Sakarja 7

₁Gonagas Dareiosa njealját ráđđenjagi ovccát mánus dahjege kislevmánus, mánu njealját beaivvi, bođii Hearrá sátni Sakarjai. ₂Betelis lei vuolggahuvvon Sareser ja Regem-Melek ja soames earát olbmát átnut Hearrás árpmu. ₃Sii galge jearrat báhpain geat bálvaledje Hearrá, Almmiveagaid Ipmila, tempelis, ja profehtain: “Galgágo Betelis ain čierrut ja fástudit viđát mánus, nugo lea dahkkojuvvon ollu jagiid?” ₄De munnje bođii dát Hearrá, Almmiveagaid Ipmila, sátni:

₅Jeara eatnama álbmogis ja báhpain: Go dii lehpet fástudan viđát ja čihččet mánus čiežalogi jagi, de lehpet go mu dihte dalle fástudan? ₆Go dii borrabehtet ja juhkabehtet, ehpetgo dii daga dan iežadet dihte? ₇Ehpetgo dii muitte daid sániid maid Hearrá lei gohččon ovddit profehtaid cealkit, dalle go Jerusalemis ja dan birasgávpogiin olbmot ain ásse oadjebassan, ja Negevis ja Šefelas ledje ássit?

₈Hearrá sátni bođii Sakarjai:

₉Ná cealká Hearrá, Almmiveagaid Ipmil: “Dubmejehket riekta, lehket buorit ja váibmoláđđásat guhtet guoibmáseattet! ₁₀Allet vealat leaskkaid alletge oarbásiid, amas olbmuid ja gefiid. Allet hutkka baháid guhtet guimmiideattet vuostá.” ₁₁Ná mun sárdnon din áhčiide, muhto sii biehttaledje guldaleames. Sii ledje vuostehágolaččat, jorgaledje munnje selggiid eaige dahkan oppa gullinge. ₁₂Sii garradedje váimmuset garasin dego diamánta, ja nu sii eai gullan dan lága eaige daid sániid maid Hearrá, Almmiveagaid Ipmila, vuoigŋa lei gohččon dološ profehtaid sárdnut. Dalle Hearrá, Almmiveagaid Ipmil, moaráhuvai sidjiide sakka. ₁₃Sii eai dáhtton gullat go son čuorvvui, ja danne Hearrá, Almmiveagaid Ipmil, celkkii: “In munge dáhto gullat go sii čurvot. ₁₄Mun bosádan sin dakkár álbmogiid gaskii maid sii eai dovdda.” Eanan bázii ávdimin sin maŋŋil, iige oktage johtán doppe. Nu sii dahke iežas hearvás eatnama ávdin meahccin.