Johannes 16

₁Dán mun lean sárdnon didjiide amadet jorralit. ₂Sii ádjet din olggos synagogas. Áigi boahtá go dat gii goddá din, jáhkká ahte son dan bokte bálvala Ipmila. ₃Ná sii dahket danne go eai dovdda Áhči eaige mu. ₄Mun lean cealkán didjiide dán, vai dii, go dat áigi boahtá, muitibehtet ahte mun celken dan.

Mun in sárdnon didjiide dán álggus, danne go lean ieš leamaš dinguin. ₅Muhto dál mun manan su lusa gii lea vuolggahan mu. Ii oktage dis jeara gosa mun manan, ₆muhto din váibmu lea morrašis dan geažil maid mun dadjen didjiide. ₇Muhto mun cealkkán didjiide duohtavuođa: Didjiide lea ávkin ahte mun manan eret. Jos mun in mana, de Bealušteaddji ii sáhte boahtit din lusa. Muhto go mun lean mannan, de mun vuolggahan su din lusa, ₈ja son boahtá ja čájeha máilbmái mii lea suddu, mii vanhurskkisvuohta ja mii duopmu. ₉Suddu lea das ahte olbmot eai oskko munnje, ₁₀vanhurskkisvuohta boahtá albmosii das ahte mun manan Áhči lusa ehpetge dii oainne šat mu, ₁₁ja duopmu lea das ahte dán máilmmi ráđđejeaddji lea dubmejuvvon.

₁₂Mus lea ain ollu sárdnumuš didjiide, muhto dii ehpet sáhte váldit dan vuostá. ₁₃Muhto go Duohtavuođa Vuoigŋa boahtá, de son oahpista din dovdat olles duohtavuođa. Son ii sártno iešalddis, muhto sárdnu dan maid gullá, ja son almmuha didjiide boahttevaš dáhpáhusaid. ₁₄Son hearvásmahttá mu, danne go son oažžu mus dan maid son almmuha didjiide. ₁₅Buot mii lea Áhči, lea maiddái mu. Danne mun celken ahte son oažžu mus dan maid son almmuha didjiide.

₁₆Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu.” ₁₇Dalle muhtumat su máhttájeddjiin jerre guhtet guoimmisteaset: “Maid son oaivvilda go dadjá: ‘Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu’? Ja maid son oaivvilda go dadjá ahte son manná Áhči lusa? ₁₈Maid son oaivvilda oanehis bottožiin? Mii eat ádde maid son sárdnu.” ₁₉Jesus oinnii ahte sii áigo jearrat sus, ja son celkkii: “Dango dii imaštallabehtet ahte mun celken: ‘Oanehis bottoža geažes dii ehpet oainne mu, ja fas oanehis bottoža geažes dii oaidnibehtet mu’? ₂₀Duođaid, duođaid, mun cealkkán didjiide: Dii šaddabehtet čierrut ja luoibmat, muhto máilbmi illuda. Dii šaddabehtet morrašii, muhto din moraš šaddá illun. ₂₁Go nisson riegádahttá, de son lea balus go su boddu lea boahtán. Muhto go mánná lea riegádan, de eadni ii muitte šat bákčasiiddis muhto lea ilus go olmmoš lea riegádan máilbmái. ₂₂Disge lea dál moraš, muhto mun oainnán din fastain, ja dalle dii lehpet ilus, iige oktage sáhte váldit din ilu dis eret. ₂₃Dan beaivvi dii ehpet jeara mus maidege. Duođaid, duođaid, mun cealkkán didjiide: Maid ihkinassii dii átnubehtet Áhčis mu nammii, dan son addá didjiide. ₂₄Dássážii dii ehpet leat átnon maidege mu nammii. Átnot, de oažžubehtet, vai din illu šaddá ollisin.

₂₅Dán mun lean sárdnon didjiide veardádusaiguin. Boahtá áigi go mun in sártno didjiide šat veardádusaiguin, muhto čielga sániiguin sártnun Áhči birra. ₂₆Dan beaivvi dii átnubehtet mu nammii. Mun in cealkke ahte rohkadalan Áhči din ovddas, ₂₇dasgo Áhčči ieš ráhkista din, danne go dii lehpet ráhkistan mu ja oskon ahte mun lean boahtán Ipmila luhtte. ₂₈ Áhči luhtte mun lean vuolgán ja boahtán dán máilbmái, ja dál mun guođán máilmmi ja manan ruoktot Áhči lusa.”

₂₉Máhttájeaddjit dadje: “Dál don sártnut čielga sániiguin itge veardádusaiguin. ₃₀Dál mii ipmirdit ahte don dieđát buot itge dárbbaš vuordit ahte guhtege dus jearrá. Danne mii oskut ahte don leat boahtán Ipmila luhtte.”

₃₁Jesus vástidii: “Dál dii oskubehtet. ₃₂Áigi boahtá, ja lea juo boahtán, go dii bieđganehpet, iešguhtege guvlosis, ja guođđibehtet mu okto. In mun dattetge leat okto, dainna go Áhčči lea muinna. ₃₃Mun lean sárdnon didjiide dán, vai dis livččii ráfi mu siste. Máilmmis dis lea áŧestus, muhto lehket dorvvolaččat: Mun lean vuoitán máilmmi.”