Joel 2

₁Bossot dorvve Sionis,

bajidehket soahtečuorvasa

mu bassi váris,

vai buot eatnama olbmot

doarggistit balus!

Dasgo Hearrá beaivi lea lahka,

dat boahtá,

₂seavdnjada ja moskku beaivi,

balvvaid ja mierkká beaivi!

Nugo iđitroađđi leavvá várrái,

nu boahtá stuorra

ja veagalaš álbmot.

Dan láhkásaš ii leat leamaš goassege

iige šatta boahtti buolvvaid áiggege.

₃Dolla duššada dan ovdal,

njuoršu dollanjuokčamat

dan maŋŋil.

Dan ovdal eanan lea

dego Edena gilvvagárdi,

dan maŋŋil dego

jápma meahcci;

ii mihkkege seastašuva.

₄Dat leat oaidnit dego heasttat,

soahteheasttaid láhkái

dat mannet ovddos.

₅Dat hurget ráđa várrečilggiid

dego soahtevovnnat,

dego dolla mii ruohčá oalggain,

dego stuorra veahka,

soahtái ráhkkanan.

₆Álbmogat doarggistit daid ovddas,

buohkaid muođut šovkkodit.

₇Dego soahteolbmát

dat mannet ovdan,

nugo sáŋgárat dat gorgŋot

muvrraid ala.

Juohkehaš manná njuolga ovddos,

ii oktage spiehkas geainnustis.

₈Dat eai nordda

guhtet guimmiideaset,

juohkehaš manná njuolga ovddos.

Dat fallehit njuollaborgga čađa,

dat eai leat orustahttimis.

₉Dat mannet gáhča gávpogii,

fallehit badjel muvrra,

bahkkejit viesuide,

čákŋet láseráiggiid

dego suollagat.

₁₀Eanan doarggista

daid ovdal,

albmi rabaida.

Beaivváš ja mánnu sevnnjodit,

násttit masset šearratvuođaset.

₁₁Hearrá jietna jupmá

su soahteveaga ovdal,

fámolaš lea su veahka,

olusat dat mat doaimmahit

su sáni.

Hearrá beaivi lea stuoris

ja hirbmatlaš.

Gii sáhttá dan gierdat?

₁₂Muhto velá dálge, cealká Hearrá,

jorgalehket mu beallái

oppa váimmus,

fástudemiin, čierrumiin

ja váidalemiin.

₁₃Gaikkodehket váimmodet

alletge biktasiiddádet,

ja jorgalehket Hearrá,

Ipmileattet, beallái!

Son lea árbmugas ja váibmoláđis,

son lea guhkesmielalaš

ja su buorrevuohta lea stuoris.

Son gáhtá, nu ahte lihkuhisvuohta

ii boađe.

₁₄Gii diehtá?

Son sáhttá jorggihit ja gáhtat

ja diktit buressivdnádusa bissut.

Dalle dii sáhttibehtet fas

buktit borramušoaffara

ja juhkamušoaffara Hearrái,

Ipmilasadet.

₁₅Bossot dorvve Sionis,

gulahehket fásttu,

almmuhehket bassi čoagganeami!

₁₆Gohččot álbmoga boahtit,

gulahehket bassi čoagganeami,

rávket vuorrasiid,

čohkkejehket mánážiid

ja njammimánáid!

Vulgos irgi lanjastis

ja moarsi gámmáristtis!

₁₇Báhpat čirrot ovdahálla

ja áltára gaskkas,

Hearrá bálvaleaddjit dadjet:

“Hearrá, seastte álbmogat!

Ale atte iežat olbmuid

hiddjiduvvot,

nu ahte sii šaddet sátnevájasin

álbmogiid gaskkas.

Manne álbmogat beasašedje dadjat:

Gos lea din Ipmil?”

₁₈Dalle Hearrá šattai áŋgirin

eatnamis dihte,

son árpmihii iežas álbmoga.

₁₉Hearrá vástidii álbmogasas:

Mun vuolggahan didjiide gortni,

viinni ja oljju,

vai dii gallánehpet.

In mun šat suova vierroálbmogiid

hiddjidit din.

₂₀Vašálačča mii boahtá davvin,

mun áján din luhtte eret.

Mun doalvvun sin goike

ja ávdin eatnamii,

njunnoša nuorttabeale

meara rádjái,

maŋŋoša oarjjabeale

meara rádjái.

Sus badjána hádja,

dan bahča hádja leavvá.

Stuorra daguid sii leat dahkan!

₂₁Ale bala, eanan;

ávvut ja illut,

dasgo Hearrá lea dahkan

stuorra daguid!

₂₂Allet bala, meahcieallit,

dasgo meahci guohtumat

runiidit,

muorat šaddadit šattuid ja

fiikonmuorat ja viidnemuorat

addet valljugas šattu.

₂₃Ávvudehket, Siona mánát,

illudehket Hearrás, Ipmilis!

Vanhurskkisvuođastis

son addá didjiide čakčaarvvi,

son vuolggaha didjiide arvvi,

čakčaarvvi ja giđđaarvvi

nugo ovdal.

₂₄Dalle gordneráidnensajiin

lea dievva gordni,

viidni ja olju golgá badjel

bohčingáriid ravddaid.

₂₅Mun buhtten didjiide

daid jagiid maid rásselohkku,

jursi, borri ja muohcu stajidedje

– mu stuorra veahka maid mun

vuolggahin din vuostá.

₂₆Dii beassabehtet borrat

ja gallánit ja máidnut Hearrá,

Ipmileattet,

guhte lea meannudan

dinguin ovddolaččat.

Ii goassege šat mu álbmot

šatta heahpadii.

₂₇Dii beassabehtet dovdat

ahte mun lean gasku Israela,

ahte mun lean din Hearrá,

din Ipmil, mun iige oktage eará.

Mu álbmot ii šat

goassege šatta heahpadii.