1. Mosesgirji 23

₁Sara elii čuođiguoktelogičiežajahkásažžan; dat lei su eallináigi. ₂Sara jámii Kirjat Arbai dahjege Hebronii Kanaana eatnamii. Abraham doalai doppe Sarai váidalusaid ja čierui su. ₃Dasto Abraham vulggii jábmi luhtte, manai sárdnut hetlaččaiguin ja dajai: ₄“Mun ásan vierisin din gaskkas. Diktet mu oastit eananbihtá hávdesadjin, vai beasan hávdádit iežan jábmi.” ₅Hetlaččat vástidedje Abrahamii: ₆“Hearrá, don leat Ipmila oaivámuš min gaskkas! Hávdát iežat jábmi min buoremus hávdesadjái. Ii oktage mis biehttal addimis dutnje iežas hávdesaji du jábmi hávdin.”

₇Abraham giittii dan guovllu hetlaččaid ja gopmirdii eatnamii muođuid, ₈muhto dajai vel sidjiide: “Jos dii suovvabehtet mu hávdádit iežan jábmi deike, de mun siđan din sárdnut mu beales Efronii, Sohara bárdnái, ₉vai son diktá mu oažžut Makpela bákteráiggi, mii gullá sutnje ja lea su eatnamiid ravddas. Mun oasttán dan sus olles haddái, vai mun oaččun hávddi din gaskii.” ₁₀Efron lei čohkkámin eará hetlaččaid gaskkas gávpotpoarttas, ja son vástidii Abrahamii buot hetlaččaid gullut: ₁₁“Hearrán, guldal mu! Mun attán dutnje gietti ja bákteráiggi mii lea das. Iežan álbmoga olbmuid oaidnut mun attán dan dutnje. Hávdát iežat jábmi!”

₁₂Abraham gopmirdii eatnama álbmogii ₁₃ja dajai Efronii buohkaid gullut: “Vare don guldalivččet mu! Mun attán dutnje mávssu dan giettis, vuovdde dan munnje ja divtte mu hávdádit dohko iežan jábmi.” ₁₄Efron vástidii Abrahamii: ₁₅“Hearrán, guldal mu! Eanan man árvu lea njeallječuođi šekela silbba – mii dat lea munnuide! Hávdát áhkát.” ₁₆Abraham gulai Efrona sániid ja vihkkii sutnje dan silbba maid Efron lei namahan hetlaččaid gullut, njeallječuođi šekela, dan deattu mielde maid gávpeolbmát atnet.

₁₇Nu Makpela gieddi Mamre olggobealde, dat mii gulai Efronii, gieddi ja bákteráigi mii lei doppe ja buot muorat mat šadde eatnamis, dat šattai Abrahama opmodahkan. ₁₈Dát dáhpáhuvai buot hetlaččaid gullut, buohkaid geat čohkkájedje gávpotpoarttas.

₁₉Dasto Abraham hávdádii áhkás Sara Makpela gietti bákteráigái mii lea Mamre dahjege Hebrona lahka Kanaanis. ₂₀Nu šattai gieddi ja bákteráigi mii lea das Abrahama opmodahkan ja hávdesadjin. Son osttii dan hetlaččain.