Johannes 18

₁Go Jesus lei dán sárdnon, de son vulggii máhttájeddjiidisguin Kedronjogaža nuppe beallái. Doppe lei gilvvagárdi, ja Jesus ja su máhttájeaddjit manne dohko. ₂Judas gii behtii su, diđii maid dan báikki, danne go Jesus ja su máhttájeaddjit ledje čoahkkanan dohko dávjá. ₃Judas válddii mielddis fáktajoavkku ja muhtun olbmáid geaid lei ožžon bajimusbáhpain ja farisealaččain, ja sii bohte gilvvagárdái spáidarat, lámppát ja vearjjut gieđas.

₄Jesus diđii buot mii sutnje dáhpáhuvvá. Son manai olbmáid ovddal ja jearai: “Gean dii ohcabehtet?” ₅Olbmát vástidedje: “Jesusa, nasaretlačča.” Jesus celkkii: “Mun dat lean.” Olbmáid mielde lei maiddái Judas gii behtii su. ₆Go Jesus celkkii: “Mun dat lean”, de sii buohkat murdiledje ja gahčče eatnamii. ₇Jesus jearai fas: “Gean dii ohcabehtet?” Sii dadje: “Jesusa, nasaretlačča.” ₈Jesus celkkii: “Almma mun celken ahte mun dat lean. Jos dii lehpet mu ohcamin, de diktet dáid earáid mannat.” ₉Nu ollašuvve su iežas sániid: “Mun in leat massán ovttage dain geaid don leat oskkildan munnje.”

₁₀Simon Peteris lei miehkki. Son rohttii dan ja čuohpastii bajimusbáhpa bálvaleaddjis eret olgeš bealji; bálvaleaddji namma lei Malkos. ₁₁Muhto Jesus celkkii Peterii: “Nahket miehkát dohppii. Ingo mun jugaše dan geara maid Áhčči lea munnje addán?”

₁₂Fávttat, sin oaivámuš ja olbmát geaid juvddálaččat ledje vuolggahan, dohppejedje dál Jesusa, čatne su ₁₃ja dolvo su vuos Hannasa lusa. Son lei dan jagáš bajimusbáhpa Kaifasa vuohppa. ₁₄Aiddo Kaifas lei addán juvddálaččaide neavvaga ahte livččii buoremus, jos okta olmmái jámášii oppa álbmoga ovddas.

₁₅Simon Peter ja muhtun eará máhttájeaddji manaiga Jesusa maŋis. Dat nubbi máhttájeaddji lei oahpis bajimusbáhppii ja beasai danin Jesusa mielde bajimusbáhpa gárdima šilljui. ₁₆Peter bázii čuožžut poartta olggobeallái, muhto máhttájeaddji gii lei oahpis bajimusbáhppii, manai sárdnut bálvaleaddjinieiddain gii lei fáktemin poartta, ja buvttii Petera sisa šilljui. ₁₇Nieida gii lei fáktemin poartta, dajai Peterii: “Itgo donnai leat okta dan olbmá máhttájeddjiin?” Peter vástidii: “In leat.” ₁₈Lei čoaskkis, ja bálvaleaddjit ja fávttat ledje cahkkehan hilladola ja liekkadalle dollagáttis. Peter maid čuoččui sin gaskkas ja liggii iežas.

₁₉Bajimusbáhppa jearai Jesusis su máhttájeddjiid ja oahpahusa birra. ₂₀Jesus vástidii: “Mun lean sárdnon albmosit, oppa máilmmi gullut. Mun lean álo oahpahan synagogain ja tempelis, buot juvddálaččaid čoahkkananbáikkiin. Čihkosis mun in leat sárdnon maidege. ₂₁Manne don jearat mus? Jeara baicca mu guldaleddjiin maid mun lean sárdnon sidjiide. Sii gal dihtet maid mun lean cealkán.” ₂₂Muhto go son lei sárdnumin, de muhtun fákta gii čuoččui das, doaškalii Jesusa njálmmi vuostá ja dajai: “Niego don vástidat bajimusbáhppii?” ₂₃Jesus celkkii olbmái: “Jos mun sárdnon juoidá boastut, de muital mii dat lei. Muhto jos mun sárdnon riekta, de manne don doaškalat mu?” ₂₄Hannas vuolggahii Jesusa čatnagasas bajimusbáhppa Kaifasa lusa.

₂₅Simon Peter čuoččui liekkadallamin. Olbmát jerre sus: “Itgo don leat okta su máhttájeddjiin?” Peter biehttalii: “In leat.” ₂₆Muhto muhtun bajimusbáhpa bálvaleaddji, dan olbmá fuolki geas Peter lei čuohpastan bealji eret, dajai: “Gal mun oidnen du gilvvagárddis ovttas suinna.” ₂₇ Peter biehttalii fas, ja seammás biškkádii vuoncávaris.

₂₈ Kaifasa luhtte Jesus dolvojuvvui eatnanhearrá šlohttii. Lei árra iđit. Juvddálaččat eai ieža mannan sisa šlohttii, amaset šaddat buhtismeahttumin, go dalle sii eai sáhtáše borrat beassášmállásiid. ₂₉De Pilatus bođii olggos sin lusa ja jearai: “Maid váidámušaid dii atnibehtet dán olbmá vuostá?” ₃₀Sii vástidedje: “Jos son ii livčče vearredahkki, de mii eat attáše su du gihtii.” ₃₁Pilatus dajai: “De váldet dii ieža su ja dubmejehket su iežadet lága mielde.” Muhto juvddálaččat dadje: “Mis ii leat lohpi goddit guđege.” ₃₂Ná dáhpáhuvai, vai Jesusa sánit ollašuvvet. Son lei ovdal dovddahan mainna lágiin son jápmá.

₃₃Pilatus máhcai fas šlohttii, gohčui buktit Jesusa iežas ovdii ja jearai sus: “Leatgo don juvddálaččaid gonagas?” ₃₄Jesus vástidii: “Dajatgo don dán iešalddát, vai leatgo earrásat dadjan dan mu birra?” ₃₅Pilatus dajai: “Leango mun juvddálaš? Du iežat álbmot ja bajimusbáhpat leat addán du mu gihtii. Maid don leat dahkan?” ₃₆Jesus vástidii: “Mu riika ii leat dán máilmmis. Jos mu riika livččii dán máilmmis, de mu olbmát livčče soahtan mu ovddas, aman addojuvvot juvddálaččaid gihtii. Muhto mu riika ii leat dán máilmmis.” ₃₇Pilatus jearai: “De don almmatge leat gonagas?” Jesus vástidii: “Don dajat ieš ahte mun lean gonagas. Dan várás mun lean riegádan ja dan várás boahtán máilbmái, vai duođaštan duohtavuođa birra. Juohkehaš gii lea duohtavuođas, gullá mu jiena.” ₃₈Pilatus jearai: “Mii lea duohtavuohta?”

Dasto son manai fas olggos juvddálaččaid lusa ja dajai sidjiide: “Mun in gávnnat su sivalažžan mange rihkkosii. ₃₉Muhto vierrunhan lea ahte mun beassážiidda luoittán didjiide luovus soapmása. Dáhttubehtetgo ahte mun luoittán luovus juvddálaččaid gonagasa?” ₄₀Dalle sii čuorvugohte: “Ale su, muhto Barabbasa!” – Barabbas lei rievvár.