohta ii gájo su. Jos ipmilmeahttun jorgala ipmilmeahttunvuođastis, de su ipmilmeahttun eallin ii njeaidde su. Jos vanhurskkis suddudišgoahtá, de son ii šat sáhte dorvvastit iežas vanhurskkisvuhtii. ₁₃Jos mun cealkkán vanhurskásii: “Don oaččut eallit”, muhto son dorvvasta iežas vanhurskkisvuhtii ja dahká vearrivuođa, de buot su vanhurskkis dagut vajáldahttojuvvojit. Son jápmá vearredaguidis dihte. ₁₄Jos mun cealkkán ipmilmeahttumii: “Don galggat jápmit”, muhto son jorgala suttuinis ja dahká dan mii lea riekta ja vuoigat, ₁₅máhcaha dan maid lea váldán pántan, addá ruoktot dan maid lea rievidan, doallá eallima báhkkomiid iige šat daga vearrivuođa, de son oažžu eallit. Son ii jáme. ₁₆Buot suttut maid son lea dahkan, vajáldahttojuvvojit. Son dahká dál dan mii lea riekta ja vuoigat, ja danin son oažžu eallit.

₁₇Du álbmoga olbmot dadjet: “Hearrá geaidnu ii leat vuoigat.” Muhto sin iežaset geaidnu ii leat vuoigat! ₁₈Jos vanhurskkis jorgala vanhurskkisvuođastis ja dahká vearrivuođa, de son jápmá vearredaguidis geažil. ₁₉Jos ipmilmeahttun jorgala ipmilmeahttunvuođastis ja dahká dan mii lea riekta ja vuoigat, de son oažžu eallit. ₂₀Almmatge dii dadjabehtet: “Hearrá geaidnu ii leat vuoigat.” Mun dubmen din, israellaččat, juohkehačča su geainnuid mielde.

₂₁Min fáŋgavuođa guoktenuppelogát jagi logát mánus, mánu viđát beaivvi mu lusa bođii Jerusalemis báhtareaddji. Son muitalii: “Gávpot lea váldojuvvon.” ₂₂Hearrá giehta lei guoskkahan mu eahkedis, ovdal go báhtareaddji bođii, ja son lei rabastan mu njálmmi ovdal go báhtareaddji bođii iđedis, nu ahte mu njálbmi lei rahpasan inge mun lean šat eambbo gielaheapme.

₂₃Munnje bođii dát Hearrá sátni: ₂₄Olmmoš, dat geat ásset Israela eatnama viessobázahasaid gaskkas, dadjet: “Abraham lei okta olmmoš, muhto son dattetge oaččui eatnama oapminis. Mii leat eatnagat, vissásit eanan lea addojuvvon min opmodahkan.” ₂₅Dan dihte daja sidjiide: Ná cealká Hearrá Ipmil: Dii borrabehtet bierggu mas lea varra, dii bálvalehpet eahpeipmilgovaideattet ja golggahehpet vara. Diigo oččošeiddet eatnama oapmineattet? ₂₆Dii dorvvastehpet iežadet miehkkái, dahkabehtet ilgadis daguid ja veallábehtet lagamuččadet áhkáin. Diigo oččošeiddet atnit eatnama oapmineattet? ₂₇Daja sidjiide: Ná cealká Hearrá Ipmil: Nu duohta go mun ealán, dat geat ásset viessobázahasaid gaskkas, gahččet miehkkái, daid geat leat meahcis, borret spiret ja dat geat orrot bávttiin ja bákteráiggiin, jápmet rohttudávdii. ₂₈Mun dagan eatnama ávdimin ja ruojusin, dan gorges fápmu doddjojuvvo ja Israela ávdin váriin ii jođe oktage. ₂₉Sii ipmirdit ahte mun lean Hearrá, go mun dagan eatnama ávdimin ja ruojusin sin ilgadis daguid dihte.

₃₀Olmmoš, du álbmoga olbmot sártnodit du birra gaskaneaset seaidneguorain ja viessouvssain. Sii buohkat dadjet guhtet guoibmáseaset: “Vulgot gullat, makkár sátni dál lea boahtán Hearrás.” ₃₁Sii bohtet álbmogassii du lusa, čohkánit du ovdii ja guldalit du sániid, muhto sii eai daga daid mielde. Sin njálmmis leat giellásat, ja sii jurddašit dušše iežaset vuoittu. ₃₂Don leat sidjiide dušše dego dakkár gii lávlu ráhkisvuođalávlagiid čáppa jienain ja čuojaha čehpet. Sii gal guldalit du sániid, muhto eai daga daid mielde. ₃₃Muhto go mu sánit ollašuvvet – ja dat ollašuvvet – de dalle sii ipmirdit ahte sin gaskkas lea leamaš profehta.