Job 19

₂Man guhká dii áigubehtet áŧestit mu,

cuovkut mu sániideattetguin?

₃Logi geardde dii lehpet hiddjidan mu,

ehpet heahpanatta deaddimis mu vuolás.

₄Jos mun duođaid livččen čádjidan,

de dat livččii mu iežan ášši.

₅Juos dii áigubehtet čeavlástallat

mu vuostá,

de čájehehket ahte mun

lean ánssášan dan heahpada!

₆Dihtet: Ipmil lea dahkan munnje veriid,

son lea bidjan fierpmis mu birra.

₇Mun čuorvvun: “Veahkaváldi!”

muhto in oaččo vástádusa,

mun bárggun, muhto vuoigatvuohta ii leat.

₈Son lea áidon gitta mu geainnu,

mun in beasa šat ovdan,

son lea bidjan mu bálgáide seavdnjatvuođa.

₉Son lea nuollan mus árvvu,

son lea váldán mu oaivvis gudnegierddu.

₁₀Son gaikkoda mu áibbas,

son rohtte mus doaivvu

dego muora eatnamis.

₁₁Son diktá moaris cahkiidit mu vuostá,

son atná mu vašálažžanis.

₁₂Su joavkkut fallehit oktanaga,

dat bahkkejit mu vuostá

ja birastahttet mu goađi.

₁₃Son lea gáidadan mus mu vieljaid,

mu oahpes olbmot leat šaddan

munnje áibbas amasin.

₁₄Mu lagamuččat ja oahppásat leat jávkan,

mu dálu olbmot leat vajáldahttán mu.

₁₅Mu bálvaleaddjinissonat amašit mu,

mun lean sin čalmmiin vierroolmmoš.

₁₆Jos mun rávkkan bálvaleaddján,

de son ii vástit,

ii vaikko mun ánun ja rohkadalan.

₁₇Mu vuoiŋŋahat lea bahča áhkkásan,

mu hádja lea guohca iežan olbmuide.

₁₈Velá mánátge futnot mu.

Go mun sárdnugoađán,

de sii leat njálbmumin.

₁₉Buot mu lagamus ustibat fasttášit mu,

datnai geaid mun ráhkistin,

jorgalit mu vuostá.

₂₀Mun lean dušše liiki ja dávttit,

illá mun birgehan iežan heakka.

₂₁Árkkálmastet mu, árkkálmastet,

dii geat lehpet mu ustibat,

dasgo Ipmila giehta lea guoskkahan mu.

₂₂Manne dii doarrádallabehtet mu,

dego Ipmil,

ehpetge gallán mu oaččis?

₂₃Vare mu sánit čállojuvvošedje muitui,

vare dat sárgojuvvošedje čálusin,

₂₄vare dat gohppojuvvošedje báktái

agibeaivái ruovderiffaliin ja lajuin!

₂₅Mun dieđán ahte mu lonisteaddji eallá,

ja loahpas son boahtá eatnama ala.

₂₆Go mu liiki lea duššan

ja mu oažži nohkan,

de mun beasan oaidnit Ipmila,

₂₇mun beasan geahččat su

iežan čalmmiiguin:

Son ii leat munnje vieris.

Ohcaleapmi loaktá mu siskkildasa!

₂₈Dii dadjabehtet:

“Mii áigut doarrádallat su,

son lea lihkuhisvuođa ruohtas.”

₂₉Ballet dalle miehkis,

dasgo moarri lea suddu

mii ráŋggáštuvvo jápmimiin.

Dihtet ahte duopmu lea.