Filippi 4

₁Mu ráhkis vieljažiiddán geaid mun ohcalan, dii mu illu ja gudnegierdu, bissot dan dihte nanusin Hearrás!

₂Mun ávžžun Euodia ja Syntyke bálvalit Hearrá soabalašvuođas. ₃Ja mun bivddán maiddái du, iežan oskkáldas bargoguoibmi, atnit sudnos fuola. Soai leaba soahtan mu beale evangeliuma dihte nugo maiddái Klemens ja mu eará bargoguoimmit geaid buohkaid namat leat eallima girjjis.

₄Illudehket álelassii Hearrás! Vel oktii mun dajan: Illudehket! ₅Šaddos din láđisvuohta dieđusin buot olbmuide. Hearrá lea lahka. ₆Allet leage morrašis mange dihte, muhto buktet álo dan maid dárbbašehpet, Ipmilii dieđusin átnumiin, rohkadallamiin ja giitalusaiguin. ₇Dalle Ipmila ráfi mii manná buot jierpmi badjel, várjala din váimmu ja jurdagiid Kristus Jesusis.

₈Ja de vel, vieljažiiddán, jurddašehket buot dan mii lea duohta, mii lea gudnejahttin veara, mii riekta, buhtis, ráhkistan veara ja dohkálaš, mii ihkinassii lea buorre ja ánssáša rámi. ₉Dahket dan maid lehpet mus oahppan ja váldán vuostá, maid lehpet mus oaidnán ja mus gullan. Dalle ráfi Ipmil lea dinguin.

₁₀Hearrá lea addán munnje dan stuorra ilu ahte dii viimmat lehpet eljosmuvvan atnit mus fuola. Dii lehpet gal dáhtton dan oppa áigge, muhto ehpet leat ožžon dasa vejolašvuođa. ₁₁Mun in oaivvil ahte mus livččii váilon mihkkege, danne go mun lean oahppan duhtat dasa mii mus lea. ₁₂Mun dieđán mo lea eallit heajos dilis ja mo lea atnit valljugasvuođa. Mun lean bures hárjánan juohke dillái, gallánit ja nealgut, atnit valljugasvuođa ja gillát vádjitvuođa. ₁₃Mun nagadan buot su siste guhte dahká mu gievran.

₁₄Dattetge dii dagaidet bures go searvvaidet mu áŧestussii. ₁₅Diihan diehtibehtet ahte dalle go mun álggus ledjen vuolgán Makedonias sárdnidit evangeliuma, de din filippilaččaid searvegoddi lei áidna mii veahkehii mu birgemuša dáfus. ₁₆Dalle juo go mun ledjen Tessalonikas, dii vuolggaheiddet munnje moatte geardde dan maid dárbbašin. ₁₇In mun gal din attáldagaid váinnut, mun dušše sávan ahte din bargu šaddadivččii didjiide ain eambbo šaddosiid. ₁₈Mun lean ožžon buot, ja mus lea vallji. Mus lea eambbo go dárbbašan, dál go lean ožžon Epafroditusis attáldaga maid leiddet vuolggahan. Dat lea njálggahájat, dohkálaš oaffar mii lea Ipmila miela mielde. ₁₉Mu Ipmil addá Kristus Jesusa dihte didjiide hearvás rikkisvuođastis buot maid dárbbašehpet. ₂₀Ipmilii, min Áhččái, gullá gudni álo ja agálašvuhtii. Amen.

₂₁Celket dearvvuođaid buot Kristus Jesusa bassi olbmuide. Vieljat geat leat mu luhtte, celket didjiide dearvvuođaid. ₂₂Didjiide celket maid dearvvuođaid buot bassi olbmot dáppe, erenoamážit dat geat leat keaisára bálvalusas.

₂₃Hearrá Jesus Kristusa árbmu lehkos dinguin.