Jesaja 15

Heavahusa ija Ar-Moab

duššaduvvui.

Duođaid, heavahusa ija Kir-Moab

duššaduvvui.

₂Dibona olbmot mannet

oaffarbáikkiide čierrut.

Nebos ja Medebas gullo moablaččaid áŋken.

Juohkehačča oaivečohkka lea ráhkejuvvon,

buohkaid skávžžát leat čuhppojuvvon.

₃Gáhtain sii vázzet horsta gárvun,

dáhkiin ja šiljuin gullo luoibman,

gatnjalat golget.

₄Hešbon ja Elale luibmet,

gitta Jahasii gullo daid čuorvvas.

Dan dihte Moab doarggista

ja dárpmehuvvá.

₅Mu váibmu vuobaida Moaba geažil.

Báhtareaddjit bohtet Soarii

ja Eglat Šelišiai.

Luhita gorgŋehaga olbmot vázzet čieru,

Horonajima geainnus

sii váidalit heavahusa.

₆Nimrima čázit šaddet jakŋan eanamin,

rássi goiká, niitu goldná,

ii leat mihkkege ruotnasiid.

₇Buot maid sii leat duksen,

buot dávviriiddiset

sii dolvot Sieđgajoga rastá.

₈Luoibman gullo miehtá oppa Moaba,

váidalusčuorvasat ollejit Eglajimii,

velá gitta Beer Elima rádjái.

₉Dimona čázit varahuvvet.

Ođđa givssiid mun vuolggahan Dimonii,

ledjona Moaba sestojuvvon

olbmuid vuostá,

Adma bázahasa vuostá.