Esekiel 36

₁Olmmoš, profehtastala Israela váriide ja daja: Israela várit, gullet Hearrá sáni! ₂Ná cealká Hearrá Ipmil: Din vašálaččat leat bilkidan din ja dadjan: “Dál duot agálaš dievát leat šaddan min opmodahkan.” ₃Dan dihte profehtastala ja daja: Ná cealká Hearrá Ipmil: Dii lehpet hearjiduvvon ja dulbmojuvvon, ja juohke bealde álbmogat leat oččodeamen din opmodahkaneaset. Dii lehpet šaddan buohkaid baksamiid beakkuheamošin ja bahás ságaid vuložin. ₄Dan dihte, Israela várit, gullet Hearrá Ipmila sáni! Ná cealká Hearrá Ipmil váriide ja dieváide, jogažiidda ja legiide, ávdin viessobázahasaide ja hilgojuvvon gávpogiidda maid buot ránnjáálbmogat leat stajidan ja hiddjidan: ₅Duođaid, cealká Hearrá Ipmil, mun sártnun buolli moaris eará álbmogiid vuostá ja oppa Edoma vuostá. Áccohallamiin ja badjelgeahččanvuođain dat leat váldán mu eatnama oapmineaset.

₆Dan dihte profehtastala Israela eatnama birra ja daja váriide ja dieváide, jogažiidda ja legiide: Ná cealká Hearrá Ipmil: Mun sártnun moaris ja suhtus, danin go eará álbmogat leat hiddjidan din. ₇Ná cealká Hearrá Ipmil: Mun bajidan gieđa ja vuortnun ahte din birasálbmogat ieža šaddet hiddjiduvvot. ₈Muhto dii, Israela várit, runiidehpet fas ja šaddadehpet šaddosiid mu álbmogii Israelii, mii fargga máhccá. ₉Mun boađán din lusa ja jorgalan din beallái, din bealddut jorgojuvvojit ja gilvojuvvojit. ₁₀Mun divttán ollu olbmuid ássat din vilttiide, oppa Israela álbmoga. Olbmot ásset gávpogiidda, ja viessobázahasat huksejuvvojit fas. ₁₁Mun divttán ollu olbmuid ja omiid ássat din vilttiide, mun divttán daid leat šattolaččat ja eatnánit. Mun dagan din olbmuid ássanbáikin nugo dolin ja attán didjiide eambbo buriid go ovdal. Dalle dii ipmirdehpet ahte mun lean Hearrá. ₁₂Mun divttán olbmuid, oppa álbmogan Israela, vádjolit din vilttiin, ja sii váldet din oapmineaset, dii šaddabehtet sin opmodahkan. Dii ehpet šat goassege daga sin mánáheapmin.

₁₃Ná cealká Hearrá Ipmil: Olbmot lohket du borrat olbmuid ja dahkat iežat álbmoga mánáheapmin. ₁₄Danin cealká Hearrá Ipmil: It don šat bora olbmuid itge daga iežat álbmoga mánáheapmin ₁₅inge mun divtte du šaddat gullat vierroálbmogiid bilkosániid. Eará álbmogat eai šat hiddjit du, cealká Hearrá Ipmil.

₁₆Munnje bođii dát Hearrá sátni: ₁₇Olmmoš, go israellaččat ásse iežaset eatnamis, de sii dahke dan buhtismeahttumin iežaset vádjolusain ja daguiguin. Sin vádjolus lei mu čalmmiin buhtismeahttun dego nissona mánnosaš buhtismeahttunvuohta. ₁₈Sii golggahedje vara eatnamis ja dahke dan buhtismeahttumin eahpeipmilgovaideasetguin, ja dan dihte mun gurrejin moarrán sidjiide. ₁₉Mun biđgejin sin álbmogiid gaskii, ja sii botkkuhuvvojedje vieris eatnamiidda. Mun dubmejin sin nugo sin vádjolus ja dagut ánssášedje. ₂₀Guđe álbmoga gaskii sii ain bohte, de sii heahppášuhtte mu bassi nama, danin go sin birra daddjojuvvui: “Sii leat Hearrá álbmot, ja dattetge sii leat šaddan vuolgit su eatnamis!” ₂₁Mun váivašuvven danne go israellaččat heahppášuhtte mu bassi nama daid álbmogiid gaskkas maid gaskii ledje boahtán.

₂₂Daja dan dihte Israela álbmogii: Ná cealká Hearrá Ipmil: In mun daga din dihte, israellaččat, dan maid dagan, muhto iežan bassi nama dihte maid dii lehpet heahppášuhttán daid álbmogiid gaskkas, maid gaskii lehpet boahtán. ₂₃Dii lehpet heahppášuhttán mu stuorra nama álbmogiid gaskkas; dat lea heahppášuhttojuvvon, muhto mun basuhan dan. Dainna maid mun dagan didjiide, mun čájehan iežan bassivuođa álbmogiid oaidnut. Dalle dat ipmirdit ahte mun lean Hearrá, cealká Hearrá Ipmil. ₂₄Mun vieččan din álbmogiid gaskkas, čohkken din buot eatnamiin ja buvttán din din iežadet eatnamii. ₂₅De mun riškkuhan buhtis čázi din badjelii, vai dii buhtásmuvvabehtet. Dii lehpet dahkan iežadet buhtismeahttumin buot eahpeipmilgovaideattetguin, muhto mun buhtistan din. ₂₆Mun attán din raddái ođđa váimmu ja deavddán din ođđa vuoiŋŋain. Mun válddán din rattis geađgeváimmu ja attán dan sadjái oažževáimmu. ₂₇Mun deavddán din iežan vuoiŋŋain ja oahpistan din jeagadit mu báhkkomiid ja doallat mu lágaid ja eallit daid mielde. ₂₈Dii oažžubehtet ássat dan eatnamis maid mun lean addán din áhčiide. Dalle dii lehpet mu álbmot, ja mun lean din Ipmil. ₂₉Mun gájun din buot din buhtismeahttunvuođas. Mun gohčun gortni šaddat ja dagan dan eatnagin, inge mun šat suova din gillát nealggi. ₃₀Mun divttán muoraid addit ollu šaddosiid ja bealdduid addit valljugas šattu, nu ahte dii ehpet šatta šat gillát eará álbmogiid hiddjádusa nealggi geažil. ₃₁Go dii dalle muitibehtet iežadet bahás vádjolusa ja buot vearrivuođa maid lehpet dahkan, de dii fasttášehpet iežadet suttuideattet ja fasttes daguideattet dihte. ₃₂Muitet ahte mun in daga din dihte dan maid dagan, cealká Hearrá Ipmil. Heahpanaddet ja heahpanehket vádjolusadet, israellaččat!

₃₃Ná cealká Hearrá Ipmil: Go mun lean buhtistan din buot din vearredaguin, de mun divttán olbmuid ássat gávpogiidda, ja viessobázahasat huksejuvvojit fas. ₃₄Ávdin eanan bargojuvvo, iige dat gii johtá doppe, oainne šat meahci. ₃₅Olbmot dadjet: “Dát eanan lei ávdin, muhto dál dat lea dego Edena gilvvagárdi. Gávpogat mat ledje čievračopman, heavahuvvon ja biliduvvon, leat dál nannejuvvon, ja olbmot ásset dain.” ₃₆Dalle din birasálbmogat, dat mat vel leat báhcán, ipmirdit ahte mun, Hearrá, lean huksen dan mii lei heavahuvvon, ja lean dahkan ávdin eatnama bargojuvvon eanamin. Mun, Hearrá, lean sárdnon, ja mun dagan dan.

₃₇Ná cealká Hearrá Ipmil: Velá dán mun dagan Israela álbmogii, go sii átnot dan mus: Mun divttán sin lassánit nugo sávzaeallu. ₃₈Nugo oaffarsávzzat devdet Jerusalema basiid áigge, nu olmmošealutge devdet heavahuvvon gávpogiid. Dalle sii ipmirdit ahte mun lean Hearrá.