Sálmmaid girji 40

₂Guhká mun vurden Hearrá,

ja son gopmirdii mu beallái

ja gulai mu čuorvasa.

₃Son gesii mu bajás

heavahusa rokkis,

čiekŋalis rábáhis.

Son bijai mu julggiid bávtti ala,

son dagai mu lávkkiid nanusin.

₄Son attii mu njálbmái

ođđa lávlaga,

ávvulávlaga min Ipmilii.

Eatnagat oidnet dan, ballet

ja dorvvastit Hearrái.

₅Ávdugas dat olmmoš

gii luohttá Hearrái,

gii ii oza veahki nággáris olbmuin

iige dain geat jorralit giellásii.

₆Hearrá, mu Ipmil, eatnagat leat

du oavdudagut,

don dáhtut midjiide buori.

Ii oktage leat du veardásaš!

Mun hálidan gulahit

ja muitalit daid,

muhto dat eai leat logahallamis.

₇Njuovvanoaffara

ja borramušoaffara don it dáhto,

boaldinoaffara ja suddooaffara

don it gáibit,

muhto don addet munnje

beljiid mat gullet.

₈Danne mun dadjen:

Dás mun lean.

Girjegerrui lea čállojuvvon

maid mun galggan dahkat.

₉Ipmil, mu hállu lea dahkat

du dáhtu,

du láhka lea mu váimmus.

₁₀Mun almmuhan

du vanhurskkisvuođa

stuorra čoakkalmassii.

Mun in heaitte sárdnumis,

donhan dieđát dan, Hearrá.

₁₁Mun in čiega

du vanhurskkisvuođa,

mun gulahan du oskkáldasvuođa

ja bestojumi.

Mun in čiega du árbmugasvuođa

ja duohtavuođa

stuorra čoakkalmasas.

₁₂Hearrá, don it biehttal mus

váibmoláđisvuođat.

Du árbmugasvuohta ja duohtavuohta

suodjala mu álelassii.

₁₃Lohkameahttun áŧestusat

birastahttet mu.

Mu vearredagut leat joksan mu,

mun in veaje oaidnit daid,

dat leat eambbo go vuovttat mu oaivvis.

Mu roahkkatvuohta lea guođđán mu.

₁₄Leage árbmugas, Hearrá, gájo mu!

Hearrá, gáhča veahkehit mu!

₁₅Vare dat geat bivdet mu heakka

šattašedje heahpanit ja bilkiduvvot.

Vare dat geat sávvet munnje lihkuhisvuođa,

gáiddašedje heahpanemiin.

₁₆Vare mu hiddjideaddjit

suorganivčče

ja šattašedje heahpanit.

₁₇Illudehkoset ja ávvudehkoset

dus buohkat geat ohcet du.

Dadjoset álo dat geat ráhkistit

du bestojumi:

“Hearrá lea stuoris!”

₁₈Mun lean vártnuheapme

ja váivváš,

muhto Hearrá atná mus fuola.

Don leat mu veahkki ja mu beasti.

Ipmilan, ale ádján!