Jesaja 9

₂Álbmot mii vádjola seavdnjadasas,

oaidná stuorra čuovgasa.

Daidda geat ásset jápminsuoivana eatnamis,

suonjarda čuovga.

₃Don divttát ávu badjánit,

don dagat ilu stuorisin.

Sii illudit du muođuid ovddas

nugo illuduvvo lájuid áigge,

nugo ávvuduvvo sállaša juogadeames.

₄Geassá mii dettii sin hárduid,

gevrejeaddji soappi don leat doadján

dego dan beaivvi go Midjan cuvkejuvvui.

₅Juohke soahtegáma mii adnojuvvui soađis,

juohke oalgebivttas mii durddui varrii,

boldojuvvo,

dat šaddet dola loaktámuššan.

₆Dasgo mánná lea riegádan midjiide,

bárdni lea addojuvvon midjiide.

Váldi lea biddjojuvvon su olggiid ala,

ja su namma lea

Ovddolaš Ráđđeaddi, Veagalaš Ipmil,

Agálaš Áhčči, Ráfioaivámuš.

₇Váldi šaddá stuorisin

ja ráfi loahppameahttumin

Davida truvnnus ja su riikkas.

Dat nannejuvvo ja bisuhuvvo

rivttiin ja vanhurskkisvuođain

dál ja agálaččat.

Hearrá, Almmiveagaid Ipmil,

dahká dán áŋgirvuođastis.

₈Hearrá vuolggahii sáni Jakoba vuostá,

su sátni deaivvai Israelii.

₉Oppa álbmot šattai dovdat dan,

Efraim ja Samaria ássit.

Muhto čeavlájit ja goargadit sii dadje:

₁₀“Diilamuvrrat leat gahččan,

muhto mii hukset

čullojuvvon geđggiiguin.

Meahccefiikonmuorahirssat

leat doddjon,

muhto mii bidjat sederiid

daid sadjái.”

₁₁Hearrá divttii Israela vuostálastiid

ávvudit

ja hástalii sin vašálaččaid sin vuostá,

₁₂aramealaččaid nuortan

ja filistalaččaid oarjin,

vuovdát sii borre Israela.

Dattetge su moarri ii sožžon,

su giehta lea ain bajiduvvon.

₁₃Muhto álbmot ii jorgalan

su beallái gii cápmii dan,

sii eai ohcan Hearrá,

Almmiveagaid Ipmila.

₁₄Nu Hearrá čuohpai Israelis

oaivvi ja seaibbi,

gierraga ja skáhčira ovttahat beaivvi.

₁₅Vuorrasat ja árvvus adnojuvvon olbmát

leat oaivi,

profehtat geat oahpahit giellásiid,

leat seaibi.

₁₆Dán álbmoga oahpisteaddjit

čádjidahtte sin,

dat geat oahpistuvvojedje,

láhppojedje.

₁₇Danne Hearrá ii seastán

sin nuorra olbmáid,

ii árpmihan sin oarbásiid iige leaskkaid.

Sii buohkat ledje

ipmilmeahttumat ja vearredahkkit,

buot sin sárdnumuš lei jallavuohta.

Dattetge su moarri ii sožžon,

su giehta lea ain bajiduvvon.

₁₈Bahávuohta bulii dego dolla

ja bolddii bastilislánjáid ja gáskálasaid.

Dat buolláhii rođu,

ja suovva badjánii allagassii.

₁₉Hearrá, Almmiveagaid Ipmila,

moarri bolddii eatnama,

ja álbmot šattai dola loaktámuššan,

nubbi ii seastán nuppi.

₂₀Sii gáskkašedje olgeš beallái

ja ledje ain nealggis,

sii snelko gurut beallái eaige gallánan.

Buohkat borre lagamuččaideaset:

₂₁Manasse borrá Efraima

ja Efraim Manasse,

ja soai searválaga Juda.

Dattetge su moarri ii sožžon,

su giehta lea ain bajiduvvon.