4. Mosesgirji 19

₁Hearrá sártnui Mosesii ja Aronii:

₂Dát lea láhkamearrádus maid Hearrá ásahii: Gohčo israellaččaid buktit rukses guiggu mii lea almmá vigi ja máinni haga, ja man ala geasis ii leat vel biddjojuvvon. ₃Doai galgabeahtti addit guiggu báhppa Elasarii, ja dan galgá dasto doalvut siidda olggobeallái ja njuovvat su oaidnut. ₄Báhppa Elasar galgá váldit dan vara surbmii ja riškkuhit dan čieža geardde almmustusgoađi ovddabeallái. ₅De guigu galgá boldojuvvot su oaidnut oktan náhkiin, biergguiguin, varain ja gubmuiguin. ₆Báhppa galgá váldit sedera, isopa ja karmosinrukses ullu ja bálkestit daid dollii mas guigu buollá. ₇Son galgá bassat biktasiiddis ja lávggodit, ja de son oažžu boahtit fas siidii, muhto son lea buhtismeahttun eahkeda rádjái. ₈Dat gii bolddii guiggu, galgá maid bassat biktasiiddis ja lávggodit, muhto sonnai lea buhtismeahttun eahkeda rádjái. ₉Ja muhtun buhtis olmmái galgá čoaggit guiggu gunaid ja doalvut daid siidda olggobeallái buhtis báikái. Israellaččaid searvegoddi galgá atnit gunaid áimmuin ja atnit daid buhtistančáhcái. Dát lea suddooaffar. ₁₀Dat gii čokkii guiggu gunaid, galgá bassat biktasiiddis, ja son lea buhtismeahttun eahkeda rádjái. Dát lea agálaš láhka israellaččaide ja vierrásiidda geat ásset sin gaskkas.

₁₁Dat gii guoská jábmi rupmašii, lea buhtismeahttun čieža beaivvi. ₁₂Son galgá buhtistit iežas daiguin gunaiguin goalmmát ja čihččet beaivvi, ja de son lea buhtis. Jos son ii buhtis iežas goalmmát ja čihččet beaivvi, de son ii šatta buhtisin. ₁₃Juohkehaš gii guoská jábmi rupmašii iige buhtis iežas, dahká Hearrá goađi buhtismeahttumin, ja son galgá jávkaduvvot Israelis. Danne go buhtistančáhci ii leat riškkuhuvvon su ala, de son báhcá buhtismeahttumin.

₁₄Dát lea láhka: Go muhtun olmmoš jápmá goahtái, de juohkehaš gii manná goahtái ja juohkehaš gii lea goađis, lea buhtismeahttun čieža beaivvi. ₁₅Juohke rabas lihtti mii ii leat gokčojuvvon, lea buhtismeahttun. ₁₆Juohkehaš gii olgun guoská muhtumii gii lea goddojuvvon mihkiin dahje lea jápmán eará láhkái, dahje olbmo dávttiide dahje hávdái, lea buhtismeahttun čieža beaivvi. ₁₇Buhtismeahttun olbmo buhtisteami várás galgá váldit boldojuvvon suddooaffara gunaid ja seaguhit daid ráinnas čáhcái lihtis. ₁₈Dasto muhtin buhtis olmmái galgá váldit isopa, buonjostit dan čázis ja riškkuhit čázi goađi ja buot lihtiid ala ja daid olbmuid ala geat ledje goađis ja su ala gii lea guoskan dávttiide, goddojuvvon olbmui dahje olbmui gii lea jápmán eará láhkái, dahje hávdái. ₁₉Buhtis olmmái galgá riškkuhit buhtistančázi buhtismeahttun olbmo ala goalmmát ja čihččet beaivvi. Čihččet beaivvi son dahká su buhtisin. Dalle buhtistuvvon olmmoš galgá bassat biktasiiddis ja lávggodit čázis, ja eahkedis son lea buhtis. ₂₀Muhto dat gii šaddá buhtismeahttumin iige buhtis iežas, galgá jávkaduvvot searvegottis, danne go son lea dahkan Hearrá bassibáikki buhtismeahttumin. Buhtistančáhci ii leat riškkuhuvvon su ala, son lea buhtismeahttun. ₂₁Dát lea álbmogii agálaš láhka.

Dat gii riškkuhii buhtistančázi, galgá bassat biktasiiddis, ja juohkehaš gii guoská buhtistančáhcái, lea buhtismeahttun eahkeda rádjái. ₂₂Buot masa buhtismeahttun olmmoš guoská, šaddá buhtismeahttumin, ja dat gii guoská sutnje, lea buhtismeahttun eahkeda rádjái.