Job 8

₂Man guhká don sártnut diekkáraččaid?

Du sánithan leat dego garra biegga.

₃Botnjágo Ipmil vuoigatvuođa?

Botnjágo Buotveagalaš rievtti?

₄Jos du mánát suddudedje su vuostá,

de sii šadde gillát rihkkumiiddiset dihte.

₅Muhto jos don ieš ozat Ipmila,

jos ánut Buotveagalaččas árpmu

₆ja leat buhtis ja vuoiggalaš,

de son gal veahkeha du,

ja don oaččut fas dan

mii dutnje rievttuid gullá,

₇ja du ovddit dilli lea headju dan ektui

maid vel oaččut.

₈Jeara dain geat ledje ovdal min,

váldde vuhtii maid min áhčit gávnnahedje.

₉Miihan leat ievttáža mánát

eat dieđe maidege,

min beaivvit eatnama alde

leat dego suoivvan.

₁₀Muhto min áhčit oahpahit du

ja sárdnot dutnje,

sii muitalit dutnje iežaset dieđu.

₁₁Šaddágo papyrus allagin

doppe gos ii leat suotnju,

guhkkugo lukti almmá čázi haga?

₁₂Dathan goiká ovdal buot eará rásiid,

dallán go lea ihtán,

ovdal go dan sáhttá čuohppat.

₁₃Nu geavvá buohkaide

geat vajáldahttet Ipmila.

Ipmilmeahttuma doaivu duššá.

₁₄Son dorvvasta seakka árpui,

son ohcá oadjebasvuođa heavnnifierpmis.

₁₅Jos son mieigá dan njeaiga,

de son gahččá,

jos son doallá das gitta, de son jorrala.

₁₆Son ceaggá beaivvadagas

dego lastás muorra man oavssit

leabbanit miehtá gilvvagárddi,

₁₇man ruohttasat šaddet juvvii

ja bahkkejit geđggiid gaskii.

₁₈Muhto go son gaikkihuvvo eret,

de sadji gos son šattai,

biehttala su ja dadjá:

“Mun in leat goassege oaidnán su.”

₁₉Dies lei su illu,

ja earrásat bohciidit muolddas.

₂₀Ipmil ii hilggo láitemeahttuma,

ii son doarjjo bahás olbmuid.

₂₁Ohpit son diktá du boagustit,,

diktá du illudit ja ávvudit.

₂₂Du vašuheddjiide gárvvuhuvvo heahpat,

iige ipmilmeahttumiid goahti šat leat.