Ipmila moarit gearat
1Ja mun gullen tempelis alla jiena mii celkkii dan čieža eŋgelii: “Vulget ja gurrejehket Ipmila moari čieža geara eatnama ala.”
2Vuosttaš eŋgel vulggii ja gurrii iežas geara eatnama ala. Dalle ihte bahás ja ilgadis buhkkot olbmuide geain lei beađu mearka ja geat rohkadalle dan gova.
3Nubbi eŋgel gurrii iežas geara áhpái. Áhpi šattai dego jábmi varran, ja buot ábi heakkalaččat jápme.
4Goalmmát eŋgel gurrii iežas geara jogaide ja ádjagiidda, ja dat šadde varran. 5Mun gullen čáziid eŋgela cealkimin:
“Vanhurskkis leat don
gii leat ja gii ledjet,
don Bassi, go leat cealkán dán duomu.
6Sii leat golggahan
bassi olbmuid ja profehtaid vara,
ja danne don leat addán
sidjiide vara juhkat.
Dan sii leat ánssášan.”
7De mun gullen áltára cealkimin:
“Duođaid, Hearrá Ipmil, Buotveagalaš!
Duođat ja vuoigatlaččat leat du duomut.”
8Njealját eŋgel gurrii iežas geara beaivvážii, ja beaivváš oaččui fámu boaldit olbmuid dolainis. 9Olbmot bulle garra báhkas muhto hiddjidedje Ipmila gean gieđas dát givssit ledje. Sii eai dáhtton jorgalit ja addit gudni Ipmilii.
10Viđát eŋgel gurrii iežas geara beađu truvdnui, ja beađu riika sevnnjodii. Olbmot gáske bákčasiid dihte njuokčamiiddiset 11muhto hiddjidedje almmi Ipmila bákčasiiddiset ja buhkkuideaset geažil. Sii eai jorgalan eaige hilgon bahás daguideaset.
12Guđát eŋgel gurrii iežas geara stuorra Eufratetnui. Eanu čáhci goikkai, ja nu ráhkaduvvui geaidnu nuortagonagasaide. 13Mun oidnen go guovddi njálmmis, beađu njálmmis ja vearreprofehta njálmmis bohte golbma buhtismeahttun vuoiŋŋa mat ledje cubbo láhkásaččat. 14Dát leat bahás vuoiŋŋat mat dahket mearkkaid, ja dat vulge čohkket buot máilmmi gonagasaid soahtái Ipmila, Buotveagalačča, stuorra beaivvi.
15“Mun boađán dego suola. Ávdugas dat gii gohcá ja atná váras biktasiiddis, amas šaddat vádjolit álás buohkaid oaidnut ja šaddat heahpadii.”
16Vuoiŋŋat čohkkejedje gonagasaid báikái man namma hebreagillii lea Harmageddon.
17Čihččet eŋgel gurrii iežas geara áibmui. Ja tempela truvnnus gullui alla jietna mii celkkii: “Dat lea dáhpáhuvvan!” 18Álddagasat šleđgo, baján čearggui ja šattai garra eanandoarggástus, nu garas ahte dakkár ii leat leamaš nu guhká go olmmoš lea leamaš eatnama alde. 19Dat stuorra gávpot luoddanii golmma sadjái, ja álbmogiid gávpogat gahčče. Ipmil ii lean vajáldahttán stuorra Babylona, muhto dat šattai juhkat gearradievva Ipmila garra moari viinni. 20Buot sullot jávke, eaige várit šat dihtton. 21Stuorra čuođibuddásaš čuorbmasat gahčče olbmuid ala almmis, ja olbmot hiddjidedje Ipmila dan čuorpmasgivssi dihte, danin go giksi lei mearehis stuoris.
