Galatia 2

₁Njealljenuppelohkái jagi maŋŋil mun mannen fas Jerusalemii Barnabasain ja válden maiddái Titusa fárrui. ₂Mun mannen dohko Ipmila almmustusa geažil. Doppe mun čilgejin iešguhtiige, erenoamážit sidjiide geat adnojuvvojedje alla árvvus, dan evangeliuma maid mun sárdnidan báhkiniid gaskkas. Dasgo in dáhtton ahte viegašin dahje livččen viehkan duššás. ₃Muhto ii velá mu mátkeguoibmi Titusge, gii lea greikalaš, bággejuvvon birračuohpahit iežas. ₄Muhto min searvái ledje boahtán muhtun vearrevieljat iskkadit dan friddjavuođa mii mis lea Kristus Jesusis, vai beasašedje dahkat min šlávvan. ₅Muhto mii eat vuollánan sin dáhttui eat veahášge, vai evangeliuma duohtavuohta bisuhuvvo din gaskkas.

₆Dat olbmot geat doppe adnojuvvojedje árvvus – mat sii ležžet leamaš, dat ii guoskka munnje, dasgo Ipmil ii geahča olbmo hápmái – dat olbmot eai gáibidan mus maidege eambbo. ₇Sii baicca ipmirdedje ahte munnje lei oskkilduvvon evangeliuma sárdnideapmi birračuohpatkeahtes olbmuide, nugo Peterii lei oskkilduvvon evangeliuma sárdnideapmi birračuhppojuvvon olbmuide. ₈Dasgo son guhte dagai Petera apostalin daidda geat leat birračuhppojuvvon, son dagai maiddái mu apostalin báhkiniidda.

₉Go Jakob, Kefas ja Johannes, geat adnojuvvojedje searvegotti doarjjan, áddejedje makkár doaimma Ipmil árpmustis lei munnje addán, de sii adde gieđa munnuide Barnabasain searvevuođa mearkan: Moai galggaime mannat báhkiniid lusa, sii daid lusa geat leat birračuhppojuvvon. ₁₀Moai galggaime dušše muitit sin gefiid, ja dan mun lean álelassii áŋgiruššan dahkat.

₁₁Go Kefas dasto bođii Antiokiai, de mun cuiggodin su almmolaččat, danne go son lei meannudan boastut. ₁₂Ovdal go soapmásat bohte Jakoba luhtte, de son boradii báhkiniiguin. Muhto go sii bohte, de son geassádii báhkiniid searvvis, danne go son balai sis geat ledje birračuhppojuvvon. ₁₃Seammá ládje guoktiluššagohte maid eará juvddálaččat, ja velá Barnabasge rohttašuvai sin guoktilašvuhtii. ₁₄Muhto go mun oidnen ahte sin dagut eai lean evangeliuma duohtavuođa mielde, de mun dadjen Kefasii buohkaid gullut: “Jos don juvddálažžan sáhtát hilgut juvddálaččaid vieruid ja eallit báhkiniid láhkái, de manne don de bágget báhkiniid eallit juvddálaččaid láhkái?”

₁₅Mii leat riegádan juvddálažžan, eat mii leat suttolaš báhkinat. ₁₆Muhto mii diehtit ahte olmmoš ii šatta vanhurskkisin Ipmila muođuid ovddas lága daguid dihte, aivvefal oskkus Jesus Kristusii. Danne miige leat dorvvastan Kristus Jesusii, vai mii šaddat vanhurskkisin oskkus Kristusii, eatge lága daguid dihte. Dasgo ii oktage olmmoš šatta vanhurskkisin lága daguid dihte.

₁₇Muhto jos maiddái mii geat viggat šaddat vanhurskkisin Kristusis, gávnnahuvvot suttolažžan, de leago dalle Kristus suttu bálvaleaddji? Ii eisege! ₁₈Easkka jos mun huksegoađán ođđasis dan maid lean gaikkodan, de mun dagan iežan láhkarihkkun. ₁₉Mun lean lága bokte jápmán lágas eret, vai mun beasan eallit Ipmilii. Mun lean russiinávlejuvvon Kristusiin, ₂₀mun in eale šat ieš, muhto Kristus eallá mu siste. Dan eallima maid mun vel ealán dán rupmašis, mun ealán oskkus Ipmila Bárdnái guhte ráhkistii mu ja attii heakkas mu ovddas. ₂₁Mun in daga duššin Ipmila árpmu. Dasgo jos láhka sáhtášii addit vanhurskkisvuođa, de Kristus lea jápmán duššás.