Jesaja 1

₂Gula, albmi, guldal, eanan!

Hearrá sárdnu:

Mánáid mun bibmen ja dikšon,

muhto sii leat jorgalan mus eret.

₃Vuoksá dovdá eaiggádis

ja ásen isidis kruppá,

muhto Israel ii dovdda,

mu álbmot ii ipmir.

₄Vuoi suttolaš álbmoga,

soga maid suddovealgi losidahttá,

bahádahkkiid bearraša,

billašuvvan mánáid!

Sii leat hilgon Hearrá,

badjelgeahččan Israela Basi

ja jorgalan sutnje sealggi.

₅Ehpetgo dii leat doarvái cábmojuvvon,

go velá nággáruššabehtet?

Oaivi lea hávváduvvan,

váibmu cuovkanan.

₆Juolgevuođus gitta oaivečohkkii

ii leat mihkkege dearvašiid,

dušše guvhllit ja árbbat ja rabas hávit.

Dat eai leat bohččojuvvon,

eai čadnojuvvon

eaige oljjuin luvvaduvvon.

₇Din eanan lea ávdin,

din gávpogat leat boldojuvvon,

dii oaidnibehtet vierroolbmuid borramin

iežadet eatnama šattuid.

Dat lea heavahus,

dego dalle go Sodoma duššaduvvui.

₈Dušše nieida Sion lea báhcán

dego viidnegárddi lastagoahti,

dego gurkábealddu fáktengoahti,

dego birastahttojuvvon gávpot.

₉Jos Hearrá, Almmiveagaid Ipmil,

ii livčče guođđán mis bázahasa,

de mii livččiimet dego Sodoma,

mii livččiimet šaddan

Gomorra láhkásažžan.

₁₀Gullet Hearrá sáni,

Sodoma oaivámuččat,

guldal min Ipmila sárdnuma,

Gomorra álbmot!

₁₁Maid mun dagan

buot din njuovvanoaffariiguin,

cealká Hearrá.

Mun lean gallánan

boaldinoaffarvierccain

ja buoiduduvvon gálbbiid buoiddis,

mus ii leat hállu vuovssáid ja lábbáid

ja bohkáid varrii.

₁₂Gii lea dáhtton dis dakkáriid

ja duolbmat mu ovdašiljuid,

go boahtibehtet mu muođuid ovdii?

₁₃Allet šat buvtte duššálaš attáldagaid,

mun fasttášan oaffarsuova.

Mánočalbmebeaivi, sabbat,

bassi čoakkalmasat –

mun in gierdda din basiid

ja din vearrivuođa.

₁₄Mun vašuhan din

mánočalbmebeaivvi meanuid

ja basiid.

Dat leat šaddan munnje noađđin,

mun lean váiban dan guoddimis.

₁₅Go dii bajidehpet gieđaid rohkadussii,

de mun čiegan čalmmiidan dis.

Vaikko dii rohkadallabehtetge ollu,

de mun in gula.

Din gieđat leat varranaga.

₁₆Basadehket, buhtistehket iežadet!

Jávkadehket bahás daguideattet

mu čalmmiid ovddas.

Heitet dahkamis bahá

₁₇ja ohppet dahkat buriid!

Ohcet dan mii lea riekta,

bealuštehket dan gii sordojuvvo,

rábidehket oarbásii vuoigatvuođa,

čuoččuhehket leaskkaid ášši.

₁₈Čielggadehkot áššámet,

cealká Hearrá.

Vaikko din suttut leat varraruoksadat,

de dat šaddet čeaskadin dego muohta,

vaikko dat leat purpurruoksadat,

de dat šaddet vielgadin dego ullu.

₁₉Jos dii lehpet miehtásat

ja gullabehtet,

de beassabehtet návddašit

eatnama buriid,

₂₀muhto jos lehpet nággárat

ja ceaggát,

de miehkki loaktá din.

Hearrá lea sárdnon.

₂₁Vuoi, oskkáldas gávpot

lea šaddan fuorrán!

Dan dievva lei vuoigatlašvuohta,

vanhurskkisvuohta orui doppe –

dál doppe ásset sorbmejeaddjit.

₂₂Du silbbat leat šaddan skártan,

du viidni lea čáziin veahttaduvvon.

₂₃Du vuostehágolaš oaivámuččat

leat suollagiid guoimmit,

sii ráhkistit duolgguid

ja váinnuhit attáldagaid.

Eai sii veahket oarbásiid

oažžut vuoigatvuođa

eaige gozit leaskkaid ášši.

₂₄Dan dihte cealká Hearrá,

Almmiveagaid Ipmil,

Israela Veagalaš:

Vuoi sin! Mun divttán moari

deaividit vuostálastiidan

ja mávssahan vašálaččaidasan.

₂₅Mun bajidan gieđa du vuostá.

Mun boalddán buot

du buhtismeahttunvuođa

ja jávkadan gutnasálttiin du skártta.

₂₆Mun attán dutnje dakkár duopmáriid

dego ovdal,

dakkár ráđđeaddiid nugo dološ áiggiid.

Dalle don gohčoduvvot

vanhurskkisvuođa ladnin,

oskkáldas gávpogin.

₂₇Vuoigatvuođain Sion bestojuvvo,

vanhurskkisvuođain

dat geat ásset doppe.

₂₈Muhto vearredahkkit

ja suttolaččat cuvkejuvvojit,

dat geat behttet Hearrá, duššet.

₂₉Dalle dii heahpanehpet

terebinttaid dihte

mat ledje din hálidus,

ja beahtahallabehtet muorragárddiide

maid ráhkistehpet.

₃₀Dalle dii lehpet dego terebinta

mas leat goldnan lasttat,

dego muorragárdi gos ii leat čáhci.

₃₁Gievra šaddá nuovvin

ja su dahku čuonamin.

Ovttas dat bullet,

iige leat čáskadeaddji.