Sátneláskkut 8

₁Gula, viisodat čuorvu,

ipmárdus addá jienas gullot.

₂Son čuožžu dieváid alde,

geaidnoguorain ja luoddaearuin.

₃Gávpotpoarttain maid ráigge olbmot

mannet gávpogii, son čuorvu jitnosit:

₄“Mun čuorvvun didjiide, olbmot,

mu jietna čuodjá juohkehažžii.

₅Oččodehket viisodaga,

dáidemeahttumat,

oččodehket jierpmi, jallat!

₆Gullet, mun sártnun

dan mii lea duohta,

mu baksamiin bohtet vuoigatlaš sánit.

₇Mu njuovčča sárdnu duohtavuođa,

mu baksamat fasttášit

ipmilmeahttunvuođa.

₈Buot mu sánit leat vuoigatlaččat,

dain ii leat mihkkege boastut

iige vearrut.

₉Dat leat čielgasat jierpmálažžii,

dat gii lea gávdnan dieđu,

diehtá ahte dat leat vuoigadat.

₁₀Oamastehket mu bagadusa

silbba sadjái,

dieđu ovdal go válljugolli,

₁₁danne go viissisvuohta lea

mávssoleabbo go bearralat,

eai makkárge dávvirat

leat dan veardásaččat.

₁₂Mun, viissisvuohta,

lean jierpmi siidaguoibmi,

mus lea diehtu ja fuolalašvuohta.

₁₃Gii ballá Hearrás, vašuha buot bahá.

Mun vašuhan goargatvuođa ja čeavlli,

bahás daguid ja gielis ságaid.

₁₄Mun attán ráđi ja ovdáneami,

mun lean jierbmi, munnje gullá fápmu.

₁₅Mu vehkiin gonagasat ráđđejit

ja oaivámuččat ásahit dan

mii lea riekta,

₁₆mu vehkiin ráđđejeaddjit

ja oaivámuččat stivrejit,

buohkat geat dubmejit rievttuid.

₁₇Mun ráhkistan daid

geat ráhkistit mu,

dat geat ohcet mu, gávdnet mu.

₁₈Mu luhtte lea riggodat ja gudni,

vuoiggalašvuohta ja bistevaš opmodat.

₁₉Mu attáldat lea buoret

go fiidnámus golli,

mu šaddu buoret go válljusilba.

₂₀Mun vádjolan

vanhurskkisvuođa geainnu,

gasku vuoiggalašvuođa bálgáid.

₂₁Mun attán riggodaga daidda

geat ráhkistit mu,

mun deavddán sin vuorkágámmáriid.

₂₂Hearrá sivdnidii mu vuosttamužžan,

daguidis álgun, guhká dás ovdal.

₂₃Agálašvuođas mun hábmejuvvojin,

álggus juo, ovdal go eanan lei.

₂₄Mun riegádin ovdal go

ledje mearračiekŋalasat,

go ii lean vel oktage čáhccás ája,

₂₅ovdal go várit biddjojuvvojedje

sadjáseaset,

ovdal buot dieváid riegádin mun,

₂₆ovdal go son dagai eatnama

ja meahci

dahje muoldda mii gokčá eatnama.

₂₇Mun ledjen das go son

ráhkadii almmiid,

dalle go son lebbii gomuvuođa

čiekŋalasa badjel,

₂₈go son attii allagasa balvvaide fámu

ja divttii mearračiekŋalasa

ádjagiid boršut,

₂₉go son bijai merrii ráji,

nu ahte čáhci bisánii dasa

gosa son gohčui,

go son bijai eatnama vuođđudusaid.

₃₀Dalle juo mun ledjen mánnán

su luhtte,

mun ledjen su illun beaivvis beaivái

ja duhkoradden álelassii

su muođuid ovddas.

₃₁Mun duhkoradden

miehtá su máilmmi,

mu illun ledje olbmománát.

₃₂De gullet dál mu, mánáidan!

Ávdugasat dat geat vádjolit

mu geainnuid.

₃₃Gullet mu cuiggodusa,

de dii viisubehtet,

allet hilggo dan.

₃₄Ávdugas dat olmmoš gii guldala mu,

gii beaivvis beaivái gohcá

mu uvssa guoras

ja vuordá mu uksašielmmás.

₃₅Dat gii mu gávdná, gávdná eallima

ja oažžu Hearrá árpmu.

₃₆Muhto dat gii mu badjelgeahččá,

vahágahttá iežas,

dat geat mu vašuhit,

ráhkistit jápmima.”