Evvan 3

₁Nikodeemus, kååʹtt leäi farisõs da õhtt juudlažniiʹǩǩi vueiʹvvoummin, ₂pueʹđi måtam iinn Isõõzz årra da cieʹlǩi: «Rabbi, mij tieʹttep, što Vuâsppåʹd lij tuejjääm tuu uʹčteeʹlen. Ij ni ǩii pââʹst tuejjeed nåkam õõmâstuâjaid mâʹte ton, iʹlleʹžže Vuâsppåʹd suin õõutsââʹjest.»

₃Isõs vaʹsttii da cieʹlǩi suʹnne: «Tuõđi, tuõđi mon ceälkam tuʹnne: kååʹtt ij šõõdd oʹđđest, tõt ij vueiʹt vueiʹnned Vuâsppååʹd väʹlddkååʹdd.» ₄Nikodeemus kõõjji: «Mäʹhtt vuäitt vuäʹmm ooumaž oʹđđest šõddâd? Ij son vueiʹt mõõnnâd jieʹnnes vuõʹbdde da nuuʹbb vuâra šõddâd.» ₅Isõs vaʹsttii: «Tuõđi, tuõđi mon ceälkam tuʹnne: kååʹtt ij šõõdd čääʹʒʒest da Jiõggâst, ij son vueiʹt piâssâd Vuâsppååʹd väʹlddkådda. ₆Oummust šõddâm lij määddoolâž, leša mii Jiõggâst lij šõddâm, lij jiõglvaž.

₇Jeäʹl õõmtõõžž tõn, što säärnam tuʹnne: tij õlggveʹted šõddâd oʹđđest. ₈Piõgg pååss koʹst tätt; ton kuulak pâi tõn šuuvvâm, leša jiõk tieʹđ, koʹst tõt puätt da koozz tõt mâânn. Nåkam liâ še Jiõggâst šõddâm.» ₉Nikodeemus vaʹsttii da kõõjji suʹst: «Mäʹhtt tõt vuäitt leeʹd nuʹt?» ₁₀Isõs vaʹsttii da cieʹlǩi suʹnne: «Ton leäk Israel uʹčteeʹl jiõk-ga tõn tieʹđ. ₁₁Tuõđi, tuõđi mon ceälkam tuʹnne: mij mainstep tõn, mõõn tieʹttep, da tuõđštep tõn, mõõn leäʹp vuäinnam, leša tij jeäʹped priim mij tuõđštõõzzeen. ₁₂Tij jeäʹped ååsk, ko mon mainstam tiʹjjid tänâlmmsaž aaʹššid. Mäʹhtt tâʹl vuäitčid åskkad, ko mainstam tunâlmmsaž aaʹššid?

₁₃Ij ni ǩii leäkku pâjjnam pââjas âlmma; pâi son, kååʹtt lij tåʹben puättam, Oummu Päʹrnn. ₁₄Nuʹt mäʹhtt Moʹssai ââʹlii kuuʹd poostaijânnmest, nuʹt âlgg še Oummu Päʹrnn ââʹleed, ₁₅što juâkksast, kååʹtt åskk suu, leʹčči suʹst âʹǩǩpâjjsaž jieʹllem.

₁₆Nuʹt lij Vuâsppåʹd maaiʹlm räʹǩstam, što uuʹdi oʹdinakai Pääʹrnes, što ij ni õhtt, kååʹtt åskk suu, jäämče, pâi vuäǯǯči jieʹlled âʹǩǩpââjas. ₁₇Ij Vuâsppåʹd vuõlttääm Pääʹrnes maaiʹlm suudâm diõtt, pâi tõn vääras, što maaiʹlm suu pääiʹǩ peälštõõvči.

₁₈Tõn, kååʹtt åskk suu, jeät suudu; kååʹtt ij ååsk, lij juʹn suudum, son iʹlla åskkam Vuâsppååʹd oʹdinakai Pääʹrn nõʹmme. ₁₉Čuõvv pueʹđi maaiʹlme, leša oummu jiâ räʹǩstam čuõv pâi seuʹnnjõõzz, tâʹl sij tuejjee ǩeähn. Tâʹl siʹjjid pueʹđi suudâs. ₂₀Jueʹǩǩkaž, kååʹtt tuejjad ǩeähn, vâjjad čuõv tõnt, što suu tuâj jiâ kuâsttjeʹčče. ₂₁Leša kååʹtt jeäll vuõiʹǧǧest, puätt čuõʹvve, da čuõvâst kuâsttai, što son lij jeällam nuʹt, mäʹhtt Vuâsppåʹd tätt.»

₂₂Mâŋŋa tõʹst Isõs mõõni mättʼtõspäärneesvuiʹm Juudea, jeälsti tåʹben siʹjjivuiʹm da riisti oummid. ₂₃Leša Evvan še riisti Ainonest ââlda Saliim, ko tåʹben leäi jiânnai čääʹcc; oummu puõʹtte da uʹvdde risttâd jiijjâz. ₂₄Evvan iʹlleämma veâl pijjum tormma.

₂₅Nuʹt Evvan mättʼtõspäärna aʹlǧǧe räʹjjtõõllâd måtam juudlažniiʹǩǩin puʹtstõõttâmnääʹl diõtt. ₂₆Sij mõʹnne Evvan årra da cieʹlǩǩe suʹnne: «Uʹčteeʹl, mooštak-a åumma, kååʹtt leäi tuiʹn nuuʹbb peäʹlnn Jorddan da ǩeäʹst ton tuõđštiǩ? Ååʹn son še restt, di puk oummu mâʹnne suu årra.» ₂₇Evvan vaʹsttii da cieʹlǩi: «Ooumaž ij vueiʹt väʹldded ni mâiʹd, mii ij leäkku uvddum suʹnne ââʹlmest. ₂₈Tij leäʹped muu tuõđšteei, što mon cieʹlǩǩem: jiõm mon leäkku Kristõs, muu liâ vuõlttääm pâi suu ooudbeäʹlnn jooʹttjen. ₂₉Ǩeäʹst lij kaavsõs, tõt lij vuõddâm; vuõddâm naʹzvaan čueǯǯ da kulddal suu da rämmaš čuuʹt vuõddâm jiõnâst. Nuʹt muu räämmast še iʹlla ǩieʹčč. ₃₀Son âlgg šõddâd šoorben da mon suu uuʹccben.»

₃₁Son, kååʹtt puätt pâʹjjen, lij šoorab puki jeärrsi. Tät, kååʹtt lij šõddâm määddast, lij tänâlmmsaž di maainast tänâlmmsaid. Son, kååʹtt puätt ââʹlmest, lij šoorab puki. ₃₂Son tuõđašt tõʹst, mâiʹd lij vuäinnam da kuullâm, leša ij ni ǩii vääʹld vuâstta suu tuõđštõõzzâs. ₃₃Tõt, kååʹtt väldd suu tuõđštõõzzâs vuâstta, raavad, što Vuâsppååʹd mainnsin lij tuõtt. ₃₄Son, koon Vuâsppåʹd lij vuõlttääm, särnn Vuâsppååʹd saaʹnid, ij-ǥa Vuâsppåʹd käʹccmõõđ uʹvdded Jiõggâs. ₃₅Eʹčč rääʹǩǩast Pääʹrn da lij ouddam puk suu välddses. ₃₆Kååʹtt åskk Pääʹrn, vuäǯǯ âʹǩǩpâjjsaž jieʹllem, leša kååʹtt ij jäkktõõl Pääʹrn, tõʹst ij leäkku jieʹllem, leša son pâi pââšš Vuâsppååʹd vâjjõõzz vueʹlnn.