Esekiel 45

₁Go dii juogadehpet eatnama opmodahkan, de galgabehtet earuhit eatnamis oaffarattáldahkan Hearrái bassi oasi mii lea guoktelogivihttaduhát állana guhku ja guoktelogiduhát állana govddu. Oppa dat eanan lea bassi. ₂Das gullá tempelii njealječiegat oassi man guhkkodat lea vihttačuođi állana ja govdodat vihttačuođi állana, ja dan birra velá guohtuneanan mii lea vihttalogi állana govddu. ₃Dan eatnamis maid dii lehpet mihtidan, dii galgabehtet mihtidit oasi mii lea guoktelogivihttaduhát állana guhku ja logiduhát állana govddu. Dan báikái boahtá tempel, buot basimus. ₄Dat báiki lea bassi oassi Israela eatnamis. Dat gullá báhpaide geat doaimmahit bálvalusa tempelis, daidda geat ožžot leat Hearrá lahka ja bálvalit su. Dan báikkis leat sin viesut ja sin omiid guohtuneanan. ₅Levilaččaide geat doaimmahit bálvalusa tempelis, galgabehtet addit eatnama mii lea guoktelogivihttaduhát állana guhku ja logiduhát állana govddu. Dohko sidjiide bohtet gávpogat main ássat. ₆Bassi eatnama guoras galgabehtet addit gávpogii eatnama mii lea vihttaduhát állana govddu ja guoktelogivihttaduhát állana guhku. Dat gullá oppa Israela álbmogii. ₇Oaivámužžii galgabehtet addit eatnama mii lea goappáge bealde bassi eatnama ja gávpoga eatnama, rádjálagaid bassi eatnamiin ja gávpoga eatnamiin, oarjjabealde oarjjás ja nuorttabealde nuorttas. Dan guhkkodat galgá leat seammá go čearddaid osiid guhkkodagat oarjerájis nuortarádjái. ₈Dat šaddá oaivámučča eanamin, su opmodahkan Israelis. Mu oaivámuččat eai dalle šat soardde mu álbmoga, muhto addet eatnama buot Israela álbmoga čearddaide.

₉Ná cealká Hearrá Ipmil: Israela oaivámuččat, dál de lea galle! Jávkadehket veahkaválddi ja soardima, dahket dan mii lea riekta ja vuoigat, heitet ádjimis mu álbmoga eret dan iežas opmodagain, cealká Hearrá Ipmil. ₁₀Atnet rivttes veavttaid, rivttes efamihtu ja rivttes batmihtu. ₁₁Efas ja batis galgá leat oktahat mihttu: Bat lea homera logádas ja efage lea homera logádas. Mihtut mearriduvvojit homera mielde. ₁₂Okta šekel galgá leat guoktelogi gera. Logi šekela lea mina viđádas ja vihtta šekela mina logádas. Vihttalogi šekela lea okta mina.

₁₃Dát leat oaffarattáldagat maid dii galgabehtet addit: Efaguđádas nisut ain homera ja efaguđádas bivggit ain homera nammii. ₁₄Oljju galgá addit ovtta batlogádasa kora nammii. Homer geassá logi bata. ₁₅Israela sogat galget addit smávvaomiin ovtta sávzza ain guovttečuođi sávzza nammii borramušoaffarin, boaldinoaffarin ja searvevuođaoaffarin maiguin doaimmahuvvo soabahus álbmogii, cealká Hearrá Ipmil. ₁₆Buot eatnama olbmot leat geatnegasat buktit dán oaffarattáldaga Israela oaivámužžii. ₁₇Oaivámuš galgá atnit fuola boaldinoaffaris, borramušoaffaris ja juhkamušoaffaris bassebeivviid, mánočalbmebeivviid ja sabbahiid ja buot israellaččaid feasttaid. Son galgá skáhppot suddooaffara, borramušoaffara, boaldinoaffara ja searvevuođaoaffara maiguin israellaččaide doaimmahuvvo soabahus.

₁₈Ná cealká Hearrá Ipmil: Vuosttas mánu vuosttaš beaivvi galgabehtet oaffaruššat nuorra vuovssá mii lea almmá vigi haga, ja nu buhtistit tempela. ₁₉Báhppa galgá váldit suddooaffara vara ja sihkkut dan tempela uksabealláide, áltárstealli njealji čihkii ja siskkit ovdašilju poartta uksabealláide. ₂₀Mánu čihččet beaivvi galgabehtet dahkat seammá láhkái dan olbmo ovddas gii lea suddudan dáhtokeahttá dahje diehtemeahttunvuođas. Nu dii doaimmahehpet soabahusa tempelii.

₂₁Vuosttas mánu njealljenuppelogát beaivvi galgabehtet doallat beassážiid, čiežabeaivásaš basiid. Čieža beaivvi dii galgabehtet borrat suvrutkeahtes láibbi. ₂₂Oaivámuš galgá addit dan beaivvi vuovssá suddooaffarin iežas ovddas ja eatnama olbmuid ovddas. ₂₃Basiid čieža beaivvi son galgá juohke beaivvi oaffaruššat boaldinoaffarin Hearrái čieža vuovssá mat leat almmá vigi haga, ja čieža viercca mat leat almmá vigi haga, ja suddooaffarin son galgá juohke beaivvi oaffaruššat bohká. ₂₄Borramušoaffarin son galgá oaffaruššat ovtta efa jáffuid juohke vuovssá nammii ja ovtta efa jáffuid juohke viercca nammii, ja vel ovtta hina oljju juohke efa nammii. ₂₅Čihččet mánu vihttanuppelogát beaivvi, bassebeaivvi, son galgá oaffaruššat suddooaffariid, boaldinoaffariid, borramušoaffariid ja oljju seammá ollu go oppa dan čieža beaivvis.