Jeremia 19

₁Hearrá celkkii munnje: Mana oastit láiráruhku. Váldde mielddát muhtumiid álbmoga ja báhpaid vuorrasiin ₂ja mana Ben-Hinnoma leahkái Ruhkkomoallopoartta buohta. Gulat doppe daid sániid maid mun dutnje attán. ₃Daja ná: Gullet Hearrá sáni, dii Juda gonagasat ja Jerusalema ássit! Ná cealká Hearrá, Almmiveagaid Ipmil, Israela Ipmil: Mun buvttán dán báikái dakkár lihkohisvuođa ahte juohkehaččas gii dan gullá, bealjit čudjet. ₄Mu álbmot lea hilgon mu ja dahkan dán báikki amasin. Sii leat cahkkehan oaffardola eará ipmiliidda maid eai sii, sin áhčit eaige Juda gonagasat dovdan. Sii leat deavdán dán báikki vigihis olbmuid varain. ₅Sii leat ráhkadan oaffarbáikkiid vai leat beassan boaldit mánáideaset boaldinoaffarin Baalii. Dan mun in leat goassege gohččon sin dahkat, iige dat leat badjánan mu millii.

₆Dan dihte bohtet beaivvit, cealká Hearrá, go dát báiki ii šat gohčoduvvo Tofetin iige Ben-Hinnoma leahkin, muhto Sorbmenleahkin. ₇Dán báikkis mun dagan duššin Juda ja Jerusalema ássiid áigumušaid. Mun divttán sin gahččat vašálaččaideaset miehkkái ja attán sin daid gihtii geat bivdet sin heakka. Sin gorudiid mun attán almmi lottiid ja eatnama spiriid biebmun. ₈Mun dagan dán gávpoga ávdimin ja buohkaid bilkádussan. Juohkehaš gii manná meaddel, soaigá ja bilkida buot dan givssiid. ₉Mun bijan sin borrat bártniideaset ja nieiddaideaset oačči, ja sii šaddet borrat maiddái nuppiideaset oačči, go vašálaččat birastahttet sin ja bivdet sin heakka.

₁₀Cuvke dalle ruhku daid olbmáid oaidnut geat leat boahtán duinna ₁₁ja daja sidjiide: Ná cealká Hearrá, Almmiveagaid Ipmil: Mun cuvken dán álbmoga ja dán gávpoga dego láirálihti maid ii sáhte šat dahkat čavddisin. Jábmit hávdáduvvojit Tofetii, danne go eará sajis ii leat šat hávdesadji. ₁₂Nu mun dagan dán báikái ja dan ássiide, cealká Hearrá. Mun dagan dán gávpoga Tofeta láhkásažžan. ₁₃Jerusalema viesut ja Juda gonagasaid viesut šaddet seammá buhtismeahttumin go Tofet, buot viesut maid dáhkiin sii leat cahkkehan oaffardola almmi vehkii ja golggahan juhkamušoaffariid eará ipmiliidda.

₁₄Go Jeremia lei máhccan Tofetis gosa Hearrá lei vuolggahan su profehtastallat, de son čuoččastii Hearrá viesu ovdašilljui ja sártnui oppa álbmogii: ₁₅Ná cealká Hearrá, Almmiveagaid Ipmil, Israela Ipmil: Mun divttán boahtit dán gávpogii ja buot Juda gávpogiidda dan bahá mainna lean áitán daid. Daid ássit leat ceaggát, sii eai leat gullan mu sániid.