Evvan 9

₁Da rääi mõõneen Isõs vuõiʹni åumma, kååʹtt leäi leämmaž čââʹlmtem juʹn šõddmest. ₂Da suu mättʼtõspäärna kõʹčče suʹst: «Rabbi, ǩii tuejjii rieʹǩǩ, ååum jiõčč avi suu puärraz, što son õõlǥi šõddâd čââʹlmteʹmmen?» ₃Isõs vaʹsttii: «Ij ni ǩii leäkku tuejjääm rieʹǩǩ, ij ååum jiõčč jiâ-ǥa suu puärraz. Son šõõddi čââʹlmteʹmmen, što Vuâsppååʹd tuâj kuâsttjeʹčče suʹst. ₄Nuʹt kuuʹǩǩ ko lij peiʹvv, mij õlggâp tuejjeed suu reâuǥaid, kååʹtt lij muu vuõlttääm; puätt inn, kuäʹss ij ni ǩii vueiʹt reâuggad. ₅Nuʹt kuuʹǩǩ ko mon leäm maaiʹlmest, leäm mon maaiʹlm čuõvv.»

₆Nääiʹt ko Isõs cieʹlǩi, čoʹlǧǧii son jânnma da tuejjii čoolǥâst muâil da muâilain pååusai åumma čõõʹlmid ₇da cieʹlǩi suʹnne: «Mõõn da põõzzõõđ Siiloa lääddast» — tõt lij jåårǥlââʹtteeʹl: vuõlttuum. — Nuʹt son mõõni da põõzzõõđi da pueʹđi mååusat vueiʹnnʼjen.

₈Räʹjjla da tõk, kook leʹjje vuäinnam åumma äännmen, kõõjjee: «Ij-ǥo tät leäkku tõt ååum, kååʹtt åårai išttâd äännmen?» ₉Jeärraz cieʹlǩǩe: «Seämma ooumaž i lij.» Jeärraz eʹpet renste: «Ij leäkku, lij pâi suu nallšem.» Son jiõčč cieʹlǩi: «Kâʹl mon leäm seämma ooumaž.» ₁₀De sij kõʹčče: «Mäʹhtt ton ååʹn vuäinak?» ₁₁Ååum vaʹsttii: «Tõt ååum, koon nõmm lij Isõs, raaji vuõddsest da čoolǥâst muâil da pååusai tõiʹn muu čõõʹlmään da säärnai muʹnne: ’Mõõn da põõzzõõđ Siiloa lääddast’. Da mon mõʹnnem da põõzzõʹttem da vueiʹnškuõʹttem.» ₁₂Sij kõʹčče: «Koʹst son ååʹn lij?» «Jiõm mon tieʹđ», ååum vaʹsttii.

₁₃De sij viʹǩǩe suu, kååʹtt ouddâl leäi leämmaž čââʹlmtem, farisõõzzi årra. ₁₄Tõt peiʹvv, kuäʹss Isõs raaji muâil da pueʹrii čââʹlmteʹmes åumma, leäi prääʹzneǩ. ₁₅Nuʹt še farisõõzz kõõjjee suʹst, mäʹhtt son aaʹlji vueiʹnškueʹtted. De son säärnai siʹjjid: «Son pååusai čõõʹlmään muâilain. Da mon põõzzõʹttem da aʹlǧǧem vueiʹnškueʹtted.» ₁₆Tâʹl måtam farisõõzz cieʹlǩǩe: «Tõt ååum iʹlla Vuâsppååʹdest, ko son ij pââʹzzet prääʹzneǩ.» Jeärraz cieʹlǩǩe: «Vuäitt-a reäkksaž ooumaž raajjâd nåkam õmmsid?» Da sij leʹjje kõskkneez jeeʹres miõl.

₁₇Farisõõzz kõʹčče oʹđđest čââʹlmteʹmes åummast: «Mâiʹd ceälkak tõn oummust, kååʹtt pueʹrii tuu?» Da ååum cieʹlǩi: «Son lij profeʹtt.» ₁₈Leša juudlažneeʹǩǩ jiâ åskkam, što ååum leäi leämmaž čââʹlmtem da leäi puârrnam, ouʹddelgo viʹǩǩe suu eeʹjjes da jieʹnnes årra ₁₉da kõʹčče suännast: «Lij-ǥo tät tuännai päʹrnn? Lij-ǥo son šõddâm čââʹlmteʹmmen? Mäʹhtt son ååʹn vuäinn?» ₂₀Suu puärraz vaʹsttee: «Kâʹl son lij muännai päʹrnnem da čââʹlmteʹmmen son lij šõddâm, ₂₁leša mäʹhtt son ååʹn vuäinn, jeäʹp muäna tieʹđ, jeäʹp-ǥa tieʹđ, ǩii lij suu pueʹrääm. Kõõččâd suʹst jijstes! Kâʹl son lij nuʹt puäʹres, što vuäitt jiõčč vaʹstteed.» ₂₂Nääiʹt suäna cieʹlǩǩe, ko suäna põʹlle juudlažniiʹǩǩin. Ko juudlažneeʹǩǩ leʹjje suåppâm kõskkneez, što tõt, ǩii ååskai suu Isõssân Kristõssân, õõlǥi räʹtǩǩeed ceerkvest. ₂₃Tõn diõtt åumma puärraz cieʹlǩǩe: «Kõõččâd suʹst jijstes. Kâʹl son lij nuʹt puäʹres, što vuäitt jiõčč vaʹstteed.»

₂₄Farisõõzz kõʹčče oʹđđest åummast, kååʹtt leäi šõddâm čââʹlmteʹmmen: «Muuʹšt, što Vuâsppåʹd kooll, mâiʹd ton mainstak, maainâst tuõđ! Mij tieʹttep, što tõt ooumaž lij reäkksaž.» ₂₅Son vaʹsttii: «Mon jiõm tieʹđ, lij-a son reäkksaž avi ij; leša tõn mon teâđam, što mon leʹjjem ouddâl čââʹlmtem da ååʹn mon vuäinam.» ₂₆De sij kõʹčče suʹst: «Mäʹhtt son pueʹrii tuu? Mäʹhtt son ääʹvii tuu čõõʹlmääd?» ₂₇Son vaʹsttii: «Mon cieʹlǩǩem juʹn tõn. Mõõn diõtt tij jeäʹped kulddlam? Mõõn diõtt tij eʹpet tättveʹted kuullâd seämma ääʹšš? Tättveʹted-a tij še äʹlǧǧed suu mättʼtõspäärnžeʹnes?» ₂₈Farisõõzz aʹlǧǧe suu viggted: «Ton täʹst leäk suu mättʼtõspäärnaž, leša mij leäʹp Moʹssai mättʼtõspäärna. ₂₉Mij tieʹttep, što Vuâsppåʹd lij mainstam Moʹssja, leša koʹst tät lij, tõn jeäʹp tieʹđ.»

₃₀Ååum vaʹsttii da cieʹlǩi siʹjjid: «Tõt-i lij täʹst nuʹt õõmâs, što tij jeäʹped tieʹđ, koʹst son lij, da seâža son pueʹrii muʹst čõõʹlmid. ₃₁Mij tieʹttep, što Vuâsppåʹd ij kuul reäkksaid, pâi tõiʹd, ǩeäk ciʹsttje suu da tuejjee suu täättas mieʹldd. ₃₂Iʹlla ni kuäʹss kullum, što ǩii-ne lij pueʹrääm čââʹlmteʹmmen šõddâm oummu. ₃₃Ij son vuäitče ni mâiʹd tuejjeed, jõs suu iʹlleʹčče Vuâsppåʹd vuõlttääm.»

₃₄Farisõõzz vaʹsttee suʹnne da cieʹlǩǩe: «Ton leäk rieʹǩǩest šõddâm ooumaž. Ton-ǥo täʹst äälǥčiǩ miʹjjid mättʼted?» Da sij vuâjte suu åålǥas.

₃₅Da Isõs kuuli, što sij leʹjje vuâjtam suu åålǥas; da ko son vuõiʹni suu, son cieʹlǩi suʹnne: «Ååskak-a ton Vuâsppååʹd Pärnna?» ₃₆«Šurr, ǩii son lij?», ååum kõõjji. «Cieʹlǩ da mon ååskam.» ₃₇Isõs cieʹlǩi suʹnne: «Ton leäk suu vuäinnam, da son lij tõt, koiʹn ton ååʹn säärnak.» ₃₈Nuʹt son cieʹlǩi: «Šurr, mon ååskam»; da son kåʹmrdeeʹl moʹlidvõõʹsti suu.

₃₉Da Isõs cieʹlǩi: «Mon leäm puättam maaiʹlme suudâd, što čââʹlmteeʹm äälǥče vueiʹnned, da tõk, kook vuäiʹnne, šõõddče čââʹlmteʹmmen.» ₄₀Da måtam farisõõzz, kook leʹjje tõʹst ââlda, cieʹlǩǩe suʹnne: «Leäʹp-a mij še čââʹlmteeʹm?» ₄₁Isõs cieʹlǩi siʹjjid: «Ko tij leʹččid čââʹlmteeʹm, tij leʹččid määiʹmteeʹm, leša ååʹn tij ceäʹlǩǩveʹted: ’Mij vueiʹnnep’. Tij leäʹped veärla. Tij reäʹǩǩ pââšš.»