Matvein jevanheli 1

₁Iisussan Hristossan, Tuavitan Pojan ta Aprahamin Pojan, heimolanka:

₂Aprahamilla šynty Issakka, Issakalla Juakko, Juakolla Juuta ta hänen vellet, ₃Juutalla šynty Faresi ta Zara, kumpasien muamo oli Famara, Faresilla šynty Esromi, Esromilla šynty Arami, ₄Aramilla šynty Aminadavi, Aminadavilla šynty Naassoni, Naassonilla šynty Šalmoni, ₅Šalmonilla šynty Voosi, kumpasen muamo oli Raava, Voosilla šynty Oviti, kumpasen muamo oli Ruf, Ovitilla šynty Jessei, ₆Jesseillä šynty Tuavitta, čuari.

Čuari Tuavitalla šynty Solomoni, kumpasen muamo oli Urijan naini, ₇Solomonilla šynty Rovoami, Rovoamilla šynty Avija, Avijalla šynty Asa, ₈Asalla šynty Josafati, Josafatilla šynty Jorami, Joramilla šynty Osija, ₉Osijalla šynty Joafami, Joafamilla šynty Ahasi, Ahasilla šynty Jesekija, ₁₀Jesekijalla šynty Manassija, Manassijalla šynty Amoni, Amonilla šynty Josija, ₁₁Josijalla šynty Joakimi, Joakimilla šynty Jehonija ta hänen vellet šiih aikah, kun rahvašta väkisin šiirrettih Vavilonih.

₁₂Vavilonih šiirron jälkeh Jehonijalla šynty Salafiili, Salafiililla šynty Sorovaveli, ₁₃Sorovavelilla šynty Aviuti, Aviutilla šynty Jeliakimi, Jeliakimilla šynty Asori, ₁₄Asorilla šynty Satoki, Satokilla šynty Jahimi, Jahimilla šynty Jeliuti, ₁₅Jeliutilla šynty Jeleasari, Jeleasarilla šynty Matfani, Matfanilla šynty Juakko, ₁₆Juakolla šynty Joosefi, Muarien mieš. Muarie šai Iisussan, kumpaista šanotah Hristossakši.

₁₇Tällä keinoin ihmispolvija Aprahamista Tuavittah šuate oli kaikkieh nellätoista, Tuavitašta Vavilonih šiirtoh šuate oli niise nellätoista, ta Vavilonih šiirrošta Hristossah oli šamoin nellätoista polvie.

₁₈Iisussan Hristossan šyntymini kävi näin. Hänen Muamo Muarie oli kihloissa Joosefin kera. Ennein kun hyö oli mänty yhteh, šelvisi, jotta Muarie on pakšuna Pyhäštä Henkeštä. ₁₉Hänen šulhani Joosefi oli oikiemielini mieš eikä tahton Muariella häpietä rahvahan ieššä. Šen takie hiän tahto peitočči purkua kihlat.

₂₀Konša Joosefi tuumaičči tätä, hänellä näyttäyty unešša Hospotin anheli ta šano: «Joosefi, Tuavitan poika, elä varaja ottua Muarieta ičelläš naisekši. Še, mi Häneh on šikeytyn, on Pyhäštä Henkeštä. ₂₁Hiän šuau Pojan, ta šiun pitäy antua Hänellä nimi Iisussa, šentäh kun Hiän piäštäy oman rahvahan šen riähistä.»

₂₂Tämä kaikki oli šitä vaššen, jotta kävis toteh, mitä Hospoti oman viessintuojan kautti oli šanon:

₂₄Joosefi havaččautu unešta ta ruato niin, mitein Hospotin anheli käški. Hiän otti Muarien omakši naisekši. ₂₅Kuitenki hiän ei košken Muarieta, kuni Muarie ei šuanun Poikua, enšimmäistä laštah. Joosefi anto Pojalla nimen Iisussa.