Nehemja 6

₁Go Sanballat, Tobia, arabalaš Gešem ja min eará vašálaččat gulle ahte mun ledjen geargan huksemis muvrra ođđasis, ja ahte das eai lean šat luoddaneamit – mun in gal lean velá bidjan uvssaid poarttaide – ₂de Sanballat ja Gešem bijaiga munnje sáni: “Deaivvadehkot Kefirimis Onoleagis.” Muhto soai áigguiga dahkat munnje baháid. ₃Mun vuolggahin áirasiid sudno lusa ja cealkkihin: “Mus lea stuorra bargu gaskan, inge mun sáhte boahtit. Bargu gaskkalduvvá jos mun guođán dan ja vuolggán dudno lusa.” ₄Njealji geardde sii vuolggahedje munnje seammá sáni, ja juohke háve mun vástidin seammá láhkái. ₅Viđát geardde Sanballat vuolggahii munnje sullasaš sáni, muhto dál su bálvaleaddjis lei mielde rabas reive ₆masa lei čállojuvvon: “Álbmogiid gaskkas beaggá, ja maiddái Gešem dadjá dan, ahte don ovttas juvddálaččaiguin áiggut stuimmáskit. Danin don leat huksemin muvrra. Beaggá maid ahte don leat viggamin sin gonagassan ₇ja ahte leat bidjan muhtun profehtaid čuorvut iežat Jerusalemis Juda gonagassan. Dákkár beaggin gullo vissásit gonagasa beljiide. Boađe dan dihte ráđđádallat minguin!”

₈Muhto mun vuolggahin Sanballatii sáni: “Dát du čuoččuhusat eai leat duođat. Don leat ieš hutkan daid.” ₉Buohkat oainnat geahččaledje baldalit min. Sii navde min heaittihit barggu ja guođđit dan gaskan, muhto mun baicce ožžon ođđa návccaid.

₁₀Mun mannen deaivvadit Šemajain, Delaja bártniin, Mehetabela áddjubiin, gii bisui iežas dálu siste. Son dajai: “Mannu ovttas Ipmila vissui, tempela sisa, ja dahppu dan uvssaid. Muđui sii bohtet ihkku goddit du.”

₁₁Muhto mun dadjen: “Báhtarivččiigo mu lágán olmmái? Ja mo sáhtášii mu lágán olmmái mannat tempelii ja dattetge bissut heakkas? Mun in mana.” ₁₂Mun árvidin ahte Ipmil ii lean vuolggahan su. Son dajai dán profehtasáni mu birra danne go Tobia ja Sanballat leigga bálkáhan su. ₁₃Son lei bálkáhuvvon baldit mu, vai mun suorganivččen ja dagašin nu ja suddudivččen. Nu mun livččen ožžon bahás beaggima, ja sii livčče beassan bilkidit mu.

₁₄Ipmilan, muitte maid Tobia ja Sanballat leaba dahkan, ja maiddái profehtanisson Noadja ja eará profehtat geat vigge baldalit mu.

₁₅Muvra šattai gárvvisin vihttalogiguokte beaivvi maŋŋil go leimmet álggahan barggu, elulmánu guoktelogiviđát beaivvi. ₁₆Go buot min vašálaččat gulle dan, ja buot min birasálbmogat oidne dan, de dat orui sin mielas leamen oavdudahku. Sii ipmirdedje ahte dát bargu lei dahkkojuvvon min Ipmila vehkiin.

₁₇Daid áiggiid Juda hearrát sáddejedje ollu reivviid Tobiai, ja Tobia fas sidjiide. ₁₈Válli čanai eatnat Juda olbmáid sutnje, son lei oainnat Šekanja, Araha bártni, vivva, ja su bártni Johanana áhkká lei Mešullama, Berekja bártni, nieida. ₁₉Sii máidno Tobia munnje ja muitaledje dasto sutnje maid mun ledjen dadjan. Tobia sáddii munnje reivviid main son vikkai baldalit mu.