Jeremia 2

Mun muittán man oskkáldas

don ledjet nuorran,

man gieris ledjet moarsin,

mo don čuvvot mu meahcis,

eatnamis gos ii oktage gilvve.

₃Israel lei basuhuvvon Hearrái,

dat lei su álgošaddu.

Buohkat geat borre dan,

šadde sivalažžan,

oasehisvuohta deaividii sin,

cealká Hearrá.

₄Gullet Hearrá sáni, Jakoba viessu,

buot Israela viesu sogat!

₅Ná cealká Hearrá:

Maid vearrivuođaid din áhčit gávdne mus,

go sii gáide mus eret

čuvvo guttahis ipmiliid

ja šadde ieža guttaheapmin.

₆Eai sii jearran: “Gos lea Hearrá,

guhte buvttii min Egyptas

ja oahpistii min čađa meahci,

čađa ájuid ja skurččuid,

čađa goikkisvuođa ja moskku,

čađa eatnama gos ii oktage vádjol

ja gos ii oktage olmmoš ása?”

₇Mun dolvon din šattolaš eatnamii,

borrat dan šaddosiid ja buriid.

Muhto go dii leiddet boahtán,

de dii dagaidet mu eatnama

buhtismeahttumin

ja mu opmodaga fastin.

₈Báhpat eai jearran:

“Gos lea Hearrá?”

Láhkadovdit eai beroštan mus,

báimmanat jorraledje mus eret,

profehtat profehtastalle Baala nammii.

Sii bálvaledje ipmiliid

mat eai sáhte veahkehit.

₉Dan dihte mun ain bijan din vástidit,

cealká Hearrá,

duođaid, mun bijan

din mánáidmánáidge vástidit.

₁₀Mannet kittelaččaid rittuide geahččat,

bidjet sáni Kedarii ja guorahallet dárkilit,

leago mihkkege dakkáriid dáhpáhuvvan!

₁₁Leago oktage álbmot

lonuhan ipmiliiddis

– vaikko vel dat eai leatge ipmilat?

Muhto mu álbmot lea lonuhan gudnis

dainna mas ii leat gudda.

₁₂Hirpmástuva, albmi,

suorgan ja gáfestuva!

cealká Hearrá.

₁₃Dasgo mu álbmot lea dahkan

guokte suttu:

Sii leat guođđán mu,

ealli čázi ádjaga,

ja čuollan alcceseaset gáivvuid,

rágadeaddji gáivvuid mat eai jeage čázi.

₁₄Leago Israel šlávva,

leago son riegádan šlávvan?

Manne son šattai sálašin?

₁₅Ledjonat čergot ja harret sutnje,

dat leat dahkan su eatnama ávdimin.

Su gávpogat leat boldojuvvon,

ii oktage sáhte ássat dain.

₁₆Velá Memfisa ja Tahpanhesa olbmát

guhtot du oaivečohka báljisin.

₁₇Dát lea deaividan du

danne go don hilgot Hearrá, Ipmilat.

₁₈Mii ávkkiid lea dutnje mannat Egyptii

juhkat Nileanu čázi?

Mii ávkkiid lea dutnje mannat Assurii

juhkat Eufrateanu čázi?

₁₉Du bahávuohta ráŋggášta du,

du jorraleapmi dubme du.

De dovddit dalle ja oainne

man bahá ja bahča lea

go don hilgot Hearrá, Ipmilat,

itge bala mus,

cealká Hearrá Ipmil, Almmiveagaid Ipmil.

₂₀Doloža rájes don leat doadján

iežat geassá,

botken čanastagaidat ja dadjan munnje:

“Mun in dáhto bálvalit du.”

Buot alla dieváin

ja juohke rudnes muora vuolde

don leat fieradan fuorrán.

₂₁Mun gilven du válljuviidnemuorran,

válljusuorgin.

Mo don dalle leat rievdan

vieris viidnemuorran?

₂₂Vaikko don basadivččet gutnačázis

ja geavahivččet valjis sáibbo,

de duolvvasin bissot du suttut mu čalmmiin,

cealká Hearrá Ipmil.

₂₃Mo don sáhtát dadjat:

“In mun leat buhtismeahttun,

in mun leat čuvvon Baal-ipmiliid”?

Geahča luottaidat mat leat leagis,

muitte maid don leat bargan,

don fales njiŋŋelas kamela

mii ruohtadat duohkot deike,

₂₄don meahciásendámmá

mii leat hárjánan meahccái!

Don bosut gipmásis.

Gii čáskada du gimi?

Dat geat ohcet du,

eai dárbbaš rahčat váibamassii,

sii gávdnet du, go don leat gipmásis.

₂₅Ale divtte julggiidat šaddat rabasin

alege čoddaga goikkisin!

Muhto don vástidat: “Divtte mu orrut!

Mun ráhkistan vieris ipmiliid,

daid maŋis mun dáhtun mannat.”

₂₆Dego gávnnahallan suola heahpana,

nu gártet israellaččatge heahpanit,

sii ieža ja sin gonagasat,

sin oaivámuččat, báhpat ja profehtat,

₂₇dat geat dadjet murrii:

“Don leat mu áhčči”

ja geađgái: “Don leat riegádahttán mu.”

Sii leat jorgalan munnje sealggi,

eai muođuid,

muhto go lihkuhisvuohta šaddá,

de sii čurvot:

“Boađe beastit min!”

₂₈Gos de leat du ipmilat

maid ráhkadit alccesat?

Bohtoset sii veahkehit du

lihkuhisvuođa áigge, jos sáhttet!

Dus leat ipmilat seammá ollu

go gávpogat, Juda.

₂₉Manne dii bealkibehtet muinna?

Dii lehpet buohkat stuimmáskan mu vuostá,

cealká Hearrá.

₃₀Duššás mun cábmen din bártniid,

sii eai váldán vuostá bagadusa.

Din miehkit duššadedje profehtaid

dego speaddji ledjon.

₃₁Dii dán buolvva olbmot,

váldet vuhtii Hearrá sáni!

Leango mun leamaš Israelii

dego ávdin meahcci,

nugo moskkusevdnjes eana?

Manne mu álbmot cealká:

“Mii viehkat gosa hálidit,

mii eat máhca šat du lusa”?

₃₂Vajáldahttágo nieida čiŋaidis

dahje moarsi boahkánis?

Muhto mu álbmot lea vajáldahttán mu

lohkameahttun beivviid.

₃₃Don leat čeahppi dádjadit

go siđat ráhkisvuođa!

Dan dihte don leatge hárjánan

vádjolit bahás geainnuid.

₃₄Du bivttashelmmiin lea

sivahis gefiid varra,

vaikko sii eai leat dutnje gávnnahallan suolan.

₃₅Dattetge don dajat:

“Mun lean sivaheapme;

Hearrá lea vissásit jorgalan

moaris mus eret.”

Muhto mun bijan du vástidit,

danne go don dajat:

“Mun in leat suddudan.”

₃₆Vuoi, man geahppadit don

válljet nuppi geainnu!

Egypta beahttá du,

nugo Assyriage behtii du.

₃₇Doppege don fertet vuolgit

gieđat oaivvi alde,

dasgo Hearrá lea hilgon daid

geaidda don dorvvastit.

Dat eai leat dutnje maninge ávkin.