Jeremia 13

₁De Hearrá celkkii munnje: “Mana oastit alccesat beallemasboahkána ja čana dan alimiiddát birra, muhto várut njuoskadeames dan.” ₂Mun osten boahkána nugo Hearrá lei gohččon, ja čatnen dan alimiiddán birra. ₃Dalle Hearrá sátni bođii munnje nuppádassii: ₄“Váldde boahkána maid ostet ja mii lea alimiiddát birra, ja mana Eufratii. Čiega dan dohko bákteráhkamii.” ₅Mun mannen ja čihken dan Eufratii, nugo Hearrá lei gohččon. ₆Guhkes áiggi geažes Hearrá celkkii munnje: “Mana Eufratii viežžat dan boahkána maid mun gohččon du čiehkat dohko.” ₇Mun mannen Eufratii ja roggen boahkána bajás dan sajis masa ledjen čiehkan dan. Muhto boagán lei billašuvvan iige dohkken šat maninge. ₈Dalle Hearrá sátni bođii munnje: ₉Ná cealká Hearrá: Seamma láhkai mun doaján Juda ja Jerusalema stuora čeavlli. ₁₀Dát bahás álbmot biehttala gullamis mu sániid. Dan váibmu lea buššon, dat manná eará ipmiliid maŋis ja bálvala ja gopmirda daid. Danin dasa geavvá nugo dán boahkánii mii ii dohkke šat maninge. ₁₁Nugo olmmái čatná boahkána alimiiddis birra, nu munge lean čatnan oppa Israela álbmoga ja Juda álbmoga alccesan, cealká Hearrá. Dat galge leat mu álbmot, munnje gudnin, rámádussan ja čikŋan, muhto dat eai dáhtton gullat.

₁₂Cealkke sidjiide dán sáni: Ná cealká Hearrá, Israela Ipmil: Juohke viidneruhkku devdojuvvo viinniin. Ja jos sii dadjet dutnje: “Eatgoson mii dieđe ahte juohke viidneruhkku devdojuvvo viinniin?” ₁₃de vástit: Ná cealká Hearrá: Mun deavddán viinniin buot dán eatnama ássiid ja gárihuhtán sin, sihke gonagasaid geat čohkkájit Davida truvnnus ja báhpaid, profehtaid ja buot Jerusalema ássiid. ₁₄Mun cuvken sin nuppi nuppi vuostá, sihke áhčiid ja bártniid, cealká Hearrá. Mun in árpmit, in árkkáš inge seastte; mun duššadan sin.