Jeremia 25

₁Dát lea sátni mii bođii Jeremiai oppa Juda álbmoga birra, dalle go Jošia bárdni Jojakim lei njealját jagi Juda gonagassan, ja Nebukadnesar lei vuosttas jagi Babylona gonagassan. ₂Dan sáni Jeremia sártnui oppa Juda álbmogii ja buot Jerusalema ássiide:

₃Juda gonagasa Jošia, Amona bártni, golbmanuppelogát ráđđenjagi rájes gitta dán beaivvi rádjái, olles guoktelogigolbma jagi, Hearrá sátni lea boahtán munnje. Mun lean ain ođđasis sárdnon didjiide, muhto dii ehpet leat guldalan. ₄Ain ođđasis Hearrá lea vuolggahan din lusa bálvaleddjiidis profehtaid, muhto dii ehpet leat guldalan sin. Dii ehpet dahkan oppa gullinge, go sii sárdno: ₅Jorgalehket buohkat bahás geainnuineattet ja daguineattet, de dii beassabehtet álo ássat dan eatnamis maid mun adden didjiide ja din áhčiide agálaš áiggiide. ₆Allet vádjol eará ipmiliid maŋis, allet bálval alletge rohkadala daid! Allet moaráhuhte mu ipmiliiguin maid lehpet duddjon, de mun in daga didjiide maidege baháid. ₇Muhto dii ehpet dáhtton guldalit mu, cealká Hearrá, muhto moaráhuhtiidet mu eahpeipmilgovaideattetguin, alcceseattet vahágin.

₈Dan dihte cealká Hearrá, Almmiveagaid Ipmil: Go dii ehpet leat guldalan mu sániid, ₉de mun bijan sáni ja vieččahan deike davvin buot álbmogiid ja bálvaleaddján Nebukadnesara, Babylona gonagasa. Mun gohčun sin fallehit dán eatnama ja dan ássiid ja buot dan birasálbmogiid. Mun divttán din duššat ollásit, dagan din eatnama ávdimin, agálaš čievračopman, ja buohkat hiddjidit din. ₁₀Mun loahpahan din ávvučuorvasiid ja illučuorvasiid, irggi jiena ja moarsi jiena, millu jiena ja lámppá čuovgga. ₁₁Oppa dát eanan šaddá geađgebázahassan, ávdin báikin, ja dát álbmogat bálvalit Babylona gonagasa čiežalogi jagi.

₁₂Muhto go čiežalogi jagi leat dievvan, de mun ráŋggáštan Babylona gonagasa ja su álbmoga sin vearredaguid dihte, cealká Hearrá. Maiddái sin eatnama mun ráŋggáštan, mun dagan dan agálaš meahccin. ₁₃Mun divttán ollašuvvat dan eatnamis buot sániidan maid lean sárdnon dan vuostá, buot dan mii lea čállojuvvon dán girjái ja maid Jeremia lea profehtastallan álbmogiid vuostá. ₁₄Boahtá áigi go babylonialaččatgis šaddet bálvalit eará álbmogiid ja stuorra gonagasaid. Mun mávssahan sidjiide sin vádjolusa ja sin daguid.

₁₅Hearrá, Israela Ipmil, celkkii munnje: Váldde mu gieđas dán geara ja jugat mu moari viinni buot álbmogiidda maid lusa mun vuolggahan du. ₁₆Dat juhket ja suibot ja bieđáskit miehki geažil maid mun vuolggahan sin gaskii. ₁₇Nu mun válden geara Hearrá gieđas ja jugahin moari viinni buot álbmogiidda maid lusa Hearrá vuolggahii mu: ₁₈Jerusalemii ja buot Juda gávpogiidda, Juda gonagasaide ja oaivámuččaide, vai gávpogat šattašedje muvrralátnan ja ávdimin, bilkun ja garuhussan, nugo lea otná beaivvige; ₁₉faraoi, Egypta gonagassii, su bálvaleddjiide ja oaivámuččaide ja oppa su álbmogii, ₂₀buot seahkeálbmogiidda, buot Usa eatnama gonagasaide, buot Filistea gonagasaide ja Aškelona, Gaza ja Ekrona álbmogiidda ja daidda geat leat báhcán Ašdodii; ₂₁Edomii, Moabii ja ammonlaččaide, ₂₂buot Tyrosa ja Sidona gonagasaide ja riddoeatnamiid gonagasaide nuppe bealde ábi, ₂₃Dedana, Tema ja Busa álbmogiidda ja buohkaide geain leat birrajevdejuvvon vuovttat; ₂₄buot Arabia gonagasaide geat ásset ávdin guovlluin; ₂₅buot Simri, Elama ja Media gonagasaide, ₂₆buot davviguovllu gonagasaide lahka ja guhkkin, juohkehažžii su vuorus, buot riikkaide mat leat miehtá eatnama. Maŋimuš dan juhká maiddái Šešaka gonagas.

₂₇Cealkke sidjiide: Ná cealká Hearrá, Almmiveagaid Ipmil, Israela Ipmil: Juhket, gárihuvvet ja vuovssadehket! Gahččet miehkkái maid mun vuolggahan din gaskii, alletge šat čuožžil. ₂₈Muhto jos sii biehttalit váldimis geara du gieđas ja juhkamis, de daja sidjiide: Ná cealká Hearrá, Almmiveagaid Ipmil: Dii fertebehtet juhkat! ₂₉Go mun divttán oasehisvuođa deaividit vuos dan gávpoga man badjel mu namma lea celkojuvvon, de diigo dalle beasašeiddet ráŋggáškeahttá! Ehpet eisege! Mun gohčun miehki fallehit buot eatnama ássiid, cealká Hearrá, Almmiveagaid Ipmil. ₃₀Muhto don, Jeremia, sártno buot dáid sániid! Cealkke sidjiide:

₃₃Dan beaivvi juohke sajis, eatnama ravddas nubbái, njaŋgájit olbmot geaid Hearrá lea goddán. Sidjiide eai dollojuvvo váidalusat, sii eai čohkkejuvvo eaige hávdáduvvo, muhto sin rupmašat šaddet eatnama duktan.