Gog falleha Israela
1Munnje bođii dát Hearrá sátni: 2Olmmoš, jorgal muođuid Magoga eatnama guvlui, Goga guvlui gii lea Mešeka ja Tubala stuorraoaivámuš, ja gulat sutnje duomu. 3Daja: Ná cealká Hearrá Ipmil: Gog, Mešeka ja Tubala stuorraoaivámuš, mun fallehan du! 4Mun darvvihan vuokkaid du olloliidda ja geasán du báikkis nubbái, mun buvttán oidnosii du ja oppa du soahteveaga, heasttaid ja riidejeddjiid, buohkaid hearvagárvvuineaset, oppa du stuorra joavkku jorba ja guhkes galbbaideasetguin, juohkehačča miehkki gieđas. 5Sin mielde leat Persia, Kuša ja Puta olbmát, buohkain galbbat ja ruovdegahpirat, 6Gomer ja buot dan soahtejoavkkut, Bet Togarma guhkkin davvin ja buot dan soahtejoavkkut – du mielde leat eatnat álbmogat. 7Ráhkkan ja leage gárvvis, don ja oppa soahteveahka mii lea čoagganan du lusa. Ráhkkan mu bálvalussii, 8danin go guhkes áiggi geažes don geahčaduvvot, ja boahttevaš beivviid don fallehat eatnama mii lea áhtan miehki stajideames, eatnama man ássit leat čoggojuvvon máŋgga álbmoga gaskkas ja fas čohkkejuvvon Israela váriide mat guhká ledje ávdimin. Sii leat buktojuvvon vierroálbmogiid gaskkas, ja sii ásset doppe oadjebassan. 9Don fallehat ovdan riđu láhkái, don govččat eatnama dego balva, don oktan buot soahtejoavkkuidatguin ja eatnat álbmogiiguin.
10Ná cealká Hearrá Ipmil: Dan beaivvi du millii badjánit bahás jurdagat, don hutkkat juonaid 11ja dajat: “Mun fallehan rabas eatnama, olbmuid geat ásset muosis ja oadjebassan, almmá muvrraid, poarttaid ja smarttiid haga.” 12Don áiggut váldit sállaša ja rievidit, bajidat gieđa viessobázahasaid vuostá gos olbmot fas ásset, álbmoga vuostá mii lea čohkkejuvvon vieris eatnamiin ja lea fidnen alccesis omiid ja opmodagaid, álbmoga vuostá mii ássá eatnama nábis. 13Saba ja Dedana gávpejasat ja Taršiša veagalaš gávpeolbmát jerret dus: “Bohtetgo don váldit sállaša, čohkkejitgo joavkkuidat rivvet, rievidit silbbaid ja golliid, doalvut omiid ja opmodagaid, váldit stuorra sállaša?”
14Dan dihte, olmmoš, profehtastala ja daja Gogii: Ná cealká Hearrá Ipmil: Daid beivviid go mu álbmot Israel eallá oadjebassan, don čuožžilat, 15vuolggát báikkistat guhkkin davvin. Oktan duinna vulget eatnat álbmogat, riidejeaddjit buohkat, stuorra joavku, áibmadas soahteveahka. 16Don fallehat mu álbmoga Israela ja govččat eatnama balvva láhkái. Boahttevaš beivviid dat dáhpáhuvvá. Mun doalvvun du iežan eatnama vuostá, vai álbmogat ohppet dovdat mu. Dainna maid mun dagan dutnje, Gog, mun čájehan iežan bassivuođa buot álbmogiid oaidnut.
17Ná cealká Hearrá Ipmil: Don leat dat gean birra mun dolin sárdnon iežan bálvaleddjiid, Israela profehtaid, bokte. Sii profehtastalle ahte mun divttán du fallehit Israela. 18Dan beaivvi go Gog falleha Israela eatnama, de buollá mu moarri, cealká Hearrá Ipmil. 19Suhtus, áŋgirvuođas ja buolli moaris mun vuortnun: Dan beaivvi doarggista oppa Israela eanan. 20Mu ovddas doarggistit meara guolit ja almmi lottit, meahcieallit, buot eatnama njoammut ja buot olbmot geat leat eatnama alde. Várit gahččet, bávttit firret ja buot muvrrat moallanit eatnamii. 21Mun gohčun miehki fallehit Goga buot váriinan, cealká Hearrá Ipmil, ja buohkat loktejit miehki guhtet guoimmiset vuostá. 22Mun ollašuhtán Goga duomu. Mun vuolggahan rohttudávdda ja golggahan vara, mun divttán ráššoarvviid, čuorbmasiid ja buolli rišša gahččat su ja su soahtejoavkkuid ala ja daid eatnat álbmogiid ala mat leat su mielde. 23Nu mun čájehan iežan stuorisvuođa ja bassivuođa ja dovddahan iežan eatnat álbmogiidda. Dalle dat ipmirdit ahte mun lean Hearrá.
