Ávžžuhus hukset tempela
1Gonagas Dareiosa nuppi ráđđenjagi guđát mánus, mánu vuosttaš beaivvi, profehta Haggai almmuhii Hearrá sáni Juda eatnanhearrái Serubbabelii, Šealtiela bárdnái, ja bajimusbáhppa Josuai, Jehosadaka bárdnái. Hearrá sátni lei dákkár:
2“Ná cealká Hearrá, Almmiveagaid Ipmil: Dát álbmot dadjá ahte ii leat velá boahtán áigi hukset Hearrá tempela.” 3De profehta Haggai almmuhii Hearrá sáni: 4Leago dál áigi din ássat skoađastuvvon viesuin, dan botta go mu viessu lea čievračopman? 5Ná cealká Hearrá, Almmiveagaid Ipmil: Gehččet, mo didjiide lea geavvan!
6Dii gilvibehtet ollu
muhto láddjebehtet unnán,
dii borrabehtet muhto ehpet gallán,
dii juhkabehtet muhto ehpet ilosmuva,
dii gárvodehpet muhto ehpet biva.
Ja beaivebálkkolaš
bidjá bálkkás ráigebursii.
7Ná cealká Hearrá, Almmiveagaid Ipmil: Gehččet, mo didjiide lea geavvan! 8Gorgŋot váriide, vižžet hirssaid ja huksejehket mu viesu, de mun liikon dasa ja deavddán dan hearvásvuođainan, cealká Hearrá. 9Dii vuordibehtet ollu muhto oažžubehtet unnán. Dii rádjabehtet šattu muhto mun bosádan dan eret. Manne? jearrá Hearrá, Almmiveagaid Ipmil. Danne go mu tempel lea čievračopman, dan botta go dis lea hoahppu bargat juohkehaččas iežadet viesu bargguid.
10Dan dihte albmi lea dahppasan
iige atte suolnni,
ja eanan doalaha šattus.
11Mun lean rávkan jaŋádaga
eatnamii ja váriide,
gordnái, viidnái ja oljui,
buot dasa maid eanan šaddada,
olbmuide ja omiide
ja buot din gieđaid bargui.
12Serubbabel, Šealtiela bárdni, ja bajimusbáhppa Josua, Jehosadaka bárdni, ja buohkat geat ledje álbmogis báhcán, gulle Hearrá, Ipmileaset, ávžžuhusa maid profehta Haggai sártnui nugo Hearrá lei gohččon. Dalle álbmot balai Hearrás. 13Haggai, Hearrá áirras, gulahii álbmogii Hearrá sáni: “Mun lean dinguin, cealká Hearrá.”
14Hearrá movttiidahtii Juda eatnanhearrá Serubbabela, Šealtiela bártni, ja bajimusbáhppa Josua, Jehosadaka bártni, ja buohkaid geat ledje álbmogis báhcán, nu ahte sii čoagganedje hukset Ipmileaset, Hearrá, Almmiveagaid Ipmila, tempela. 15Sii álggahedje bargguid gonagas Dareiosa nuppi ráđđenjagi guđát mánus, mánu guokteloginjealját beaivvi.
