Jakob 5

₁Gullet, dii riggát! Čirrot ja luibmet vártnuhisvuođa mii din deaivida. ₂Din riggodat guohcaga ja din biktasiid borrá muohcu. ₃Din gollit ja silbbat leat giimmagan. Daid giimma duođašta din vuostá ja borrá din oačči dego dolla. Dii lehpet čohkken riggodagaid dáid maŋimuš áiggiid. ₄Dii lehpet doallan bálkká bargiin geat leat láddjen din bealdduid. Gullet: Dat bálká čuorvu albmái, ja ládjobargiid čuorvvas lea ollen Hearrá, Almmiveagaid Ipmila, beljiide. ₅Dii lehpet eatnama alde eallán badjelmearálašvuođas ja mearihisvuođas. Njuovvanbeaivvi dii lehpet buoidudan váimmuideattet. ₆Dii lehpet dubmen ja goddán vanhurskkis olbmo, iige son vuosttal din.

₇Lehket dan dihte gierdavaččat, vieljažiiddán, gitta Hearrá boahtima rádjái. Maiddái eanadoalli vuordá eatnama mávssolaš šattuid ja vuorddilda gierdavaččat dassážii go dat ožžot čakčaarvvi ja giđđaarvvi. ₈Lehket maiddái dii gierdavaččat ja arvvosmahttet váimmodet, danne go Hearrá boahtin lea lahka. ₉Vieljažiiddán, allet váidal guhtet guimmiideattet, amadet dubmejuvvot. Duopmár čuožžu uksanjálmmis. ₁₀Vieljažiiddán, atnet baháid gillámis ja gierdavašvuođas ovdagovvan profehtaid geat leat sárdnon Hearrá nammii. ₁₁Daid geat gillájit gierdavaččat, mii máidnut ávdugassan. Dii lehpet gullan Joba gierdavašvuođa birra ja lehpet oaidnán, makkár loahpa Hearrá dasa attii, dasgo Hearrá árkkálmastá ja árpmiha.

₁₂Ovddimustá, vieljažiiddán, allet vuortno, allet almmi bokte, allet eatnama bokte alletge mange eará bokte. Go mieđihehpet, de dadjet dušše juo, ja go biehttalehpet, de dadjet eat. Muđui din deaivida duopmu.

₁₃Jos muhtun dis gillá, de rohkadallos; jos muhtun lea ilus, de lávlos máidnunlávlagiid. ₁₄Jos muhtun dis lea buozus, de rávkos lusas searvegotti vuorrasiid. Sii galget vuoidat su oljjuin Hearrá nammii ja rohkadallat su ovddas, ₁₅ja oskku rohkadus buorida buohcci. Hearrá čuoččáldahttá su, ja jos son lea suddudan, de son oažžu ándagassii.

₁₆Dovddastehket dan dihte suttuid guhtet guoibmáseattet ja rohkadallet guhtet guimmiideattet ovddas, vai šaddabehtet dearvvašin. Vanhurskkis olbmo rohkadus lea fámolaš ja duddjo ollu. ₁₇Elia lei seammalágáš olmmoš go mii. Go son rohkadalai gierdavaččat ahte ii arvváše, de ii arván eatnama ala golmma jahkái ja guđa mánnui. ₁₈Go son fas rohkadalai, de albmi attii arvvi ja eanan šaddadii fas šattuid.

₁₉Vieljažiiddán, jos muhtun dis čádjida duohtavuođas ja nubbi oahpista su ruoktot, ₂₀de dihtet dán: Gii oahpista suttolačča ruoktot čádjádusa geainnus, dat beastá su jápmimis ja čiehká suttuid eatnatvuođa.