Sakarja 9

Hearrá sátni lea Hadraka eatnamis,

Damaskus dan ássansadji,

Arama čalbmegollášhan gullá Hearrái

nugo buot Israela čearddatge.

₂Nu lea maid dan ránnjáeatnamis

Hamatis,

velá Tyrosis ja Sidonisge,

vaikko dat leat viisát.

₃Tyros lea huksen suodjinis ladni,

čobmen silbba dego muoldda,

buhtis golli nugo gáhtaid durddi.

₄Muhto Hearrá váldá gávpoga

ja suhppe merrii dan muvrraid.

Dolla duššada dan oalát.

₅Aškelon oaidná dan ja gáfestuvvá,

Gaza doarggista balus,

nu maiddái Ekron,

dasgo dan doaivu duššá.

Gaza massá gonagasas,

Aškelon šaddá ávdimin,

₆Ašdodis ássá seahkeálbmot.

Mun, Hearrá, doaján filistalaččaid čeavlli.

₇Mun válddán varrabierggu sin njálmmis,

fastivuođaid sin bániid gaskkas.

Dat geat filistalaččain báhcet,

gullet min Ipmilii,

sii leat dego Juda sohka,

Ekrona olbmot dego jebuslaččat dolin.

₈Mun gáhtten iežan viesu

soahteveagaid vuostá

mat fallehit ja geassádit.

Ii goassege šat boađe oktage

áŧestit mu álbmoga,

dál mu čalmmit leat rahpasat.

₉Čuorvvo ilus, nieida Sion,

ávvut sakka, nieida Jerusalem!

Geahča, du gonagas boahtá.

Son lea vanhurskkis ja buktá bestojumi,

son lea vuollegaš, son riide áseniin,

nuorra ásenoriin.

₁₀Son duššada soahtevovnnaid Efraimis

ja heasttaid Jerusalemis,

son doadjá soahtedávggiid.

Son gulaha álbmogiidda ráfi,

su váldi ollá mearas merrii,

Eufrata rájes gitta máilmmi ravddaid rádjái.

₁₁Varralihtu fámuin

mun luoittán du fáŋggaid

čázihis arvegáivvos.

₁₂Máhccet ladnái, fáŋggat, dis lea doaivu!

Odne mun lohpidan:

Mun buhtten dutnje guovttegeardásaččat.

₁₃Mun lean gealdán Juda dávgin,

bidjan Efraima dasa njuollan.

Mun hásttán du bártniid, Sion,

Greikka bártniid vuostá

ja dagan du sáŋgára miehki láhkásažžan.

₁₄Hearrá almmustuvvá iežas álbmogii,

su njuolla girdá dego álddagas.

Hearrá Ipmil bosáda dorvve,

son manná ovdan lulliriđus.

₁₅Hearrá, Almmiveagaid Ipmil,

suodjala iežas álbmoga.

Su šleaŋgogeađggit duššadit vašálaččaid,

časket sin eatnamii.

Varra golgá dego viidni,

oaffarlihtit divvet,

áltára čiegat varahuvvet.

₁₆Dan beaivvi Hearrá Ipmil

gádju álbmogis,

dan beaivvi son čohkke sin

dego sávzaealu.

Sii šealgájit su eatnamis

dego divrras geađggit oaivečiŋas.

₁₇Man buorrin eanan šaddá,

man čáppahin!

Nuorra olbmát fávrrosmuvvet dan gortnis,

nuorra nieiddat dan viinnis.