Galatia 6

₁Vieljat, jos muhtin gávnnahallá dahkamis veriid, de dii geaid Vuoigŋa oahpista, galgabehtet bagadit su láđđásit, ja várut vai ieš it šatta geahččalussii. ₂Guddet guhtet guimmiideattet nođiid, de ollašuhttibehtet Kristusa lága. ₃Dat gii navdá iežas maninge, vaikko ii leat mihkkege, beahttá iežas. ₄Guorahallos juohkehaš iežas daguid. Dalle son oažžu rámi das maid ieš dahká, iige das maid earát leat dahkan. ₅Juohkehaš galgá guoddit iežas noađi.

₆Dat geasa oahpahuvvo Ipmila sátni, galgá juogadit buot buriid dainna gii su oahpaha. ₇Allet čádjádala! Ipmil ii divtte iežas bilkiduvvot. Dat maid olmmoš gilvá, dan son maid láddje. ₈Dat gii gilvá oažžásis, láddje oaččis heavahusa, muhto dat gii gilvá Vuigŋii, láddje agálaš eallima Vuoiŋŋas. ₉Allot váibba dahkamis buriid, dasgo jos eat váibba, de mii beassat láddjet go áigi lea dievvan. ₁₀Dahkkot buriid buohkaide go vel lea áigi, ja áinnas oskkuvieljaide.

₁₁Gehččet man stuorra bustávaiguin mun čálán didjiide iežan gieđain! ₁₂Dat geat dáhttot adnojuvvot árvvus olbmuid gaskkas, bággejit din birračuhppojuvvot dušše danin vai eai doarrádallojuvvoše Kristusa ruossa dihte. ₁₃Sii geat diktet iežaset birračuhppojuvvot, eai doala iežage lága, muhto sii dáhttot din birračuohpahit iežadet, vai besset rámádallat das mii didjiide lea dahkkojuvvon. ₁₄Muhto mun in goassege dáhto rámádallat earás go min Hearrá Jesus Kristusa ruossa dihte, gean bokte máilbmi lea russiinávlejuvvon munnje ja mun máilbmái. ₁₅Birračuohpahus dahje ovdaliiki ii leat mihkkege, muhto ođđa sivdnádus. ₁₆Ráfi ja váibmoláđisvuohta lehkos sidjiide geat ellet dán njuolggadusa mielde, ja Ipmila Israelii!

₁₇Dás maŋŋil ii oktage oaččo šat váivvidit mu, dasgo mus leat Jesusa mearkkat rupmašis.

₁₈Vieljat, min Hearrá Jesus Kristusa árbmu lehkos din vuoiŋŋain! Amen.