Duopmáriid girji 19

₁Daid áiggiid go Israelis ii lean vel gonagas, de muhtun levilaš lei ássan vierisin Efraima várreeatnamii. Son válddii alccesis liigeáhkkán nissona gii lei eret Betlehemis Judas. ₂Muhto liigeáhkká suhtai sutnje, vulggii su luhtte ja máhcai áhčis vissui Betlehemii Judas. Go son lei orron doppe njeallje mánu, ₃de olmmái válddii mielde bálvvá ja guokte ásena ja vulggii su maŋŋái sártnuhit su boahtit ruoktot. Liigeáhkká luittii su áhčis vissui, ja go áhká áhčči oinnii olbmá, de son dearvvahii su ilolaččat ₄ja oaččohii su orrostit lusas. Son orui vuohpas luhtte golbma beaivvi, ja sii borre, juhke ja vuoiŋŋastedje doppe. ₅Njealját beaivvi iđida olmmái lihkai ja ráhkkanii vuolgit, muhto áhká áhčči dajai vivvasis: “Bora vuos juoidá, ovdal vuolgibeahtti.” ₆Nu dat guovttos čohkáneigga ja boraiga ja jugaiga ovttas. De áhká áhčči dajai olbmái: “Orro dása vel ovtta idjii ja leage buori mielas.” ₇Olmmái lei juo gearggus vuolgit, muhto go su vuohppa bivdalii, de son orrui vel ovtta idjii. ₈Viđát beaivvi olmmái lihkai árrat ja ráhkkanii vuolgit, muhto áhká áhčči dajai: “Bora vuos juoidá, vuordi eahketbeaivái.” Ja soai boradeigga ovttas. ₉Go olmmái de lei vuolgaleamen liigeáhkáinis ja bálvváinis, su vuohppa dajai sutnje: “Dál lea juo eahketbeallái. Orro vel idjii ja leage buori mielas. Vulget dasto árrat iđedis, de buvttehehpet ruoktot.” ₁₀Olmmái ii goit šat dáhtton orrut das ija muhto vulggii, ja su liigeáhkká vulggii suinna. Sádelastojuvvon áseniiguin riidemiin sii bohte Jebusa dahjege Jerusalema lahkosiidda.

₁₁Go sii jovde Jebusa gurrii, de veaigánišgođii beaivi. Dalle bálvá dajai isidasas: “Eatgo mii mana dohko jebuslaččaid gávpogii idjadit?” ₁₂Muhto isit dajai: “Eat mii mana gávpogii man olbmot eai leat israellaččat, muhto mii mannat Gibeai.” ₁₃Son dajai bálvásis: “Mii ollet vel muhtin eará báikái, vaikko Gibeai dahje Ramai.” ₁₄De sii manne ain ovddos, ja beaivváža luoitádettiin sii ledje lahka Gibea, mii lea Benjaminis. ₁₅Go sii earránedje das gávpogii vai besset idjadit doppe, de ii oktage bivdán sin vissosis idjii, muhto sii gárte báhcit čohkohallat márkanšilljui.

₁₆Eahkedis muhtin boares olmmái lei boahtimin ruoktot bealdobargguin. Son lei Efraima várreeatnamis ja lei ássan Gibeai, muhto dan báikki olbmot ledje benjaminlaččat. ₁₇Boares olmmái áiccai mátkkálaččaid márkanšiljus ja jearai olbmás: “Gos don boađát ja gosa leat mannamin?” ₁₈Olmmái vástidii: “Mii leat boahtimin Betlehemis Judas ja leat mannamin Efraima várreeatnamii. Mun ásan doppe. Lean fitnan Betlehemis Judas ja dál lean máhccamin ruoktot, muhto ii oktage leat váldán mu vissosis idjii. ₁₉Mis leat oalggat ja eará fuođar áseniidda, ja láibi ja viidni alccesan, áhkkásan ja bálvásan. Mis lea visot maid dárbbašit.” ₂₀Dalle boares olmmái dajai: “Bures boahtin mu vissui! Divtte mu atnit fuola buot das maid dárbbašehpet. Allet fal orro idjii márkanšilljui.” ₂₁Son doalvvui mátkkálaččaid vissosis ja biepmai áseniid. Go sii ledje bassan julggiid, de sii boradišgohte.

₂₂Go sii dal ledje čohkkámin muosis, de birastahtte viesu gávpoga olbmát, návccahis olbmát. Sii derpe uvssa ja čurvo boares olbmái, dálu isidii: “Buvtte olggos dan olbmá gii bođii du vissui, de mii veallát suinna!” ₂₃Dalle isit manai olggos olbmáid lusa ja dajai: “Vieljat, allet daga nu bahás, go juo dát olmmái lea boahtán mu guossái, de allet daga diekkár fasttes dagu! ₂₄Muhto dáppe lea mu nieida gii lea eadneviđá, ja dán olbmá liigeáhkká. Mun buvttán didjiide sudno. Dii oažžubehtet meannudit sudnuin nugo dáhttubehtet, muhto dán olbmái allet daga maidege nie issorasaid!” ₂₅Muhto gávpoga olbmát eai goit dáhtton gullat boares olbmá. Dalle levilaš doalvvui liigeáhkás olggos sidjiide. Sii veallájedje suinna ja illastedje su geažos ija gitta iđida rádjái eaige luoitán su ovdal go iđedisguovssu badjánii. ₂₆Iđedisveaigin nisson bođii ja gahčai dan dálu uvssa ovdii gos su boadnji lei idjadeamen, ja njaŋgái das dassá go lei čuvggodan.

₂₇Iđedis go levilaš lihkai, rabastii uvssa ja manai olggos vai beassá vuolgit, de son oinnii liigeáhkás njaŋgámin uvssa ovddas gieđat šielmmá alde. ₂₈Boadnji dajai áhkkásis: “Čuožžil, de moai vulge!” Muhto áhkká ii vástidan. Olmmái loktii su ásena čielgái ja vulggii ruovttu guvlui.

₂₉Go levilaš joavddai ruoktot, de son válddii niibbi, čuohpadii liigeáhkás guoktinnuppelot bihttán ja vuolggahii bihtáid miehtá Israela. ₃₀Olbmát geaid son vuolggahii, galge cealkit: “Leago juoga dákkár dáhpáhuvvan dahje oidnojuvvon dan rájes go Israel vulggii Egyptas? Guorahallet dal dárkilit ja dadjet, maid galgá dahkat!”