Job 3

₃Vare duššašii dat beaivi

go mun riegádin,

dat idja go daddjojuvvui: “Bártnáš!”

₄Vare dat beaivi šattašii seavdnjadassan,

allos Ipmil allagasas jerro dan

allosge čuovga báito dasa.

₅Vare mosku ja seavdnjadas

gáibidivččii dan ruoktot,

vare balvvat govččašedje

ja sevnnjodeapmi suorggahivččii dan.

₆Vare seavdnjadeamos seavdnjatvuohta

njielašii dan ija,

allos dat lohkkojuvvojehko

jagi beivviid lohkui,

biehttalehkoset buot mánut das saji.

₇Vare dat idja šattašii šattoheapmin,

allos das gullojehko ávvudeapmi.

₈Vare dan beaivvi garuhivčče

lihkohisvuođa beivviid mánideaddjit,

dat geat máhttet

mánidit ovdan Leviatana.

₉Vare dan iđitnásttit sevnnjodivčče,

vurdos dat čuovgga duššás,

allos dat oidno iđedisroađi

rahpamin čalmmiid,

₁₀danin go dat ii dahppan

eatniheakka uvssaid mu ovddas

iige čiehkan mu čalmmiin váivvi.

₁₁Manne mun in jápmán

juo dalle go riegádin,

dalle go bohten eadnán goaŧus?

₁₂Manne lei aski mii válddii mu vuostá,

manne čiččit maid ožžon njammat?

₁₃Mun livččen dál

veallámin mášus ja oađđimin ráfis

₁₄gonagasaiguin ja stuorráiguin,

daiguin geat huksejedje gávpogiid

mat dál leat čievračopman.

₁₅Mun livččen vuoiŋŋadeamen

oaivámuččaiguin,

daiguin geain lei golli,

geat devde viesuideaset silbbain.

₁₆Manin mun in riegádan

ovdaláigásaš ohkin

ja roggojuvvon eatnamii,

dego mánná mii ii goassege

oaidnán beaivečuovgga?

₁₇Doppe eai šat šláma

ipmilmeahttumat,

doppe vuoiŋŋadit dat

geat leat massán fámuset.

₁₈Doppe fáŋggain lea máššu,

eai sii šat gula fálddiid jiena.

₁₉Doppe leat smávvát ja stuorrát,

doppe šlávva lea friddja isidisttis.

₂₀Manin gillájeddjiide

addojuvvo čuovga,

manin eallin dorvvuhemiide,

₂₁daidda geat duššás vurdet jápmima

ja ohcet dan eambbo

go čihkkojuvvon dávviriid,

₂₂daidda geat illudivčče sakka

ja ávvudivčče, jos gávnnašedje hávddi?

₂₃Manne eallá olmmái

gean geaidnu lea láhppon,

gean bálgáid Ipmil lea dahppan?

₂₄Šuohkáhusat leat šaddan

mu beaivválaš láibin,

mu váidalusat golget boršu čáhcin.

₂₅Mu deaividii dat mas mun ballen,

dat mas mun soigen, lea joksan mu.

₂₆Ii leat mus ráfi, ii máššu

iige vuoiŋŋadus,

dušše váivi ja giksi.