Nahum 1

₂Hearrá lea áŋgiris ja mávssaheaddji Ipmil.

Hearrá lea mávssaheaddji ja dievva moari.

Hearrá mávssaha vuostálastiidasas.

Vašálaččaidis son ii heaitte vašuheames.

₃Hearrá lea gierdavaš,

muhto su fápmu lea stuoris,

ii son guođe sivalačča ráŋggáškeahttá.

Riđus ja garra dálkkis manná su geaidnu,

balvvat leat su julggiid gavja.

₄Son šiggu meara ja goikada dan,

buot jogaid son dahká goikkisin.

Bašan ja Karmel vuoimmehuvvet,

Libanona lieđit goldnet.

₅Várit doarggistit su ovddas,

dievát suddet.

Hearrá duššada eatnama,

máilmmi ja buohkat geat orrot das.

₆Gii bihtá su vašis,

gii gierdá su buolli moari?

Su suhttu russu nugo dolla,

ja bávttit luoddanaddet su ovddas.

₇Hearrá lea buorre,

son lea suodji áŧestusa beaivvi.

Son atná fuola dain geat dorvvastit sutnje.

₈Nugo veagalaš dulvebárru

son duššada vuostálastiidis

ja ádjá vašálaččaidis seavdnjadassii.

₉Maid dii hutkabehtet Hearrá vuostái?

Son duššada vašálaččaid,

áŧestus ii deaivit din nuppádis.

₁₀Sii bullet dego bastilislátnjásorri,

dego oaksegihppu,

dego ollásit goikan oalggat.

₁₁Dus vulggii olmmái

gii hutkkai baháid Hearrá vuostá

ja attii bahádáhtolaš ráđiid.

₁₂Ná cealká Hearrá:

Sii leat gievrrat ja sii leat eatnagat,

muhto sii časkojuvvojit eatnamii ja duššet.

Mun lean givssidan du,

muhto in šat daga dan.

₁₃Dál mun doaján geassá

maid son bijai du niskái,

ja cuvken du láhkkiid.

₁₄Ná Hearrá lea mearridan

du hárrái, Ninive:

Du namma nohká.

Du tempelis mun duššadan

čuhppojuvvon ja leikejuvvon ipmilgovaid.

Mun ráhkadan dutnje hávddi,

don it leat šat mihkkege.