Jesaja 36

₁Gonagas Hiskia njealljenuppelogát ráđđenjagi Assyria gonagas Sanherib fallehii Juda ladnegávpogiid ja válddii daid. ₂Lakišis son vuolggahii soahteveagaidis oaivámučča oktan stuorra soahteveagain Jerusalemii muitalit gonagas Hiskiai sága. Soahteveagaid oaivámuš bisánii Bajitáldá čáhcerenne buohta, Dállengietti geainnu gurrii. ₃Šloahttaoaivámuš Eljakim, Hilkia bárdni, manai su ovddal oktan riikkačálli Šebnain ja gonagasa čálliin Joahiin, Asafa bártniin. ₄Dalle soahteveagaid oaivámuš dajai sidjiide: Dadjet Hiskiai: Ná cealká stuorra gonagas, Assyria gonagas: Manne don leat nu oadjebas? ₅Gáttátgo sániid dohkket soađis seammá bures go viisodaga ja fámu? Geasa don dorvvastat, go leat stuibmidan mu vuostá? ₆Don gusto dorvvastat Egyptii, dan doddjon soabbái mii čuoggasa gihtii ja rehtte dan gii dorje dasa. Dakkár lea farao, Egypta gonagas, buohkaide geat luhttet sutnje. ₇Vai vástidatgo don munnje: “Mii dorvvastit Hearrái, Ipmilasamet”? Muhto su oaffarbáikkiid ja áltáriid Hiskia lea jávkadan. Almma din iežadet gonagas dajai Juda ja Jerusalema ássiide: “Dušše dán áltára ovddas dii oažžubehtet rohkadallat Hearrá”? – ₈Veahtal dál mu hearráin, Assyria gonagasain: Son addá dutnje guokteduhát heastta, jos don veaját skáhppot daidda riidejeddjiid. ₉Mo don sáhtášit bihtit ovttasge mu hearrá uhcimus bálvaleddjiin? Ja don dorvvastat Egypta vovnnaide ja heasttaide! ₁₀Leango mun mahkáš boahtán fallehit ja duššadit dán eatnama Hearrá dáhtu vuostá? Hearrá ieš celkkii munnje: “Fallet dan eatnama ja duššat dan.”

₁₁Eljakim, Šebna ja Joah dadje soahteveagaid oaivámužžii: “Sártno bálvaleddjiidasat arameagillii, miihan áddet dan. Ale sártno midjiide judagillii daid olbmuid gullut geat leat čuožžumin muvrra alde.” ₁₂Muhto soahteveagaid oaivámuš vástidii: “Gáttátgo don ahte mu hearrá lea vuolggahan mu sárdnut dáid sániid dušše dutnje ja du hearrái? Seammá bures dat leat daidda olbmuide geat leat čohkkámin muvrra alde, daidda geat gártet ovttas dinguin fargga borrat iežaset baikka ja juhkat iežaset gočča.” ₁₃Soahteveagaid oaivámuš loaiddastii ovdan ja čuorvvui alla jienain judagillii: “Gullet maid stuorra gonagas, Assyria gonagas, cealká: ₁₄Ná cealká gonagas: Allet fillehala Hiskiai, son ii sáhte gádjut din. ₁₅Allet divtte Hiskia hálahit din dorvvastit Hearrái ja jáhkihit didjiide ahte Hearrá gádju din ja ahte dát gávpot ii gahča Assyria gonagasa gihtii. ₁₆Allet guldal Hiskia! Ná cealká Assyria gonagas: Dahket muinna ráfi ja vuollánehket munnje, de juohkehaš beassá borrat iežas viidnemuora ja fiikonmuora šaddosiid ja juhkat iežas gáivvo čázi, ₁₇dassážii go mun boađán ja doalvvun din eatnamii mii lea din iežadet eatnama láhkásaš, gortni ja viinni eatnamii, láibbi ja viidnegárddiid eatnamii. ₁₈Allet divtte Hiskia dájuhit din, go son dadjá: ‘Hearrá gádju min’! Leatgo eará álbmogiid ipmilat gádjon iežaset eatnamiid Assyria gonagasa gieđas? ₁₉Gos leat dál Hamata ja Arpada ipmilat, ja gos leat Sefarvajima ipmilat? Leago oktage ipmil gádjon Samaria mu gieđas? ₂₀Guhtemuš buot dáid eatnamiid ipmiliin lea gádjon iežas eatnama mu gieđas, go dii jáhkkibehtet ahte Hearrá gádju Jerusalema mu gieđas?” ₂₁Muhto sii orro jávohaga eaige vástidan sutnje, danin go gonagas lei gieldán sin vástideames.

₂₂De šloahttaoaivámuš Eljakim, Hilkia bárdni, riikkačálli Šebna ja gonagasa čálli Joah, Asafa bárdni, gaikkodedje biktasiid ja máhcce Hiskia lusa muitalit maid soahteveagaid oaivámuš lei dadjan.