Judas 1

₁Judas, Jesus Kristusa bálvaleaddji, Jakoba viellja, dearvvaha rávkojuvvon olbmuid geaid Ipmil, min Áhčči, ráhkista ja várjala Jesus Kristusa dihte.

₂Šaddos váibmoláđisvuohta, ráfi ja ráhkisvuohta din oassin ain valljugasabun!

₃Ráhkis ustibiiddán! Mus lea leamaš stuorra hállu čállit didjiide min oktasaš bestojumi birra, ja dál mun gávnnahin dárbbašlažžan rávvet din soahtat dan oskku ovddas mii ovtta geardde lea addojuvvon bassi olbmuide. ₄Din searvái leat namalassii čákŋan muhtun olbmot geaid duopmu áigá juo lea leamaš čállojuvvon. Sii leat ipmilmeahttun olbmot ja atnet boastut Ipmila árpmu vai besset eallit nuoskivuođas, ja sii biehttalit min áidna ráđđejeaddji ja hearrá, Jesus Kristusa.

₅Vaikko dii dan juo diehtibehtet, de mun dattetge dáhtun muittuhit din ahte Hearrá gal vuohččan besttii iežas álbmoga Egyptas, muhto dasto maŋŋil duššadii daid geat eai oskon. ₆Ja daid eŋgeliid geat eai várjalan alla árvvuset muhto hilgo iežaset orrunsaji, son doallá seavdnjadasas agálaš láhkkiin duomu stuorra beaivvi várás. ₇Nie geavai maiddái Sodomai ja Gomorrai ja daid ránnjágávpogiidda mat seammá láhkái jorraledje nuoskivuhtii ja ealligohte himuin mat leat luonddu vuostá: Sii ráŋggáštuvvojedje agálaš dolain ja leat várrehusa ovdamearkan.

₈Dattetge dat villaheakkat dahket seammá láhkái. Sii nuoskkidit iežaset rupmaša, biehttalit Hearrá ja su válddi ja hiddjidit vuoigŋafámuid. ₉Ii velá bajimuseŋgel Mikaelge, dalle go lei beargalagain nákkáhallamin das goabbá oažžu Mosesa rupmaša, arvan hiddjidit ja dubmet su, muhto celkkii: “Ráŋgos Hearrá du!” ₁₀Muhto dát olbmot hiddjidit dan maid eai dovdda, ja dainna maid sii lunddolaččat, jierpmehis elliid láhkái, dovdet, sii bilidit iežaset. ₁₁Vuoi sin! Sii leat vádjolišgoahtán Kaina luottaid, bálkká dihte sii leat čádjidan Bileama geainnuide, Koraha láhkái sii leat stuibmidan ja duššet.

₁₂Dát olbmot leat dego heahpatlaš duolvvat, go sii din ráhkisvuođamállásiin leaicidit almmá heahpanattakeahttá. Sii leat báimmanat geat divššodit dušše iežaideaset. Sii leat čázehis balvvat maid biegga dolvvoda, muorat mat čakčat eai atte šaddosiid, guovtte geardái jápmán, ruohttasiin gaikojuvvon. ₁₃Sii leat ábi máraideaddji bárut geaid soarpagieran lea sin heahpat, čádjideaddji násttit maid agálaš seavdnjadas lea vuordimin. ₁₄Sin birra lea maid einnostan Henok, Adamis čihččet: “Geahča, Hearrá boahtá eatnat duhát basiidisguin ₁₅ja doallá duomu buohkaide. Son ráŋggášta buot ipmilmeahttumiid juohke vuoigatmeahttun dagus maid sii ipmilmeahttunvuođasteaset leat dahkan, ja buot garra ságain maid dát ipmilmeahttun suttolaččat leat sárdnon su vuostá.” ₁₆Sii nimmorit ja váidalit iežaset heajos oasi, muhto vádjolit iežaset anistumiid mielde. Sin ságat leat čeavlát, ja iežaset ávkki dihte sii guoktiluššet olbmuiguin.

₁₇Ráhkis ustibiiddán, muitet maid min Hearrá Jesus Kristusa apostalat ovdal leat sárdnon. ₁₈Sii celke didjiide ahte maŋimuš áiggiid bohtet bilkideaddjit geat vádjolit ipmilmeahttun anistumiideaset mielde. ₁₉Dát leat sii geat biđgejit olbmuid, sii leat máilmmálaččat iige sis leat Vuoigŋa. ₂₀Muhto huksejehket dii, ráhkkásiiddán, iežadet eallima basimus oskku vuođđudusa ala ja rohkadallet Bassi Vuoiŋŋas. ₂₁Bissot Ipmila ráhkisvuođas go vuordibehtet ahte min Hearrá Jesus Kristus árpmustis addá didjiide agálaš eallima. ₂₂Árpmihehket daid geat eahpidit ₂₃ja rohttejehket sin dolas. Muhto earáid galgabehtet árpmihit baluin, nu ahte fasttášehpet velá sin biktasiid maid oažži lea duolvadan.

₂₄Sutnje geas lea fápmu várjalit din jorraleamis ja bidjat din hearvásvuođas ovdii láitemeahttumin ja ávus, ₂₅áidna Ipmilii gii besttii min Hearrámet Jesus Kristusa bokte, sutnje gullá gudni ja allatvuohta, váldi ja fápmu ovdal áiggiid álggu, dál ja agálaš áigái! Amen.