Hebrea 6

₁Guđđot dan dihte Kristusa oahpa álgooaivadusaid ja ovdánehkot ollis dihtui. Mii eat sáhte šat ođđasit bidjat vuođđudusa ja oahpahit dakkár áššiid go jorgalus daguin mat dolvot jápmimii, osku Ipmilii, ₂oahppa gásttain ja gieđaid badjeliibidjamis, jábmiid bajásčuožžileapmi ja agálaš duopmu. ₃Jos Ipmil sálle, de mii mannat ovddos.

₄Veadjemeahttun lea veahkehit daid geat oktii leat čuvgejuvvon, máistán almmálaš attáldaga ja šaddan servvolažžan Bassi Vuigŋii, ₅muosáhan Ipmila buori sáni ja vásihan boahtti máilmmi fámuid ₆muhto de hilgon iežas oskku. Ii sin sáhte ođđasit oahpistit jorgalussii, daid geat dál ieža russiinávlejit Ipmila Bártni ja dahket su bogostahkan.

₇Jos bealdu juhká arvvi mii dan dávjá njuoskada ja addá šattu dasa gii gilvá, de dat oažžu Ipmila buressivdnádusa. ₈Muhto jos dat šaddada bastilislánjáid ja gáskálasaid, de dat ii dohkke masage. Fargga dan oassin lea garuhus, ja maŋimuš dat boldojuvvo.

₉Dii, ráhkis ustibat, lehpet goittotge dat buoret bealdu, ja din vuordá bestojupmi. Mun lean dasa vissis, vaikko sártnunge ná. ₁₀Ipmil ii leat vuoigatmeahttun, ii son vajáldahte dan maid lehpet dahkan, iige dan ráhkisvuođa maid lehpet čájehan su nammii, go lehpet bálvalan su bassi olbmuid ja ain sin bálvalehpet. ₁₁Mun dušše sávan ahte dis juohkehaš dáhttu loahpa rádjái seammá áŋgirit vásihit dan go min oktasaš doaivu ollašuvvá. ₁₂Allet šatta hilljánin, muhto baicca vigget leat daid láhkásaččat geat leat oskon ja vuordán gierdavaččat ja dan dihte árbejit dan maid Ipmil lea lohpidan.

₁₃Go Ipmil attii lohpádusa Abrahamii, de son vuortnui iežas nammii, danne go ii lean oktage stuorit gean nammii son livččii sáhttán vuordnut. ₁₄Son lohpidii: Duođaid, mun buressivdnidan du valljugasat ja lassánahtán du náli. ₁₅Go Abraham lei vuordán gierdavaččat, de son jovssai dan mii sutnje lei lohpiduvvon.

₁₆Olbmot vurdnot muhtuma nammii gii lea stuorit go sii ieža; válli nanne ášši ja loahpaha buot nákkuid. ₁₇Dan dihte maiddái Ipmil nannii iežas lohpádusa váliin. Son dáhtui čielgasit čájehit daidda geaidda lohpádus guoská, ahte su mearrádus ii nuppástuva. ₁₈Lohpádusain ja váliin, guvttiin nuppástuvakeahtes áššiin main son, Ipmil, ii sáhte gielástallat, son dáhtui roahkasmahttit min geat leat báhtaran su dorvui, ja arvvosmahttit min doallat gitta dan doaivvus mii lea min ovddas. ₁₉Dat doaivu lea min sielu oadjebas ja nana áŋkor. Dat ollá gitta ovdaloavdaga siskkobeallái ₂₀gosa Jesus lea mannan min ovddasmannin, go son lei šaddan bajimusbáhppan Melkisedeka láhkái agálaš áigái.