Ipmil lea sárdnon Bártnis bokte
1Ipmil lea máŋgii ja máŋgga láhkái dolin sárdnon min áhčiide profehtaid bokte, 2muhto dál, dáin maŋimuš beivviin, son lea sárdnon midjiide Bártnis bokte, gean son lea bidjan árbet buot ja gean bokte son lea maiddái sivdnidan máilmmi. 3Bárdni lea Ipmila hearvásvuođa čuovgadas ja su luonddu duohta govva, ja fámolaš sániinis son bisuha buot. Go son lei buhtistan min suttuin, de son lea allagasas čohkánan truvdnosis Allatvuođa olgeš beallái.
Ipmila Bárdni lea stuorit go eŋgelat
4Nu son lea šaddan dađe sakka oaivábun go eŋgelat go su árben namma lea hearváseabbo go eŋgeliid namat. 5Ii Ipmil leat goassege cealkán guđege eŋgelii:
Don leat mu bárdni,
mun lean riegádahttán du odne,
dahje:
Mun lean su áhčči,
ja son lea mu bárdni.
6Ja go Ipmil fastain buktá vuosttašriegádeaddjis máilbmái, de son cealká:
Gopmirdehkoset su buot Ipmila eŋgelat.
7Eŋgeliid birra son cealká:
Son dahká eŋgeliiddis bieggan
ja bálvaleddjiidis dollanjuovččan.
8Muhto Bártnis birra son cealká:
Ipmil, du truvdnu bissu agálašvuhtii,
ja du gonagassoabbi lea vuoigatvuođa soabbi.
9Don ráhkistit vuoigatvuođa
ja vašuhit vearrivuođa.
Dan dihte Ipmil, du Ipmil, lea vuoidan du
ilu oljjuin, du, ii du guimmiid.
10Ja maiddái ná:
Don, Hearrá, leat álggus bidjan eatnama vuođđudusaid,
ja almmit leat du gieđaid duojit.
11Dat duššet, muhto don bisut.
Dat nohket buot nugo bivttas,
12don giesat daid čoahkkái nugo oalgebiktasa,
dat molsojuvvojit nugo gárvu.
Muhto don leat seammá agálaččat,
du jagit eai noga.
13Ipmil ii leat goassege cealkán guđege eŋgelii:
Čohkán mu olgeš beallái,
de mun bijan du vašálaččaid
du julggiid vuolušin.
14Almma buot eŋgelat leat bálvaleaddji vuoiŋŋat? Sii vuolggahuvvojit bálvalit daid geat árbejit ávdugasvuođa.
