Jeremia 28

₁Dan jagi viđát mánus, Juda gonagasa Sidkia ráđđenáiggi álggus, su njealját ráđđenjagi, profehta Hananja, Assura bárdni, gii lei Gibeona olmmoš, sártnui Jeremiai Hearrá tempelis. Báhpaid ja oppa álbmoga gullut son celkkii: ₂“Ná cealká Hearrá, Almmiveagaid Ipmil, Israela Ipmil: Mun doaján Babylona gonagasa geassá! ₃Ovdal go guokte jagi leat vássán, de mun buvttán ruoktot dán báikái buot daid Hearrá tempela lihtiid maid Babylona gonagas Nebukadnesar doalvvui dáppe Babylonii. ₄Juda gonagasa Jekonja, Jojakima bártni, ja buohkaid geat dolvojuvvojedje Judas Babylonii, mun buvttán ruoktot dán báikái, cealká Hearrá. Mun doaján Babylona gonagasa geassá.”

₅Profehta Jeremia dajai dalle profehta Hananjai báhpaid ja buot daid olbmuid gullut geat ledje čuožžumin das Hearrá tempelis: ₆“Amen! Vare Hearrá dagašii nu, vare son ollašuhtášii du profehtasáni ja buvttášii ruoktot Babylonis dán báikái Hearrá tempela biergasiid ja buot eret dolvojuvvon olbmuid. ₇Muhto gula goit sáni maid mun dál sártnun du ja oppa álbmoga gullut. ₈Dat profehtat geat leat leamaš dáppe ovdal mu ja du gitta doloža rájes, leat einnostan soađi, oasehisvuođa ja rohttudávdda eatnat eatnamiidda ja stuorra riikkaide. ₉Muhto jos profehta einnosta ráfi, de su sátni ferte ollašuvvat. Easkka dalle son mieđihuvvo profehtan gean Hearrá duođaid lea vuolggahan.”

₁₀Dalle profehta Hananja válddii geassá Jeremia niskkis ja dojii dan. ₁₁Son dajai oppa álbmoga gullut: “Ná cealká Hearrá: Dán láhkái mun doaján Babylona gonagasa Nebukadnesara geassá buot álbmogiid niskkis, ovdal go guokte jagi leat vássán.” De profehta Jeremia vulggii das.

₁₂Muhto maŋŋelaš go profehta Hananja lei doadján geassá Jeremia niskkis, de Jeremiai bođii dát Hearrá sátni: ₁₃“Mana Hananja lusa ja cealkke sutnje: Ná cealká Hearrá: Don dodjet muorrageassá, muhto dan sadjái don bajidat ruovdegeassá! ₁₄Ná cealká Hearrá, Almmiveagaid Ipmil, Israela Ipmil: Mun bijan ruovdegeassá buot dáid álbmogiid niskái. Sii gártet bálvalit Babylona gonagasa Nebukadnesara. Velá meahcispiriidge mun attán su váldái.” ₁₅Profehta Jeremia dajai vel profehta Hananjai: “Gula, Hananja! Ii Hearrá leat vuolggahan du. Don leat fillen dán álbmoga dorvvastit giellásiidda. ₁₆Dan dihte Hearrá cealká: Mun vuolggahan du eret eatnama alde. Dán jagi don jámát, danin go leat sárdnon giellásiid mu nammii.” ₁₇Ja profehta Hananja jámii dan jagi čihččet mánus.