4. Mosesgirji 3

₁Dan áigge go Hearrá sártnui Mosesiin Sinaiváris, de Arona ja Mosesa sohkii gulle dát olbmát: ₂Arona bártnit ledje Nadab, vuosttašriegádeaddji, ja Abihu, Elasar ja Itamar. ₃Dát ledje Arona bártnit geat ledje vuidojuvvon ja vihahuvvon bálvalit báhppan. ₄Muhto Hearrá divttii Nadaba ja Abihu jápmit, danin go Sinaimeahcis soai buvttiiga vieris dola Hearrá muođuid ovdii. Sudnos eai lean bártnit. Danin dušše Elasar ja Itamar bálvaleigga ain báhppan áhčiska Arona geahčus.

₅Hearrá sártnui Mosesii:

₆Rávkka čoahkkái Levi čeardda olbmáid ja doalvvo sin báhppa Arona lusa. Sii galget leat su bálvaleaddjit ₇ja atnit su ja oppa searvegotti beales daid doaimmaid maid galgá doaimmahit almmustusgoađi ovddas. ₈Sii galget atnit váras buot almmustusgoađi biergasiid ja doaimmahit goađis daid doaimmaid mat leat mearriduvvon israellaččaide. ₉Bija levilaččaid bálvalit Arona ja su bártniid, danin go sii leat israellaččain dat geat leat addojuvvon Aronii veahkkin. ₁₀Gohčo Arona ja su bártniid atnit váras báhpavirggiset, muhto juohke olggobealolmmoš gii dasa seahkána, galgá goddojuvvot.

₁₁Hearrá sártnui Mosesii:

₁₂Mun lean čuoldán levilaččaid eará israellaččain buot israellaččaid vuosttašriegádeddjiid sadjái, daid sadjái geat vuosttažin rahpet eatniset goaŧu. Levilaččat leat mu, ₁₃danin go buot vuosttašriegádeaddjit gullet munnje. Dan beaivvi go mun časken jámas buot vuosttašriegádeddjiid Egyptas, de mun basuhin alccesan buot Israela vuosttašriegádeddjiid, sihke olbmuid ja omiid vuosttašriegádeddjiid. Dat gullet munnje. Mun lean Hearrá.

₁₄Hearrá sártnui Mosesii Sinaimeahcis:

₁₅Loga ja geahčat Levi náli sogaid mielde ja bearrašiid mielde. Galggat geahčadit buot olbmábeale mánnosaččaid rájes.

₁₆Ja Moses geahčadii sin dan gohččuma mielde maid lei ožžon Hearrás.

₁₇Levi bártnit ledje Geršon, Kehat ja Merari. ₁₈Geršona bártnit ja sin sogat ledje Libni ja Šimi. ₁₉Kehata bártnit ja sin sogat ledje Amram, Jishar, Hebron ja Ussiel. ₂₀Merari bártnit ja sin sogat ledje Mahli ja Muši. Dát ledje levilaččaid sogat, bearrašiid mielde.

₂₁Geršonis surggiidedje Libni ja Šimi sogat. Dát ledje geršonlaččaid sogat. ₂₂Dat geat lohkkojuvvojedje ja geahčaduvvojedje, buot olbmábealle mánnosaččaid rájes, ledje buohkanassii čiežaduhát vihttačuođi. ₂₃Geršonlaččaid sogaid siida lei goađi duohken, oarjjabealde, ₂₄ja sin bearrašiid oaivámuš lei Eljasaf, Laela bárdni. ₂₅Geršonlaččaid bargu lei atnit váras almmustusgoađi, dan loavdagiid, goađi gokčasiid, almmustusgoađi uvssa gokčasa, ₂₆ovdašilju loavdagiid, ovdašilju uvssa gokčasa, ovdašilju mii lei goađi ja áltára birra, báttiid ja buot doaimmaid mat dasa gulle.

₂₇Kehatis surggiidedje Amrama, Jishara, Hebrona ja Ussiela sogat. Dát ledje kehatlaččaid sogat. ₂₈Olbmábealle mánnosaččaid rájes lei buohkanassii gávcciduhát guhttačuođi. Sii galge atnit váras bassi biergasiid. ₂₉Kehatlaččaid sogaid siida lei goađi guoras, lulábealde. ₃₀Kehatlaš sogaid bearrašiid oaivámuš lei Elisafan, Ussiela bárdni. ₃₁Kehatlaččaid bargun lei atnit váras árkka, beavddi, lámpájuolggi, áltáriid ja bassi biergasiid mat geavahuvvojedje ipmilbálvalusas, ovdaloavdaga ja buot doaimmaid mat daidda gulle. ₃₂Levilaččaid bajimus oaivámuš lei Elasar, báhppa Arona bárdni. Son galggai geahččat bearrái daid geat galge atnit váras bassi biergasiid.

₃₃Meraris surggiidedje Mahli ja mahlilaččat ja mušilaččat, merarilaš sogat. ₃₄Meararilaččat lohkkojuvvojedje ja geahčaduvvojedje, ja olbmábealle mánnosaččaid rájes lei buohkanassii guhttaduhát guoktečuođi. ₃₅Merarilaččaid sogaid bearrašiid oaivámuš lei Suriel, Abihajila bárdni. Sin siida lei goađi guoras, davábealde. ₃₆Merarilaččaid bargu lei atnit váras goađi fielluid, doaresmuoraid, stoalppuid, daid julggiid ja eará biergasiid ja buot doaimmaid mat dasa gulle, ₃₇ja vel stoalppuid mat ledje ovdašilju birra, daid julggiid, giddennávlliid ja báttiid.

₃₈Mosesa ja Arona ja Arona bártniid siida lei almmustusgoađi ovddas, nuorttabealde. Sii galge israellaččaid beales doaimmahit bassibáikki doaimmaid. Jos olggobealolmmoš seahkánii sin doaimmaide, de son galggai goddojuvvot.

₃₉Hearrá gohččuma mielde Moses ja Aron logaiga ja geahčadeigga levilaččaid sogaid mielde, ja sin olbmábealli mánnosaččaid rájes lei buohkanassii guoktelogiguokteduháha.

₄₀Hearrá sártnui Mosesii:

Geahčat buot Israela olbmábeale vuosttašriegádeddjiid mánnosaččaid rájes ja loga sin logu. ₄₁Galggat čuoldit levilaččaid munnje buot israellaččaid vuosttašriegádeddjiid sadjái, ja levilaččaid omiid buot israellaččaid omiid vuosttašriegádeddjiid sadjái. Mun lean Hearrá.

₄₂Moses divttii lohkat ja geahčadit buot israellaččaid vuosttašriegádeddjiid mánnosaččaid rájes, nugo Hearrá lei gohččon. ₄₃Vuosttašriegádeaddji bártnit lohkkojuvvojedje, ja sii ledje buohkanassii guoktelogiguokteduhát guoktečuođičiežalogigolbma.

₄₄Hearrá sártnui Mosesii:

₄₅Buot israellaččaid vuosttašriegádeddjiid sadjái galggat váldit levilaččaid, ja israellaččaid omiid sadjái levilaččaid omiid. Levilaččat gullet munnje. Mun lean Hearrá. ₄₆Muhto go israellaččaid vuosttašriegádeaddjit leat guoktečuođičiežalogigolbma eambbo go levilaččat, ₄₇de váldde sin lonisteami várás vihtta šekela juohkehačča nammii. Okta šekel vástida guoktelogi gera bassibáikki šekeldeattu mielde. ₄₈Atte silbbaid Aronii ja su bártniide lonástussan vuosttašriegádeddjiin geaid lohku manná badjel levilaččaid logu.

₄₉Moses válddii lonistansilbba mii dárbbašuvvui lonistit vuosttašriegádeddjiid geaid lohku manai badjel levilaččaid logu. ₅₀Dáid silbbaid, duhátgolbmačuođiguhttalogivihtta šekela bassibáikki šekeldeattu mielde, son válddii máksun israellaččaid vuosttašriegádeddjiin. ₅₁Moses attii lonistansilbbaid Aronii ja su bártniide, nugo Hearrá lei gohččon su dahkat.