Lukas 21

₁Jesus geahčastii tempelbumbbá guvlui ja oinnii, mo riggát bidje dasa attáldagaid. ₂Son oinnii maiddái mo geafes leaska bijai bumbái guokte uhca šlántteža. ₃Son celkkii: “Duođaid, mun cealkkán didjiide: Dát geafes leaska attii eambbo go oktage eará. ₄Earát adde das mii sis lea liiggás, muhto son attii geafivuođastis buot, oppa iežas eallámuša.”

₅Go muhtumat hervvošedje tempela, dan čáppa geđggiid ja attáldagaid, de Jesus celkkii: ₆“Bohtet beaivvit go ii báze geađgi geađggi ala das maid dál geahčadehpet, muhto visot gaikojuvvo eatnamii.”

₇Muhtumat jerre: “Oahpaheaddji, goas dát dáhpáhuvvá? Mii lea mearkan dasa ahte dat áigi lea boahtimin?” ₈Jesus celkkii:

“Váruhehket, amadet fillehallat. Eatnagat bohtet mu namas ja dadjet: Mun dat lean, ja: Áigi lea boahtán. Muhto allet vuolgge sin maŋŋái. ₉Ja go gullabehtet sođiid ja stuimmiid birra, de allet suorgan. Dasgo dát ferte vuos dáhpáhuvvat, muhto dalle ii leat vuos loahppa.” ₁₀Ja son celkkii sidjiide: “Álbmot čuožžila álbmoga vuostá ja riika riikka vuostá, ₁₁ja juohke bealde leat stuorra eanandoarggástusat, nealgi ja rohttudávddat. Suorggatlaš dáhpáhusat šaddet, ja almmis oidnojit stuorra mearkkat.

₁₂Muhto ovdal go buot dát dáhpáhuvvá, de sii doarrádallet din ja váldet din gitta. Dii dolvojuvvobehtet synagogaide dubmejuvvot ja bálkestuvvobehtet giddagassii, ja dii šaddabehtet gonagasaid ja eatnanhearráid gihtii mu nama dihte. ₁₃Dalle dii beassabehtet duođaštit. ₁₄Muitet ahte dii ehpet dárbbaš ovddalgihtii jurddašit mo bealuštehpet iežadet. ₁₅Dasgo mun attán didjiide sániid ja viisodaga man vuostá ii oktage din vuostálastiin sáhte nágget dahje cealkit. ₁₆Velá din vánhemat, vieljat, fuolkkit ja ustibat behttet din, ja muhtumat dis goddojuvvojit. ₁₇Buohkat vašuhit din mu nama dihte, ₁₈muhto ii vuoktačalbmige din oaivvis láhppo. ₁₉Lehket gierdavaččat, de vuoitibehtet alcceseattet eallima.

₂₀Go oaidnibehtet soahteveagaid birastahttimin Jerusalema, de dihtet dalle ahte gávpot fargga duššaduvvo. ₂₁Dalle fertejit buohkat geat ásset Judeas, báhtarit váriide. Dat geat leat gávpogis, fertejit vuolgit doppe, ja dat geat leat eananguovllus, eai oaččo boahtit gávpogii. ₂₂Dat lea ráŋggáštusa áigi, ja buot mii lea čállojuvvon, ollašuvvá. ₂₃Vuoi áhpehemiid ja njamaheddjiid daid beivviid! Dán eatnamii šaddá stuorra heahti, ja moarri deaivida dán álbmoga. ₂₄Máŋgasat goddojuvvojit miehkkeávjjuin, earát dolvojuvvojit fáŋgan buot álbmogiid gaskii ja vieris álbmogat dulbmot Jerusalema, dassážii go daidda addojuvvon áigi dievvá.

₂₅Beaivvážis, mánus ja násttiin oidnojit mearkkat. Ábi bárut márret, ja eatnama álbmogat áŧestuvvet eaige dieđe maid dahkat. ₂₆Olbmot vuoimmehuvvet balus go vurdet dan mii deaivida máilmmi olbmuid, danne go almmifámut lihkahuvvojit. ₂₇Dalle sii oidnet Olbmobártni boahtimin balvva alde stuorra fámus ja hearvásvuođas. ₂₈Go buot dát dáhpáhuvvagoahtá, de bajidehket roahkkadit oaivvi, dasgo din bestojupmi lahkana.”

₂₉Son muitalii sidjiide veardádusa: “Geahčadehket fiikonmuora dahje man ihkinassii muora. ₃₀Go dan urbbit luotkanišgohtet, de diehtibehtet ahte geassi lea juo lahka. ₃₁Nu diigis, go oaidnibehtet dán dáhpáhuvvamin, de diehtibehtet ahte Ipmila riika lea lahka. ₃₂Duođaid, mun cealkkán didjiide: Dát buolva ii jávkka ovdal go buot dát dáhpáhuvvá. ₃₃Albmi ja eanan duššet, muhto mu sánit eai goassege dušša.

₃₄Váruhehket, vai borešvuohta ja jugešvuohta dahje eallima váivvit eai losidahte din váimmu, nu ahte dat beaivi deaivida din fuomáškeahttá ₃₅ dego giella. Ii oktage gii ássá eatnama alde, vealtta dan beaivvis. ₃₆Gohcet dan dihte juohke áigge ja átnot alcceseattet fámu, vai ceavzibehtet buot das mii boahtá, ja bissubehtet Olbmobártni ovddas.”

₃₇Beivviid Jesus oahpahii olbmuid tempelis, muhto juohke eahkeda son vulggii doppe ja idjadii váris mii gohčoduvvo Oljovárrin. ₃₈Juo árrat iđedis olbmot bohte tempelii gullat su.