Jesaja 63

₁Gii lea dat gii boahtá Edomis,

dat gii boahtá Bosras

rukses biktasat gárvun,

gii lea dat hearvásit gárvodan olmmái

gii manná ovddos stuorra fámuin?

Mun dat lean, mun gii sárdnidan

vuoigatvuođa,

mun geas lea fápmu beastit.

₂Manne du gárvvut

leat nu ruoksadat,

du biktasat dego

viidnemuorjeduolbmi biktasat?

₃Mun dulbmen

viidnebohčingári, mun okto,

álbmogiin ii oktage veahkehan mu.

Nu mun moaristan dulbmen daid buot

ja suhtustan cuvkejin daid,

nu ahte daid sáhppi rišaidii

mu gárvvuid njeaiga

ja durddidii buot mu biktasiid.

₄Mun ledjen mearridan

mávssaheami beaivvi,

lonisteami jahki lei boahtán.

₅Mun gehččen birra,

muhto ii oktage veahkehan,

mun hirpmástuvven

go ii oktage boahtán munnje doarjjan.

Dalle mu gievravuohta veahkehii mu,

mu iežan suhttu attii munnje doarjaga.

₆Nu mun dulbmen álbmogiid moaristan,

cuvkejin daid suhtustan

ja dikten daid sáhpi golgat eatnamii.

₇Mun dáhtun gulahit

Hearrá ráhkisvuođa,

máidnut Hearrá buot das

maid son lea dahkan midjiide,

mun máinnun su stuorra buorrevuođa

Israela guovdu,

buot maid son lea dahkan,

son gii lea oskkáldas

ja árkkálmastá álo.

₈Son celkkii: “Siihan leat mu álbmot,

mu mánát geat eai goassege beahte.”

Dan dihte son šattai sin beastin,

₉son besttii sin buot áŧestusain.

Ii sin beastán áirras, ii eŋgel,

muhto son ieš besttii sin,

ráhkisvuođastis son árkkálmasttii

ja lonistii sin friddjan,

son loktii ja guttii sin buot vássán beivviid.

₁₀Muhto sii ledje vuostehágolaččat

ja moraštahte su bassi vuoiŋŋa,

ja son šattai sin vašálažžan,

son ieš soađai singuin.

₁₁Dalle sii muite vássán beivviid,

muite Mosesa, su bálvaleaddji,

ja jerre: Gos lea son gii loktii čázis

báimmana iežas ellui?

Gos lea son gii bijai

su raddái iežas bassi vuoiŋŋa?

₁₂Gos lea son gii divttii hearvás fámus

mannat Mosesa olgeš gieđa bealde,

luddii čázi álbmoga ovddas

ja dagai alccesis agálaš nama,

₁₃son gii doalvvui sin čiekŋalasa čađa

nugo heastta meahcis, guossalkeahttá?

₁₄Nugo oamit njidjet vulos leahkái,

nu álbmot maid Hearrá vuoigŋa láidii,

luoitádii ráfis vuoiŋŋastit.

Nu don láidejit iežat álbmoga

ja dahket alccesat hearvás nama.

₁₅Geahča almmis,

geahča bassi, hearvás viesustat!

Gos lea du buolli áŋgirvuohta

ja du fápmu?

Don doalahat mus iežat

gierisvuođa ja árpmu.

₁₆Donhan leat min áhčči.

Ii Abraham dieđe mis maidege

iige Israel dovdda min.

Don, Hearrá, leat min áhčči,

Min lonisteaddji lea du namma

juo doložis.

₁₇Hearrá, manne don divttát

min čádjidit ja hilgut du geainnuid?

Manne don garradat min váimmuid,

nu ahte mii eat bala dus?

Máhca bálvaleddjiidat dihte,

álbmogat čearddaid dihte

mat leat du opmodat!

₁₈Manne besset ipmilmeahttumat

loaiddastit du bassibáikái,

manne min vašálaččat

besset duolbmat du tempela?

₁₉Mii leat dego don it goassege

livčče leamaš min ráđđejeaddji,

dego du namma ii goassege livčče

namahuvvon min badjel.