Jeremia 10

₂Ná cealká Hearrá:

Allet hárjet iežadet

eará álbmogiid vieruide,

allet bala almmi mearkkain

mat baldet eará álbmogiid.

₃Sin vierut leat duššálaččat.

Sii njeidet vuovddis muora,

ja muorraduojár hábme dan luovččaniin.

₄Son čiŋaha dan silbbain ja golliin

ja gidde dan sadjásis

veahčiriin ja návlliiguin,

amas juovzut.

₅Dat leat dego

loddegavnnjat gurkábealddus,

eai dat máhte sárdnut.

Go dat eai máhte vázzit,

de daid ferte guoddit.

Allet bala dain! Dat eai daga baháid,

muhto eai dat gal máhte dahkat buriidge.

₆Hearrá, ii oktage leat du veardásaš!

Don leat stuoris,

du namma lea stuoris ja fámolaš.

₇Gii ii balaše dus, álbmogiid gonagas?

Dat lea du vuoigatvuohta.

Dasgo buot álbmogiid viisáid gaskkas,

buot sin gonagasaid gaskkas

ii leat oktage nugo don.

₈Jallat ja jierpmeheamit sii leat buohkat,

duššálaš lea sin ipmiliid oahppa.

Duot ipmilat leat duddjojuvvon muoras,

₉derpojuvvon Taršiša silbbas

ja Ufasa gollis,

muorraduojárat ja gollerávdit

leat daid duddjon.

dain leat alitrukses

ja purpurrukses biktasat,

ja dat buot leat dáiddáriid duojit.

₁₀Muhto Hearrá lea duohta Ipmil,

son lea ealli Ipmil ja agálaš gonagas.

Eanan doarggista su vašis,

álbmogat eai gierdda su moari.

₁₂Hearrá dagai eatnama fámuinis,

vuođđudii máilmmi viisodagainis

ja lebbii almmi ipmárdusainis.

₁₃Go su jietna gullo,

de almmi čázit šávvagohtet.

Son bajida balvvaid eatnama ravddas,

son bidjá álddagasaid šleađgut

ja arvvi šoallat,

son luoitá biekka vuorkágámmáriinnis.

₁₄Juohke olmmoš lea jierpmeheapme

ja diehtemeahttun.

Juohke gollerávdi šaddá heahpanit

ipmilgovainis,

su leikejuvvon govat leat beahtus,

ii dain leat mihkkege vuoiŋŋaid.

₁₅Dat leat duššálaččat,

duojit maid olbmot bilkidit.

Ráŋggáštanáiggi dat duššet.

₁₆Daid láhkásaš ii leat Jakoba Ipmil.

Son lea ráhkadan buot,

ja Israel lea su iežas álbmot.

Su namma lea Hearrá, Almmiveagaid Ipmil.

₁₇Čohkkejehket gurppiideattet,

dii fertebehtet vuolgit eatnamis!

Din gávpot lea birastahttojuvvon.

₁₈Ná cealká Hearrá:

Dán geardde mun šleŋgen eret

eatnama ássiid.

Mun áŧestan sin,

vai sii gávnnašedje mu.

₁₉Vuoi mu, vuoi mu sárjjiid!

Mu hávvi lea buoritmeahttun.

Mun jurddašin: Dát lea dušše givssádus

maid mun ferten gierdat.

₂₀Mu goahti lea biđgejuvvon,

dan báttit botkkoduvvon.

Mu mánát leat vuolgán mu luhtte,

sii eai leat šahtain.

Ii leat šat oktage

ceggemin ja loavdimin mu goađi.

₂₁Dasgo guođoheaddjit leat jierpmeheamit

eaige oza Hearrá.

Danne sii eai lihkostuva,

ja nu oppa sin eallu bieđgana.

₂₂Gullabehtetgo? Dat lahkona,

garra julla davvieatnamis!

Dat dahká Juda gávpogiid ávdimin,

šakálaid orrunsadjin.

ahte olbmo geaidnu ii leat su válddis,

iige vádjoleaddji ieš stivre lávkkiidis.

₂₄Bagat mu, Hearrá, dattetge muttágit!

Ale moaráhuva munnje,

amat dahkat mu áibbas heittohin.

₂₅Golggat moarát álbmogiid badjelii

mat eai dovdda du,

daid sogaid badjelii

mat eai čuorvvo du nama.

Siihan leat loaktán Jakoba,

duššadan su

ja dahkan su eatnama ávdimin.