Duopmáriid girji 5

₂Israel čuožžilii soahtat,

álbmot lei gearggus.

Máidnot Hearrá!

₃Gullet, gonagasat!

Guldalehket, oaivámuččat!

Mun lávllun Hearrái,

mun máinnun Israela Ipmila.

₄Hearrá, go don vuolggát Seiras,

go don manat ovdan Edoma eatnamis,

de eanan doarggista,

dalle almmit goikot,

balvvat šoalahit čázi.

₅Várit doarggistit Hearrá,

Sinai Hearrá, muođuid ovddas,

Hearrá, Israela Ipmila, muođuid ovddas.

₆Šamgara, Anata bártni, áiggiid,

Jaela beivviid máđijat ledje ávdimat,

mátkkálaččat manne mohkkás bálgáid.

₇Njunnošat eai šat dihtton,

Israela siiddat ledje ávdimat.

Dalle don, Debora, čuožžilit,

don, Israela eadni, loaiddastit ovdan.

₈Ipmil bovdii ođđa njunnošiid

go soahti lei poarttaid ovddas.

Ii lean galba, ii oktage sáiti

Israela njealljelogiduháha gieđas.

₉Mu váibmu ravká

Israela oaivámuččaide,

dan álbmogii mii lei mieđis čuovvulit.

Máidnot Hearrá!

₁₀Dii geat riidebehtet

vilges ásendámmáiguin,

dii geat čohkkábehtet ránuid alde,

dii geat vádjolehpet bálgáid,

lávlot!

₁₁Jugahangárcuid luhtte

rámiduvvojit Hearrá dagut,

su vuoittut Israela njunnošis.

Dalle Hearrá álbmot manai poarttaid vuostá.

₁₂Čuožžil, Debora, čuožžil!

Čuožžil ja lávllo lávlaga!

Čuožžil, Barak,

váldde fáŋgan vašálaččaid,

Abinoama bárdni!

₁₃Dalle bohte Israela jálus olbmát,

Hearrá álbmot oktan sáŋgáriiddisguin.

₁₄Efraima njunnošat bohte duolbadasas,

sii čuvvo du, Benjamin, ja du álbmoga.

Makiris bohte oaivámuččat,

Sebulonis olbmát ráđđensoabbi gieđas.

₁₅Isaskara oaivámuččat

čuovvuledje Debora,

Isaskar, Baraka doarjja,

vulggii suinna duolbadassii.

Rubena sogat ráđđádalle guhká.

₁₆Manin don ádjánit

oapmegárddiid gaskkas, Ruben,

guldalit báimmannjurggona jiena?

Rubena sogat ráđđádalle guhká.

₁₇Gilead bisui don bealde Jordana.

Manin ájahalai Dan skiippaid luhtte?

Ašer bisui mearragáttis,

orodii stáffuidis guoras.

₁₈Sebulona álbmot ii ballan jápmimis,

ii Naftali álbmotge,

go alážiin lei soahti.

₁₉Gonagasat bohte soahtat,

Kanaana gonagasat sohte Taanakis,

Megiddo čáziid gáttiin.

Eai sii ožžon sálašin silbba.

₂₀Almmi násttitge ledje falleheamen,

raŧiineaset dat sohte Siserain.

₂₁Kišonjogaš doalvvui vašálačča eret,

Kišon, dološáigásaš jogaš!

Ovddos, mu siellu, fámolaččat!

₂₂Heasttagaccat dulbme eatnama,

oret luite olles doalvvi.

₂₃Garuhehket Merosa, cealká Hearrá eŋgel,

garuhehket dan ássiid,

go eai boahtán Hearrái veahkkin,

veahkehit Hearrá ja su soahteolbmáid.

₂₄Rámiduvvon ovdalii eará nissoniid

lea Jael, kenlaš Hebera áhkká,

rámiduvvon nisson

johtti olbmuid gaskkas.

₂₅Sisera ánui čázi,

mielkki Jael attii,

buvttii lávcca hearvás lihtis.

₂₆Son dohppii giddennávlli,

olgeš gihtii šluppoha.

Nu son časkkii Sisera,

cuvkii su oaivvi,

ráiggai ja luddii su geađđaša.

₂₇Jaela julggiid ovdii ravggai Sisera,

gahčai, bázii veallát.

Jaela julggiid ovdii son ravggai,

gosa ravggai, dasa bázii jábmin.

₂₈Sisera eadni geahččá láseráigge,

čurve čeargalasa čađa:

“Manne ádjánit su vovnnat?

Manne eai gullo su heasttaid lávkkit?”

₂₉Viisámus hoavvanisson vástida,

eadni geardu su sániid:

₃₀“Várra leat juogadeamen sállaša.

Nieida dahje guokte guhtiige,

hearvabiktasat sálašin Siserai,

hearvabiktasat sálašin,

moadde girjeliinni dan čeabehii

gii váldojuvvo sálašin.”

₃₁Nu duššet buot du vašálaččat, Hearrá.

Muhto dat geat ráhkistit Hearrá

leat dego beaivváš

go dat badjána oppa fámustis.